Manase abeina (2Ab 21:1-18)
1 Manase cha abei tua nota kô hrawhleinopa châ ta; Zerusale liata kô sypangawh nata kô pangawh a bei ta.
2 ABEIPA mohmô liata hmo pha leipa, Izarel pathlazy hmiakô liata ABEIPA ta a papuapa Khazohpa a pahno leipa phozy ta hmo pasichhih ngaitapa ama taopa hawhpa cha tao tyh hra ta.
3 A paw Hezekiah ta a parao chiehpa su sâhpa zy sa pathi ta, Baal zy châta maisâh tao ta, Ashera nohthlahpa zy tao ta, avâ liata a ypa zydua khi achhy ta, chakao ta.
4 Zerusale liata, “Chhâzaw ta ei moh a y aw,” ABEIPA ta a tahna ABEIPA o liana chata maisâh zy tao ta.
5 ABEIPA o dôhpachhôh tlyhmia miano liana chata avâ liata a ypa zydua châta maisâh zy tao ta.
6 Hino sawchapawpa saikao liata mei liana chata a sawzy pangiasa ta; pachaopa zy hmâh ta, dyu zy hmâh ta, lyurâhripa a pachao thaipa a peipa zy nata dyu thaipa zy hmâh tyh ta; ABEIPA mohmô liata hmo pha leipa a pathi pa-ia nawpa ta tao tyh ta.
7 Khazohpa ta Davi nata a sawchapawpa Sawlawmaw hnohta,
8 He o nata Zerusale khih, Izarel chi zydua hry liata ei tlypa liana heta ei moh cha chhâzaw ta paysa aw na ta; bie ei piepa zydua nata ryhpa zydua zy, bieraopa zy, hmo tao awpa zy, Mawsi hmâpa ta ei piepa zy kha ama zyh khiahtala ama mahpaw zy ei pie hawpa râh tawhtapa cha Izarel zy phei chakâsa khao aw va na,” a vaw tah hawna Khazohpa o liana chata ano taopa khazoh nohthlah taopa soh ta.
9 Manase chata Zudah zy nata Zerusale liata chyhsa zy cha hmo paraosa ta; chatanachata ABEIPA ta Izarel zy hmiakô liata a pahleipadia hawpa pho zy hlâta hmah hmo parao via ei ta.
10 ABEIPA ta Manase nata a chyhsa zy hnohta bie reih tyh ta, châhrasala pachâ leipa ei ta.
11 Chavâta ABEIPA ta Asuria pheisaih hyutuhpa zy tuah ta, Manase cha bâlia ta buh ei ta, keihraih daih ei ta, Babylaw lâta siekhei haw ei ta.
12 Chatawhcha nôpo ngaitapa ta a y nona chata ABEIPA Khazohpa cha tlua ta, a mahpaw zy Khazohpa hmiakô liana chata thata a panawh ta.
13 Ano lâta thlahchhâ ta, ngiachhiena to ta, a hiana cha nahthlie ta, Zerusale lâ a khihnarâh lâna chata chhihtha haw ta. Chatanachata Manase chata ABEIPA cha Khazohpa a châpa pahno haw ta.
14 Cha hnôh lâna chata Davi khih khôtho lâta Kihaw notla lâchhâh saikao liata Nga Ochhi angiana taihta kuh tao ta, Ôphel padôpa ta a sâh ngaitapa ta sa ta; Zudah kuh a hneipa zydua liana chata hyutuhpa riahpha ngaitapa zy soh ta.
15 Chatawhcha râh hropa khazohpa zy nata khazoh nohthlahpa zy, ABEIPA o tawhtapa cha pahleipadia ta, ABEIPA o liata nata Zerusale liata maisâh a taopa zydua cha khih tawhtapa thy khai ei ta.
16 ABEIPA maisâh tao ta, adyhna hiana atheihna zy, alyna bie reina zy hlâ ta, Zudah zy cha ABEIPA Izarel zy Khazohpa chakao awpa ta bie pie ta.
17 Zawpi zy cha su sâhpa zy liana chata atheih tyh ei ta; anodeikuacha ABEIPA ama Khazohpa deita lâta tlao châ ta.
18 Manase thâtih hropa zydua zy, Khazohpa lâta thlah a chhâna kyh zy, ABEIPA Izarel zy Khazohpa moh ta hrohsopa ta ano hnohta bie ama reipa kyh zy cha Izarel abeizy thâtih hry liata ropa ta y ta.
19 A thlahchhâna zy nata Khazohpa ta a ngiachhiena nata a panawh hlâta a moleina zydua nata su sâhpa taopa ta, Ashera nata khazoh nohthlahpa taopa a paduana su zydua chhao, Izarel abei zy châbu liata ropa ta a y khai.
20 Chatanachata Manase cha a mahpaw zy hnohta a mô ta, ano o liata pabu ei ta; a sawchapawpa Amawna cha ano vyuhpa ta a bei haw ta.
Amawna abeina(2Ab 21:19-26)
21 Amawna cha a bei tua nota kô syno nata kô no châ ta; Zerusale liata kô no a bei ta.
22 A paw Manase tahpa hawh hra ta ABEIPA mohmô liata hmo pha leipa tao ta; a paw Manase ta a taopa khazoh nohthlahpa taopa zydua lâta Amawna cha atheih ta, chakao ta.
23 A paw Manase a panawhpa hawhna khata ABEIPA hmiakô liata a panawh leipa ta. Amawna he molei rilipa a châ.
24 Chatawhcha a chakaotuhpa zy ta tei ei ta, ano o liata thie ei ta.
25 Châhrasala Amawna a teituhpa zydua cha zawpi ta thie khai haw hra ei ta; zawpi zy chata a sawchapawpa Zôsiah cha ano vyuhpa ta abei ta tao haw ei ta.