Mara Holy Bible: 2 Thâtihzy Rona

Showing posts with label 2 Thâtihzy Rona. Show all posts

2 Thâtihzy Rona 1

Sona hmô awpa ta Sawlawmaw thlahchhâna (1Ab 3:3-15)

1 Davi sawchapawpa Sawlawmaw cha a khihnarâh chhôh liana chata tha patlôpa ta y ta, ABEIPA a Khazohpa cha a hnohta y ta, thata parôhnahsa ta.

2 Sawlawmaw chata Izarel sahlao zydua pheisaih sâh kha hyutuhpa zy, za kha hyutuhpa zy, ryureituhpa zy, Izarel râh zydua liata molaipa chhôhkha pawhrâhpa zydua zy cha a chhohia ta.

3 Chatawhcha Sawlawmaw nata apakhypa sahlao zydua cha Kibia khih liata su sâhpa lâna chata sie ei ta; cha liana chata ABEIPA chakaotuhpa Mawsi ta râhpathohpa liata a taopa Khazohpa achhyna byureih kha a y.

4 Khazohpa Byh deikua cha Davi ta a vaw chhuahnoh hawna su lâta Kiriaziari tawhta khykhei ta, Zerusale liata a so nawpa poh-o parai haw ta.

5 Hura sawchapawpa Uri sawchapawpa Bezalel taopa dawh maisâh kha ABEIPA achhyna byureih kiapâh liana chata y hra ta. Sawlawmaw nata zawpi sahlao chata kei pangai ei ta.

6 Sawlawmaw cha achhyna poh-o kiapâh ta liata dawh maisâh yna ABEIPA hmiakô lâna chata khy ta, raopa hlâna sa kha kaw hlâ ta.

7 Cha zâ liana chata Khazohpa cha Sawlawmaw hnohta a vaw luah ta, “Khâpa ei cha pie aw, na hiah teh,” tah ta.

8 Sawlawmaw ta Khazohpa hnohta, “Ei paw Davi hnohna khata ngiachhiena thata paluahsa chi ta, ano vyuhpa ta abei ta na tao chi ta.

9 Hy ABEIPA Khazohpa y, ei paw Davi hnohta na biehrai kha pie patlô mah y, nâma ta leilô doh lei hluh zie tlaita zawpizy abei ta na tao chi ta.

10 He zawpi sahlao hmiakô liata angiapa nata puapa ta ei y thei nawpa ta sona nata novâhna na pie mah y, na chyhsa he zie zydua he ahy e ryureipa thei aw tly?” tah ta.

11 Khazohpa ta Sawlawmaw hnohta, “He hawhpa palôhrupa phaohpa ta, sôh nata piah zy, hneirôna zy, palyupalihna zy, châ haotuhpa hrona zy, hiah leipa ta, hro pasihna zy chhao hiah leipa ta, ama chô liata abei ta ei cha taona ei chyhsa zy ryu na reih thei nawpa ta sona nata novâhna zy tlao eina hiapa vâ chi ta,

12 sona nata novâhna cha piepa na châ haw. Na hmia lâta abeizy chhaota ama hnei beih leipa, na hnôh lâ chhaota ama hnei beih lei awpa sôh nata piah zy, hneirôna zy, palyupalihna zy ei cha pie hra aw,” tah ta.

13 Chatanachata Sawlawmaw cha su sâhpa kiapâh liata achhyna byureih yna Kibia khih lâta a tlypa cha Zerusale lâta kua ta, Izarelzy chô liata ryureih haw ta.

Sawlawmaw sôh paliena (1Ab 10:26-29; 2Tr 9:25-29)

14 Sawlawmaw chata talaili zy nata arâ kiahpa chyhsa zy pakhy ta; talaili sâh kha nata za palih nata arâ kiahpa thy kha nata sâh no hnei ta, chazy cha talaili sona khih liata zy, Zerusale abei yna liana zy chata soh ta.

15 Chatawhcha abei chata Zerusale liana chata ngôh nata tâkâri zy cha alô hawh dâhdei ta pachâna taihta thata soh ta, sidy thozy cha bypi liata theiku tho hawh dâhdei ta pachâna taihta soh hra ta.

16 Sawlawmaw hneipa arâ zy cha Izi râh tawhta lapa châ ta, abei sôhdaopa zy chata chazy cha a hri a hri ta khaw tyh ei ta, a hri ta chalei lymâpa a châ.

17 Izi râh liata talaili zy cha tâkâri sekel za charu lymâ ta ri tyh ei ta, arâ zy cha sekel za kha nata sypangawh lymâ ta; cha hawhna hra chata Hiti mo abei zydua nata Suria abeizy chhao amâ ri tyh.

2 Thâtihzyrona (2 Chronicles)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36

2 Thâtihzy Rona 2

Sawlawmaw nata Hura a paryhna (1Ab 5:1-18; 7:13-14)

1 Sawlawmaw ta ABEIPA moh châta o sa a chhuah ta, abei o awpa chhao.

2 Sawlawmaw chata hmo a phaohpa chyhsa thy sari nata tlâh liata tho a thlutuhpa thy charie nata arao a vaihtuhpa sâh thôh nata za charu rao ta.

3 Sawlawmaw ta Tyre beipa Hura hnohta; “Ei paw Davi hmo vaw taopa chata, a yna awpa o sa nawpa ta sidy tho zy, na vaw paphaopa hawhna khata na taopa hra mah y.

4 ABEIPA ei Khazohpa moh ta o cha ano châta hlâpa ta, a hmiakô liata rohpahâhpa raopa ta, viahchhâ sopa ta pahânoh zy, thla thiehpa zy, ABEIPA eima Khazohpa kyhchhi nozy liata my nata zâ ta raopa hlâna hlâ nawpa ta ei sa aw, hezy Izarel zy châta chhâzaw bieraopa cha a châ.

5 O sa ei chhuahpa he a rôhnah ngaita awpa châ ta, eima Khazohpa he khazoh zydua hlâta rôhnahpa châ tlôh ta.

6 Avâ, avâ zy avâ liana chhao khi ta a tlô leipa châ tlôh ta, ahy e, o a sapa thei aw tly? Kei a hmiakô liata rohpahâhpa rao nawpa tahpa dei leipa ta cha kei baohra heta o ei sapa thei aw ma?

