Zôsiah abeina (2Ab 22:1-2)
1 Zôsiah cha a bei tua nota kô chariepa châ ta; Zerusale liata kô kha a bei ta.
2 ABEIPA mohmô liata hmo phapa tao tyh ta, a mahpaw Davi kyh zy a chhi ta, chachâh lâ tlyma, chavei lâ tlyma tleisai leipa ta.
Zôsiah taopathina zy(2Ab 23:4-20)
3 Kô charie a bei tawh chhaota hawtipa ta châ ta, a mahpaw Davi Khazohpa tlua pathao ta; kô hrawhleino a bei kô ta Zudah râh nata Zerusale liata su sâhpa zy, Ashera zy, khazoh nohthlahpa taopa zy, khazoh nohthlahpa leihpa zy pathai pahâ ta.
4 Baal maisâh zy cha a mohmô liata parao ei ta; chazy hlâta a sâhpa nô khazoh nohthlahpa zy cha thlu ta; Ashera zy, khazoh nohthlahpa taopa zy, khazoh nohthlahpa leihpa zy padizao khai ta, âmo lâta atheihtuhpa zy thlâ chô liata hie patla khai ta.
5 Theihthaipa rupa zy cha ama maisâh zy liata rao ta. Zudah râh nata Zerusale cha pathaipahâ ta,
6 Cha hawhna hra chata Manase zy, Ephrai zy, Nathalai khih zy taihta tao khai ta,
7 maisâh zy parao ta Ashera zy, khazoh nohthlahpa taopa zy cha padizao khai ta, Izarel râh zydua liata noh khazoh zy cha nohthlahpa taopa zy cha padizao khai ta, Izarel râh zydua liata noh khazoh zy cha thlu khai ta, Zerusale lâ kua ha ta.
Ryhpa châbu hmôpa a châ(2Ab 22:3-23)
8 Chatawhcha a beina kô hrawhleicharie kô a khihnarâh nata a ozy a pathaipahâ kô liana chata Azaliah sawchapawpa Shaphana zy, khih a vaotuhpa Maasei zy, Zôahaza sawchapawpa chârohtuhpa Zôah zy cha ABEIPA Khazohpa o tao pathi awpa ta tuah ta.
9 Theihthaipa Hilkiah lâta vawh ei ta, ochhivaihtuhpa Livai sahlao ta Manase mozy, Ephrai mozy, Izarel sahlao a laibâpa zy, Zudah mo nata Benzami mozy, Zerusale liata chyhsa zy tawhtapa ama vaw chei pakhypa, Khazohpa o liata ama vaw sopa tâkâ cha pie ei ta.
10 ABEIPA o a satuhpa raihriatuhpa zy pie ei ta; chatawhcha ABEIPA o a satuhpa raihriatuhpa zy chata o a tao pathituhpa zy nata a pangiatuhpa zy pie ei ta.
11 Zudah beizy ta ama vaw parao hawpa o tao pathi nawpa ta alô khaipa zy, a pazaona zy nata a pâkô zy châta tho chalei nawpa ta zôthaipa zy nata o satupa zy cha pie ei ta.
12 Chatawhcha chyhsa zy chata raihria cha ngâchhih ngaitapa ta hria ei ta; ama hyutuhpa raihria a patohpatiatuhpa zy cha Merari sawchapawpa zy hry ta Livai chyhsa Zaha nata Ôbadia zy, Kôha chyhsa sawchapawpa zy hry liatahpa Zekaria nata Meshula zy châ ei ta; Livai chyhsa, mo hropa a to thaipa zydua zy chhaota.
13 A phao ta a phaohpa zy hyutuhpa chhao châ ei ta, raihria to a hriatuhpa zy hria awpa a patohpatiatuhpa ama châ