7 Chatanachata Zudah râh nata Zerusale liatahpa zôthaipa zy, ei paw Davi ta a hmâ tyhpa, atahmâ ei hnohta a ypa zy hry liata a hria hra awpa heta chyhsa pakha, ngôh zy, tâkâri zy, dawh zy, thua ta zy a hria thaipa, poh saihdôhpa nata sailawpa zy, a nohpa zy a tao thaipa, ropa kheihawhpa rai a thaipa na vaw tuapa mah y,

8 Lebanaw liatahpa sidy tho zy, meisah tho zy, alaku tho zy chhao na vaw paphao mah y, na chyhsa zy ta Lebanaw liata tho thlu ama thai kaw tahpa pahno tlôh na ta.

9 Chatanachata tho hluhpi nâ chhuahnohpa awpa ta ei chyhsa zy cha na chyhsa zy hry liata a hlao hra ei se, o sa ei chhuahpa he o rôhnah ngaita awpa châ tlôh ta.

10 Na chyhsa tho thlutuhpa zy cha viahdie panuana thy no nata bali sâh panuana thy no nata kresawti rahô thy no nata sathaw rahô thy no ei pie aw,” tahpa ta chyhsa tuah ta.

11 Chatanachata Tyre beipa Hura chata, “ABEIPA ta a chyhsa zy kyh a pachâ vâta ma-a abei ta a cha tao tâh,” tahpa ta, Sawlawmaw cha châ paphaopa ta achhy ta.

12 Hura chata, “ABEIPA Izarel zy Khazohpa, avâ nata alei a taotuhpa, ABEIPA o nata abei o sa awpa ta sona nata novâhna a hneipa sawchapaw so ngaitapa Davi a pietuhpa cha, reithaipa ta y mawh sy.

13 “Chyhsa zôthaipa, sona nata novâhna a hneipa Dana pathla liatahpa chanô pakha sawchapawpa a moh Hurabi ei vaw tuah, a paw cha Tyre khihpa,

14 Ngôh lâ zy, takari lâ zy, thua lâ zy, alô lâ zy, tho lâ zy, poh sailawpa zy, a nohpa zy, lini poh zy, saihdôhpa zy a hria thaipa, ropa kheihawhpa rai chhao a thaipa, thaina to rai a thaipa châ ta, na chyhsa zôthaipa sahlao nata ei zibeipa, na paw Davi zôthaipa sahlao hry liana chata a vaw hria hra aw.

15 Chatanachata sâh zy, bali sâh zy, sathaw zy, kresawti kyh zy ei beipa ta a reipa cha chakaotuhpa zy cha vaw paphao mawh sy;

16 keimo ta Lebanaw liata tho cha na khozie ta thlu aw pi ta, tilaipi lâta Zôpa taihta apâh zy ta cha vaw tôhpa aw pi ta, nâma ta Zerusale lâta na paly aw,” tah ta.

17 Sawlawmaw chata Izarel râh liata a paw Davi ta a vaw rei haw chiehpa pho hropa chyhsa zydua cha reih ta; thy sy kha nata thy pangawh nata sâh thôh nata za charu châ ei ta.

18 Hmo a phaohpa chyhsa thy sari nata tlâh liata tho a thlupa thy charie nata zawpi zy hriana zie a patohpatiatuh awpa sâh thôh nata za charu rao ta.

2 Thâtihzyrona (2 Chronicles)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36

2 Thâtihzy Rona 3

Sawlawmaw ta Abeipa o a sa (1Ab 6:1-38)

1 Chatanachata Sawlawmaw ta Zerusale liata Moria Tlâh a paw Davi hnohta ABEIPA aluahna. Zebu chyhsa Ôrana sawhri, Davi ta vaw taopa ta a chhuahnohna liana chata ABEIPA o cha sa pathao haw ta.

2 A bei kô palih kô, thla nona, noh no liata sa pathao ta.

3 Khazohpa o sana zie awpa Sawlawmaw ta a thliena zie cha he hawhta a châ; a doh lâ cha dy thliena zie parohpa ta dy sycharu châ ta, a hâ lâ cha dy syno a châ.

4 A hmia lâta aikah doh lâ cha o hâ lâ tluta dy syno châ ta; a sâhna lâ cha dy za kha nata syno châ ta. A chô cha ngôh suapa ta pahu ta.

5 Chhôhpadâhpa lai viapa pâhchhô liana cha meisah tho bai ta, cha cha ngôh suapa ta pahu ta, cha liana chata thiahra tho nata balia nohthlahpa tao ta.

6 A pangia nawpa ta o cha lôsôhpa zy ta pangia ta. Ngôh cha Parvai ngôh a châ.

7 O cha khâpia zy, a siphiah zy, pâhchhô zy, a ochhi zy cha ngôh ta pahu ta; pâhchhô zy liana chata cherubi nohthlahpa zy tao ta.

8 Chatawhcha su pathaih chaipa tao ta; a doh lâ cha o hâ lâ tluta a châ hra, dy syno châ ta, a hâ lâ cha dy syno châ ta; ngôh suapa ta pahu ta, talent zacharu tloh ta.

9 A khaipâna a hrina lâ cha ngôh sekel sypangawh a châ. Chatawhcha chhôhpadâhpa chô chaipa zy cha ngôh ta pahu ta.

10 Su pathaih chaipa liana chata cherubi nohthlahpa miano tao ta, chazy cha ngôh ta pahu ta.

11 Cherubi mathlaw zy chata dy syno pha ta; cherubi miakha mathlaw cha dy pangawh châ ta, pâhchhô kei tlô ta, a mathlaw hiakha lâ chhao cha dy pangawh châ hra ta, cherubi miakhapa mathlaw cha, kei pha ta;

12 cherubi miakha mathlaw chhao cha dy pangawh châ ta, pâhchhô cha kei tlô ta, a mathlaw hiakha lâ cha dy pangawh châ hra ta, cherubi miakhapa mathlaw cha kei pha ta.

13 Cha cherubi zy chata dy syno a phapa ta ama mathlaw pakai ei ta; ama phei ta aduah ei ta, o chhôh lâ a heihpa ta a duah ei ta.

14 Chatawhcha poh rai awpa a nohpa zy, a saihdôhpa zy, a sailawpa zy, lini rih di ngaitapa ta tao ta, cha liana chata cherubi nohthlahpa zy tao ta.

Achhyna-o châta Hura hriana (1Ab 7:8-15-51)

15 A hmialâna chata dy sythôh nata dy pangawh a sâhpa a tôh miano bô ta, cha pawhmao pabyuhpa cha dy pangawh rairieh a châ.

16 Pachhih hawhta bâlia zy tao ta, a tôh pawhmao zy cha chazai ta; pawmikranat za kha tao ta, bâlia zy liana chata bangie ta.

17 Achhyna-o hmia lâna chata a tôh zy cha bô ta, miakha chhôh lâta, miakha maw lâta, chho la tahpa cha Zakhi bi ta, maw lâ tahpa cha Bôaza.

2 Thâtihzyrona (2 Chronicles)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36

2 Thâtihzy Rona 4

1 Dawh maisâh a doh lâ dy syno, a hâ lâ dy syno, a sâhna lâ dy hrawh ta tao hra ta,

2 Dawh rahô laipapi a tlâh nata a tlâh likawh dy hrawh a tlapa, a sâhna lâ dy pangawh tla hra ta, a tlâh cha dy sythôh pahlôpa a châ.

3 A tlâh ry cha pabyuhpa nohthlahpa zy ta a padô ta, dy kha liata miahrawh lymâ, dawh rahôpi a dôpa ta y ta, pabyuhpa nohthlahpa cha tlâh no châ ta, dawh rahôpi leipa ta a châ,

4 cha cha viahchao tôhpa pô hrawhleino chô liata a pahnieh ta, pô thôh maw lâ a heih ta, pô thô notla lâ a heih ta, pô thôh nochhi lâ a heih ta, pô thôh chho lâ a heih ta; dawh rahôpi cha ama chô liana chata a patyuh ta, ama hnoh lâ cha a chhôh lâ a heih ta.

5 Rahôpi cha pazah tie chha ta; a tlâh cha nyu tlâh hawhpa, lili paw hawhta taopa châ ta; bath sâh thôh a tlohpa a châ.

6 A si nawpa ta rahô miahrawh tao hra ta, chachâh lâchhâh ta mia pangawh patyuh ta, chavei lâchhâh ta mia pangawh patyuh ta. Chazy cha raopa hlâna pasina awpa châ ta, dawh rahôpi deikua cha theihthaipa zy a si nawpa a châ.

7 Chatawhcha a taona zie awpa ta raopa hawhta ngôh meiôh sona miahrawh tao ta, achhyna-o chhôh liana chata chho lâchhâh ta miapangawh, maw lâchhâh ta miapangawh soh ta.

8 Tlâhkhai miahrawh tao hra ta, achhyna-o chhôh liata chho lâchhâh ta miapangawh, maw lâchhâh ta miapangawh soh ta. Chatawhcha ngôh rahô za kha tao ta.

9 Chazy leipa chhao cha theihthaipa sahlao tlyhmia nata tlyhmia kawhpa zy cha dô ta, tlyhmia ochhi zy tao ta, dawh ta pahu ta;

10 rahôpi cha o chachâh lâchhâh liata, nochhi lâta chho lâ heih ta patyuh ta.

11 Hura chata bei zy, buhchâh lina zy, rahô zy tao ta. Chatanachata Khazohpa o châta Abei Sawlawmaw a taopapa cha Hura chata paloh haw ta;

12 a tôh miano zy, beih hawhta a byuhpa zy, otôh pawhmao liata beih hawhta a byuhpa miano pahlyna a chapaicharupa miano zy;

13 cha pahlyna a chapaicharupa miano chata pawmikranat za palih zy, a tôh pawhmao liata beih hawhta a byuhpa miano pahlyna awpa a chapaicharu rairiehpa chata pawmikranat tlâh no zy.

14 Patyuna zy, patuna chô liata beih zy chhao tao ta,

15 rahôpi miakha nata a ry liata viahchao tôhpa pô hrawhleino chhao.

16 Beih zy, buhchâh lina zy, sa thaona zy nata a hmobaoh zydua chhao cha Hura chata ABEIPA o châta dawh pathliepa ta Abei Sawlawmaw taopa ta.

17 Chazy cha Zawdah bypi liata Sukô nata Zeredah beilei su liata abeipa châta leih ta.

18 Cha hawhna chata Sawlawmaw ta hmobaoh hlupi tao ta, dawh cha kho pathliah tiah awpa châ vei.

19 Sawlawmaw chata Khazohpa o liata hmobaoh a ypa zydua cha tao ta; ngôh rahô zy, viahchhâ sona tlâhkhai zy,

20 raopa hawhta su pathaihpa hmiakô liata pakhaih awpa meiôh sona zy, a meiôh chhaota ngôh suapa ta tao ta;

21 pawpi zy, meiôh zy nata chaikie zy cha ngôh, ngôh suapa ta tao ta;

22 meiôh poh chakiena zy, rahô zy, phiathla zy, mei lana zy cha ngôh suapa châ hra ta; o chhôh a ngiana o chhôh a chhôh lâ viapa su pathaih chaipa ochhi zy nata a o achhyna-o ochhizy cha ngôh ta tao ta.

2 Thâtihzyrona (2 Chronicles)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36

2 Thâtihzy Rona 5

1 Chatanachata Sawlawmaw ta ABEIPA o châta a sapa zydua cha paloh khai ta. Sawlawmaw cha a paw Davi ta hmo a vaw hlâ hawpa zydua cha a ngiakhei ta, tâkâri zy, ngôh zy, chhaichhi zydua cha Khazohpa o liata ryu sona liata soh haw ta.

Achhyna-o liata Abeipa Byh Sawlawmaw ta a soh (1Ab 8:1-11)

2 Chatanachata Sawlawmaw chata Izarel machâ sahlao zy, ama pho pawhrâhpa Izarel pathla sahlao chhôhkha pawhrâhpa zydua, cha Davi khihpa Zaio tawhtapa ABEIPA Biehraina Byh a sy awpa ta Zerusale liata pakhy ta.

3 Izarel chyhsa zydua cha thla sarina liata kyhchhi liana chata abeipa lâta a pakhy ei ta.

4 Izarel machâ sahlao zydua cha a vy ei ta, Livai mozy chata Byh cha a sy ei ta

5 ABEIPA Byh nata achhyna poh-o nata poh-o liata hmobaoh pathaihpa zydua cha a sy ei ta; chazy cha theihthaipa Livai mozy chata a sy ei ta.

6 Chatawhcha Abei Sawlawmaw nata Izarel sahlao ahmaohpakhypa zydua ano lâta a vaw pakhypa zy cha Byh hmiakô liata hmaohkha ta y ei ta, mietahkupa nata viahchao tôhpa a hluh ngaitapa, a hluh zie reih thei leipa nata rei tiah lei ta atheih ei ta.

7 Chatanachata theihthaipa zy chata ABEIPA Biehraina Byh cha a yna awpa lâta a ngiakhei ei ta, o chhôh liata achhyna su, su pathaih chaipa liata cherubi zy mathlaw ry liana chata.

8 Cherubi zy chata Byh yna chô dady liana chata ama mathlaw pakai thlâh ha ei ta, cherubi zy chata Byh nata a lâ zy cha khu khai ei ta.

9 Chatawhcha a lâzy cha seih kaw ta, a lâ pawhmao zy cha achhyna su hmiakô su pathaihpa tawhna chata hmô theipa châ ta; anodeikuacha khôtho lâ cha a lâ vei; atanoh taihta cha liana chata a y thlâh haw.

10 Izi tawhta puapa ta ABEIPA ta Izarel pathlazy hnohta bie a hraih no ta, Mawsi ta Hôriba liata alôphiapa miano a sopa dei leipa khata cha cha Byh chhôh liana chata khâpa hropa hmah y vei.

11 Chatawhcha theihthaipa sahlao zy cha su pathaihpa tawhta ama vaw pua pata nahta theihthaipa a ypa sahlao zydua cha a pathai ei ta, a py ta a tao hlei leipa ei ta;

12 Livai sahlao hla satuhpa zydua chhao ama zydua ta Asapha zy, Hima zy, Zeduthu zy ama sawchapawpa zy nata ama unawhpa zy chhao lini poh rihdipa ta a tobipa ta, paotlâ zy, tlaipi zy, totâ zy chhaota maisâh nochhi lâchhâh liata aduah ei ta, ama hry liana chata (theihthaipa za kha nata syno chiahmie tôpa ta y hra ei ta;

13 chiahmie a tôtuhpa zy nata hla satuhpa zy ta ABEIPA reithaina nata alyna bie rei nawpa ta ama tôpa cha miakha paropa hawh tlaita theipa châ ta), chiahmie nata paotlâ nata a paropa tôpa pyu nata ama ao papuapa ta, “Ano cha, pha tlôh ta, a zawngiahna cha chhâzaw ta a y aw, ”tahpa ta, ABEIPA ama reithai nahta ABEIPA o cha ameih ta bie haw ta,

14 chatanachata ameih vâna chata theithaipa zy chata chakao thei leina taihta y ei ta; ABEIPA rôhnahna ta Khazohpa o cha bie khai ha tlôh ta.

2 Thâtihzyrona (2 Chronicles)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36

2 Thâtihzy Rona 6

Achhyna-o hlâna (1Ab 8:12-66)

1 Chatanachata Sawlawmaw ta bie reih ta, “ABEIPA ta zohkaluhpa liata ei y aw, tah ta.

2 Châhrasala na pahrâ nawpa o chhâzaw ta na yna awpa cha ei cha sapa haw hih, tahpata.

3 Chatawhcha abei cha a vaw heih ta Izarel sahlao ahmaohpakhypa zydua cha byhnâ aw pata. Izarel sahlao ahmaohpakhypa zydua cha a duah khai ei ta.

4 Ano chata, “ABEIPA Izarel zy Khazohpa ei paw Davi hnohta ano pakah tlaita, ‘Izi râh tawhta ei chyhsa Izarel zy ei chhi no tawhta,

5 Izarel sahlao pho hry liata khataih khih liata hmahta ei mo yna awpa o sa nawpa ta a tly beih leipa na ta, ei chyhsa Izarel zy chô liata hyutuhpa awpa chyhsa ahyhmah a tlyh beih hra va na;

6 anodeikuacha ei moh yna awpa ta Zerusale he a tlyh haw na ta, ei chyhsa Izarel zy hyutuhpa châta Davi he ei tlyh haw,’ tahpa ta a vaw reihtuhpa, ano ku tlaita pi a patlohtuhpa he reithaipa ta y mawh sy.

7 Ei paw Davi khata Izarel zy Khazohpa ABEIPA moh châta o sa a chhuah tyh ta.

8 Châhrasala ABEIPA ta ei paw Davi hnohta, ‘Ei moh chata o sa a chhuah tyh chi ta, he hawhpa palôhrupa na phaohpa he a pha na;

9 anodeikuacha nâma ta la o cha sa leipa aw chi ta, na sawchapawpa na sa awpa chata ei moh châta o tlao a sa aw,’ tah haw ta.

10 ABEIPA ta a bie reipa cha vaw patlô haw ta; ABEIPA a vaw taih hawpa hawh tlaita, ei paw Davi su cha vaw to na ta, Izarel abeidyuchhai liana chata atyuh na ta, Izarel zy Khazohpa moh chata o cha ei vaw sa haw.

11 Cha liana chata Izarel pathlazy hnohta a vaw hraipa ABEIPA Biehraina Byh cha ei soh haw,” tah ta.

12 Sawlawmaw cha ABEIPA maisâh liata Izarel ahmaohpakhypa zydua hmôna liata a duah ta, a bâh pazawh ta.

13 Sawlawmaw ta dawh tlâhkhai a seihna lâ dy pangawh, a kawhna lâ dy pangawh, a sâhna lâ dy thôh ta a taopa, achhyna-o tlyhmia liata a patyuhpa liana chata a duah ta. Izarel pôhpakhypa sahlao zydua hmiakô liana chata a pakhu paneih ta, avâ lâ aheihpa ta a bâh pazawh ta;

14 Hy ABEIPA Izarel zy Khazohpa y, alei nata avâ liata nâma hawhpa rai Khazohpa y veih ei, ama pathipalôh zydua ta na lâpi a chhituhpa, na chakaotuhpa zy chô liana chata bietai patlôpa ta ngiachhie tyh chi ta;

15 na chakaotuhpa ei paw Davi hnohta, na bietai cha patlô chi ta, chatatlyh, na pakah ta na rei hawpa cha atanoh liana heta na ku ta hlao patlohsa haw chi ta.

16 Chatanachata hy ABEIPA Izarel zy Khazohpa y, na chakaotuhpa ei paw Davi hnohta, ‘Na pathlazy cha na ypâpa hawhta y hra awpa ta, ama yzie liata amâ sohsi khiahtala, ei mohmô liata Izarel zy abeidyuchhai liata atyuh awpa cha chhâ aw veih ei’, tahpa ta bie nâ taih hawpa kha patlô mah y.

17 ABEIPA Izarel zy Khazohpa y, na chakaotuhpa Davi hnohta bie na reipa cha hlao patlohsa tlai mah y.

18 “Anodeikuacha Khazohpa cha alei liana heta chyhsapa hry liata a pahrâ tlai aw ma? Avâ, avâ zy avâ liata chhao nâ tlôh leipa châ ta; he ei o sapa liana heta nâ tlôh lei pachai aw dia!

19 Châhrasala hy ABEIPA ei Khazohpa y, na chakaotuhpa ta a cha padona nata a thlahchhâna he nahthliepa ta, na chakaotuhpa thlahchhâna nata hiana he vaw nahthlie mah y;

20 he su lâ a heihpa ta na chakaotuhpa ta a thlahchhâna cha nahthliepa ta, cha liana chata ei moh a y aw, na tahna su tlai o lâna heta chhô nata zâ ta, na mo na khaih thlâh ha thei nawpa ta.

21 Na chakaotuhpa nata na chyhsa Izarel zy heta, he su lâ a heihpa ta thlah ama chhâ tita ama hiana zy vaw nahthlie tyh mah y: na pahrâna su avâ tawhta vaw nahthlie la; a ngiahthai mah y.

22 “Chyhsa ahyrai ta a vaihzy chô liata hmoparaopa ta chhie pasasana taih vaw byuh sala, he o liata na maisâh hmiakô liana heta chhie sa sala.

23 nâma ta avâ tawhta vaw nahthlie la, moleipa cha a moleina ty ta thai lei pachâsapa ta chyhsa siapa cha a siana ty ta thai pachâsapa ta na chakaotuhpa zy ryureipa mah y.

24 “Na chyhsa Izarel zy heta na chô liata hmo ama paraopa vâta khakhaipa zy liata nawh ei ta, nâ lâta a vaw heih heihpa ta, na moh a chakheipa ta he o liata thlahchhâpa ta hmo ama cha vaw hiah khiahtala,

25 nâma ta avâ tawhta vaw nahthlie la, na chyhsa Izarel zy moleina cha a ngiahthai la, âmo nata ama mahpaw zy na piepa râh lâna chata a chhi heih mah y.

26 “Na chô liata hmo ama paraopa vâta avâ a khawpa ta, vâsua zy y leipa ta, he su lâ a heihpa ta thlahchhâpa ta na moh padopa ta âmo rie na patheipa vâta ama moleipa zy ama ro khiahtala,

27 nâma ta avâ tawhta vaw nahthlie la, ama siena awpa lâpi phapa pahmôpa ta na chakaotuhpa zy nata na chyhsa Izarel zy moleina he a ngiahthaipa ta; na chyhsa zy ama ryuto châta na piepa na râh liana heta avâ pasuasa mah y.

28 “Eima râh liana heta chakâhna zy vaw tlôpa ta hrizy chareipa ta, chawhkaraina tlyma, hmyna tlyma, khawsu tlyma, chângyu tlyma vaw ypa ta; ama khakhaipa zy ta ama khihzy padopa ta; hri kheihawhpa rai, pasana kheihawhpa rai a vaw tlô khiahtala,

29 ama hri-ohpa tlyma, ama pachârôhna tlyma a pahnopa maihta, he o lâ a heihpa ta bâh pazawhpa ta, mo pakha tlyma, Izarel zawpi sahlao ta tlyma thlahchhâna nata hiana ama vaw tlôkheipa cha;

30 na pahrâna su avâ tawhta vaw nahthlie la, a ngiahthai la, chyhsa to ama yzie hawh chyuta hlao patlohsa mah y; ama pathipalôh pahno chyu tlôh chi ta, (nâma deita he chyhsa sawzy pathipalôh a pahnotuhpa châ tlôh chi ta);

31 eima mahpaw zy na piepa râh liata ama pahrâ chhôh zydua ta na lâpi a chhih thei nawpa ta ama cha chi nawpa ta.

32 “Cha hawhna hra chata na chyhsa Izarel zy a châ leipa pho hropa chyhsa, na moh rôhnah ngaitapa nata na ku thatlô ngaitapa nata na bâh pazawhpa vâta râh hlapi tawhtapa a vypa ta, he o lâ aheihpa ta, thlah ama vaw chhâ tita,

33 nâma ta na pahrâna avâ tawhta vaw nahthlie la, pho hropa zy chhao ama cha padona zie lymâ hawhta ama chô liata tao mah y; chatanachata na chyhsa Izarelzy hawh hra ta khizaw liata pho to ta na moh pahno aw ei ta, cha chi aw ei ta, he o ei sapa heta na moh a phaoh tahpa ama pahno aw.

34 “Na chyhsa zy ta ama khakhaipa zy cha na tuana lâ maihta adyuhpa ta, na khihpi atlypa nata na moh châta o ei sapa lâ aheihpa ta nâ lâta thlah ama chhâ khiahtala,

35 nâma ta ama thlahchhâna nata ama hiana cha avâ tawhta vaw nahthlie la, âmo kyh liana chata bao lymâ mah y.

36 “Na chô liana chata hmo paraopa ta, (ahyhma molei leipa y tlôh lei khâh ei ta,) ama chô liata na pathi-iapa ta, khakhaipa ku liata piepa ta, râh hlapi lâta tlyma, a hnia viapa lâta tlyma, sei ta chhihthapa ta tlyma rai ta;

37 sei ta ama chhina râh liata a pahnopa ta angiapachhipa ta, ‘Molei haw pi ta, a do lei ngaitapa nata molei ngaitapa ta hmo eima vaw tao haw,’ tahpa ta;

38 ama tâhna râh liata hiana vaw tlôkheipa ta, seichâna ta a chhituhpa zy chata amâ chhipa amâ tâhna râh liata ama pathipalôh hmeihseihpa nata ama palôhrupa hmeihseihpa ta nâma lâ aheihpa ta, ama mahpaw zy râh lâ nata khihpi atlypa nata na moh châta o ei sapa lâ aheihpa ta nâ lâta thlah ama chhâ khiahtala,

39 ama thlahchhâna nata ama hiana cha nâma ta na pahrâna su avâ tawhta vaw nahthlie la, ama kyh liana chata bao lymâ la, na chô liata a vaw molei hawpa na chyhsa zy cha a ngiahthai mah y.

40 Hy ei Khazohpa y, ngiachhiepa ta na mo vaw padeih la, he su liata thlahchhâna liana heta na nah vaw pachôh mah y.

41 “Hy ABEIPA Khazohpa y, na pahrâna su liana chata kiah teh,nâma nata na thatlôna Byh chhaota. Hy ABEIPA Khazohpa y,na theihthaipa zy cha pachhana ta tobi la, na mopathaihpa zy cha phana ta tha papha teh.

42 Hy ABEIPA Khazohpa y, na sathaw thupa hmia cha hnoh lâ paheisa kha la! Na chakaotuhpa Davi hmo pha taopa zy cha a thei thlâh ha mah y, 'tah ta.

2 Thâtihzyrona (2 Chronicles)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36

2 Thâtihzy Rona 7

1 Sawlawmaw ta thlah a chhâ khai nahta, avâ tawhta mei za tla ta, raopa hiana nata atheihna zy cha kâ khai ha ta, ABEIPA rôhnahna ta o cha bie haw ta.

2 ABEIPA rôhnahna ta ABEIPA o cha a pabiepa vâta ABEIPA o liana chata theihthaipa zy cha a ngia thei khao leipa ei ta.

3 Izarel pathla zydua chata avâ tawhta mei a za tlapa nata o chô liata ABEIPA rôhnahna cha moh thlâh ha ei ta, alô paraihpa chô liana chata ama hmia alei lâ a khupa ta abyuh thlâh ha ei ta, Ano cha pha tlôh ta, a zawngiahna cha chhâzaw ta a y aw, ”tahpa ta ABEIPA cha a chhy ei ta, alyna bie reih ei ta.

4 Chatanachata abeipa nata zawpi zy chata ABEIPA hmiakô liata atheihna zy hlâ ei ta.

5 Abei Sawlawmaw chata atheihna viahchao tôhpa thy no nata sâh no nata mietahkupa thy sy kha nata thy no hlâ ta. Cha hawhna chata abeipa nata zawpi zy chata Khazohpa o cha hlâ ei ta.

6 Theihthaipa zy cha ama su chyu liata aduah ei ta. Livai sahlao zy chhao cha ABEIPA lâta alyna bie rei nawpa ta hla phipa, ‘A zawngiahna cha chhâzaw ta a y aw,’ tahpa ABEIPA reithai nawpa ta Abei Davi ta a hmâ tyhpa nata hla sapa ta aduah hra ei ta; ama hmialâ theihthaipa zy chata chiahmie tô ei ta, Izarel mo zydua cha aduah ei ta

7 Sawlawmaw chata ABEIPA o dady ta dôhpachhôh tlyhmia cha pathaisa hra ta; cha liana chata raopa hlana zy, adyhna hiana thawzy hlâ ta; Sawlawmaw dawh maisâh taopa cha raopa hlana zy, niepa hlana zy, thaw zy hlâ nawpa ta a chyh tupa vâta.

8 Cha nona chata Sawlawmaw nata Izarel chyhsa zydua zawpi pôhpakhypa hluh ngaitapa cha Hama khih angiana tawhta Izi râh chavah taihta chyhsa zy chhao ta noh sari kyhchhi tao ei ta.

9 noh charie noh chata pakhyna rôhnah ngaitapa hnei ei ta, maisâh alyna châta noh sari hmâh ei ta, kyhchhi noh châta noh sari ama hmâh,

10 Thla sarina noh syno nata noh thôh noh chata zawpi zy cha padisa ta, ABEIPA ta Davi nata Sawlawmaw nata a chyhsa Izarel zy chô liata a phana a paluahsapa vâna chata thapha ngaitapa nata aly ngaitapa ta.

Sawlawmaw hnohta Abeipa aluahna ei nona(1 Ab 9: 1-9)

11 Cha hawhna chata Sawlawmaw ta ABEIPA o nata abei o cha paloh haw ta; Sawlawmaw chata a palôhrupa ta a chhuahpa hawh tlai ta ABEIPA o chhôh liata nata ano o chhôh liata a phapa ta paloh haw ta.

12 Chatawhcha zâ ta Sawlawmaw hnohta ABEIPA a vaw luah ta, a hnohta, “Na thlahchhâna cha thei na ta, he su he ei châta atheihna o ta ei rao haw.

13 Avâ zy ei khaw nahta vâsua zy a suah vei tlyma, khawsu zy ei tuah nahta lyurâh zy a parao tlyma, ei chyhsa zy liata hri ei chareisa tlyma,

14 ei moh a phaohpa chyhsa zy chata a panawhsapa ta thlahchhâpa ta eina tlua nahta, ama yzie moleipa zy cha amâ heisai khiahtala avâ tawhta vaw nahthlie aw na ta, ama moleizy angiahthai aw na ta, ama râh cha ei patlâh heih aw.

15 He su liata thlahchhâna he ei mo ta tawpâ aw na ta, ei nah ei pachôh aw.

16 Cha liana chata ei mo chhâzaw ta a y thei nawpa ta he o he rao na ta, ei pathaisa haw; cha liana chata ei mokhaoh nata ei pathipalôh chhâzaw ta a y ha aw.

17 Chatawhcha nâma kyh liata chhao, na paw Davi hawhta ei mohmô liata ypa ta, bie ei cha piepa lymâ hawhta ypa ta, ei bieraopa zy nata ei pachiapa zy nâ pyh khiahtala,

18 ‘Izarel zy hry liata ryureituhpa chhâ aw veih ei,’ tahpa ta na paw Davi hnohta bie ei hraihpa hawhna khata na khihnarâh abeidyuchhai ei pa-i aw.

19 “Anodeikuacha nama hmiakô liata ei taopa, ei ryhpa zy nata ei biepiepa zy a heisaipa ta, khazoh hropa zy chakaopa ta namâ chhy khiahtala,

20 âmo ei piepa râh tawhtapa he cha pahleipadia khai aw ei na ta; he o ei moh châta ei pathaisa chiehpa he, ei hmô pha leina lâta pasie syulyu aw na ta, pho to hry ta taolana nata a chhiena lâta pakhona ta ei tao aw.

21 Chatawhcha he o pasâhsa ngaitapa he a kiapâh liata a siepa maihta noâh tah aw ei ta, ‘Khazia he râh nata he o he ABEIPA ta he hawhta a tao?’ tah aw ei ta.

22 ABEIPA ama mahpaw zy Khazohpa, Izi râh tawhta a chhihthatuhpa cha a heisaipa ta, khazoh hropa zy patu ei ta, a chhy ei ta, ama chakaopa vâta; he raona zy he ama chô liata a patlôsa hih,’ ama tah aw,” tah ta.

2 Thâtihzyrona (2 Chronicles)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36

2 Thâtihzy Rona 8

Sawlawmaw raihriana hropazy (1Ab 9:10-28)

1 Sawlawmaw ta ABEIPA o nata ano o a sa chhôh kô syno a vaw chhâ nah ta,

2 Hura ta Sawlawmaw khih a piepa zy cha Sawlawmaw chata sa ta, Izarel pathlazy paysa ta.

3 Sawlawmaw chata Hamazôba adyuh ta, pahnie ta.

4 Râhpathohpa liata Tamô sa ta, Hama liata hmobaoh sona khihzy chhaota.

5 Behôrô machhua lâtahpa nata mathi lâtahpa chhao kuh zy, ochhi zy, a hraina zy a hneipa ta sa hra ta.

6 Balatha khih zy, a hmobaoh sona khih zydua zy, a talaili sona khih zy, a arâ a kiahpa chyhsa zy yna khih zy, Zerusale nata Lebanaw nata a râh chhôh zydua liata Sawlawmaw chata a khopa hawhta sa ta.

7 Izarelzy pathlazy a châ leipa, Hiti mozy, Amawri mozy, Periza mozy, Zebu mozy pathla,

8 Izarel pathlazy ta ama pahleipadia leipa, cha râh liata a ypa zy cha Sawlawmaw ta chakaotuhpa raihriapa châta a hmâpa py ta tao ta, atanoh taihna heta.

9 Izarel pathlazy deikua cha Sawlawmaw ta a raihriatuhpa chakaotuhpa châta tao leipa ta; adyuhpa chyhsa zy, a pheisaih hyutuhpa zy, pawhrâhpa zy, a talaili nata a arâ kiahpa hyutuhpa zy tlao châ ei ta.

10 Chazy cha zawpi zy a vaihtuhpa abei Sawlawmaw pawhrâh chaipa zy châ ei ta, za no nata sypangawh ama châ.

11 Sawlawmaw chata Phirao sawchanônô cha Davi khihpi tawhtapa ano chata o a sapa lâna chata kaw chhihtha ta, “Ei lahpinô cha Izarel abei Davi o liana chata a y awpa châ vei, ABEIPA Byh vaw tlôna suzy cha pathaipa a châ,” tah ta.

12 Chatanachata Sawlawmaw chata aikah o hmia lâta a taopa ABEIPA maisâh liana chata ABEIPA chata raopa hlânazy hlâ ta,

13 Mawsi biepiepa nohchareih châta taipa lymâ hawhta pahânoh liata zy, thla thiehpa noh liata zy, kyhchhi raopa kô kha liata ei thôh, viahchhâ thinô pahlao leipa kyhchhi liata zy, noh sari kyhchhi liata zy, byureih kyhchhi liata zy.

14 A paw Davi a vaw raopa hawhna khata, theihthaipa sahlaozy nata Livai sahlaozy cha ama tovyuh chyu liata nohchareih hria byunazie lymâ hawhta a reithai awpa zy, theihthaipa zy hmiakô liata chakao awpa zy ta rao ta, ochhi to liata a hlao hlao ta a vaihtuhpa zy rao hra ta; cha hawhna chata Khazohpa chyhsa Davi chata a vaw rao.

15 Abeipa ta theihthaipa sahlao zy, Livai sahlao zy bie a piepa cha khâpa kyh liata hmahta, sôh kyh liata zy chhao, a papeisa leipa ta y beih leipa ei ta.

16 ABEIPA o ama sa pathao tawhta ama palohna taihta Sawlawmaw a chhuahnohpa hawh tlaita a châ. Chatanachata ABEIPA o cha patlôpa ta châ haw ta.

17 Sawlawmaw cha Edôma râh liata tilaipi kiah liata Eziôkeba liata nata Elô lâta sie ta.

18 Hura chata a chakaotuhpa tilaipi yzie a pahnotuhpa balyh zy nata pasiesa ta, Sawlawmaw chakaotuhpa zy chhaota Ôphira lâ sie ei ta, cha liatahpa cha ngôh talent za palih nata sypangawh vaw phaoh ei ta, Abei Sawlawmaw lâta vaw tlôkhei ei ta.

2 Thâtihzyrona (2 Chronicles)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36

2 Thâtihzy Rona 9

Sheba Beinô ta Sawlawmaw a tly (1Ab 10:1-13)

1 Sawlawmaw moh pathâh zie Sheba beinô ta a vaw thei nahta Sawlawmaw cha bie khia ngaitapa ta pasia a chhuahpa ta, zituhpa hluhpi a chhipa ta, râraoseihpa zy ta khâpa leipa rohpahâhpa zy nata ngôh hluhpi nata lôsôhpa zy phaohpa ta Zerusale lâ sie ta. Sawlawmaw lâta a kei tlô nata a palôhrupa liata a ypa zydua papua khaipa ta bie a chho ta.

2 Sawlawmaw chata a bie hiahripa zydua cha a chhy khai ta; Sawlawmaw chata a chhy thei leipa rai y leipa ta.

3 Sawlawmaw sozie zy, o sapa zy,

4 a tlâhkhai liata niepa zy, a pawhrâhpa sahlao atyunazie zy, a chakaotuhpa sahlao chakaona zie zy, amâ tobinazie zy, a nyu a pietuhpa zy nata ama tobizie zy, ABEIPA o lâta a khyna zy, Sheba beinô ta a hmô nata pachâna pahno khao leipa ta.

5 Ano chata abeipa hnohta, “Na hmotaopa zy nata na sozie a pathâhpa ei râh liata ei vaw theipa cha a do chaimâh na,

6 châhrasala keima moh tlaita ei cha vaw hmô hlâta cha ama reipa dei cha zo tyh leipa na ta; na sona rôhnah zie khophie chhao na vaw chho veih ei; na moh pathâhpa ei vaw theina zie cha khô syulyu chi ta.

7 Na chyhsa zy cha nohhlaopa ta, he na chakaotuhpa zy na kiapâh liata a y tyhpa, na sona bie a nahthlie tyhpa zy he ama nohhlao kaw dia!

8 ABEIPA na Khazohpa na chô liata a lypa ano abei chata a abeidyuchhai liata cha patyusatuhpa, ABEIPA na Khazohpa cha reithaipa ta y mawh sy! Na Khazohpa ta Izarel sahlao he chhâzaw ta pa-i awpa ta a kyh pachâ ta, chavâta ryureina nata sona kyh tao awpa ta ano abei ta a cha tao hih,” tah ta.

9 Chatanachata abeipa cha ngôh talent za kha nata syno nata khâpa leipa rohpahâhpa hluhpi nata lôsôhpazy pie ta: Sheba beinô ta Abei Sawlawmaw khâpa leipa rohpahâhpa a piepa hawhpa rai y vei.

10 Sawlawmaw chakaotuhpa zy nata Hura chakaotuhpa Ôphira tawhta ngôh a vaw phaotuhpa zy chhao chata algum tho nata lôsôhpa zy vaw phaoh ei ta.

11 Chatawhcha abeipa chata algum tho cha ABEIPA o nata abei o dôh nawpa nata hla satuhpa zy chata totâ nata tlaipi ta tao ta; cha hawhpa cha Zudah râh liata, cha hlâta cha hmô beih veih ei.

12 Sheba beinô ta hmo piepa rei leipa ta Abei Sawlawmaw chata a khôpa maih pie hra ta. Chatanachata a râh lâta a sahlaozy chhaota kua haw ei ta.

Sawlawmaw hneirôna nata mohpathâhna(1 Ab 10: 14-39; 2 Tr 1: 14-17)

13 Chyhsa a pahlaopa sahlao nata sôhdaopa sahlaozy ama vaw ngiakheipa rei leipa ta, Sawlawmaw liata kô kha chhôhta ngôh a vaw ngiapa a hrina lâ cha ngôh talent za charu nata sycharu nata miacharu a châ,

14 Arabia bei zydua nata râh a vaotuhpa zy chata Sawlawmaw lâta ngôh zy, tâkâri zy vaw cheih tyh ei ta.

15 Abei Sawlawmaw chata ngôh paphiapa ta vyhphao laipa za no tao ta, vyhphao laipa miakha ta ngôh sekel za charu khô ta,

16 Chatawhcha ngôh paphiapa vyhphao za thôh tao ta; vyhphao miakha ta ngôh sekel za thôh khô ta; chazy cha Lebanaw thothi o liata soh ta.

17 Abeipa chata sianaoh abeidyuchhai rôhnah ngaitapa tao hra ta, ngôhsuapa ta pahu ta.

18 Abeidyuchhai liana chata a kiana chhâh charu zy, abeidyuchhai nata a pazaopa ngôh phei tlyna zy dyuchhai kâ lâ rairieh liata a tôh pahniehna zy, a tôh pahniehna kiapâh liata a duahpa chakeibarôhneipa nohthlahpa miano zy y ta,

19 kiana chhâh charu a kâ lâ rairieh chô liata chakeibarôhneipa pô hrawhleino a duah ta. Cha hawhpa cha khataih râh liata hmahta tao beih vei ei.

20 Abei Sawlawmaw nyu zydua cha ngôh sai châ ta, Lebanaw thothi o liata hmobaoh zydua chhao ngôhsuapa sai châ ta; Sawlawmaw hro chhôhta tâkâri cha khâpa ta hmah a ngiah veih ei.

21 Abeipa chata balyh zy, Hura chakaotuhpa zy Tasi lâ sie tyhpa a kaolâhpa hnei ta; kô thôh padai lymâ ta Tasi balyh zy chata ngôh zy, tâkâri zy, sianaoh zy, veituh zy, pivaw zy vaw phao tyh ta.

22 Cha hawhna chata Abei Salawmaw chata khizaw abei zydua cha hneirôna liata nata sona liata khô khai ta.

23 Khazohpa chata a pathipalôh liata a sopa a sona kyh cha nahthlie awpa ta khizaw abei zydua chata Sawlawmaw cha thata vaw pangai tyh ei ta.

24 Kô chareih piena daihti hneipa ta, tâkâri hmobaoh zy, ngôh hmobaoh zy, poh zy, chariah chhaichhi zy, khâpa leipa rohpahâhpa zy, arâ zy, sabaitu zy vaw pie chyu tyh ei ta.

25 Sawlawmaw chata arâ nata talaili sona su sâh palih hnei ta, arâ a kiapa thy kha nata sâh no hnei ta, chazy cha talaili sona khih liata zy, Zerusale liata abei hnohta zy paysa ta.

26 Euphrate tawhta Philistina nata Izi râh taihta abei zydua chô liata a bei ta.

27 Chatawhcha abeipa chata Zerusale liana chata a hluh ngaitapa vâta tâkâri zy cha alô hawhta pachâna taihta paysa ta, sidy tho zy cha bypi liata theiku tho hawh deita ta pachâna taihta pa ysa ta.

28 Sawlawmaw chata arâ zy, Izi râh tawhta zy nata râh to tawhta zy vaw cheih tyh ei ta.

Sawlawmaw thina (1Ab 11:41-43)

29 Sawlawmaw thâtih hropa zy cha â thaona tawhta a chhâna taihta, hrohsopa Natha châbu liata zy, Shilôh chyhsa Ahizah chhochhieliena châbu liata zy, Neba sawchapawpa Zerôbaw kyh liata hrohsopa Idô aluahna châbu liata zy ropa ta châ vei ma?

30 Sawlawmaw cha Zerusale liata Izarel chyhsa zydua chô liata kô sypalih a bei ta.

31 Sawlawmaw cha a mahpaw zy hnohta a mô ta, a paw Davi khih liata pabu ei ta, ano vyuhpa ta a sawchapawpa Rehôbaw a bei haw ta.

2 Thâtihzyrona (2 Chronicles)

Bo 1	Bo 2	Bo 3	Bo 4	Bo 5	Bo 6	Bo 7	Bo 8	Bo 9	Bo 10
Bo 11	Bo 12	Bo 13	Bo 14	Bo 15	Bo 16	Bo 17	Bo 18	Bo 19	Bo 20
Bo 21	Bo 22	Bo 23	Bo 24	Bo 25	Bo 26	Bo 27	Bo 28	Bo 29	Bo 30
Bo 31	Bo 32	Bo 33	Bo 34	Bo 35	Bo 36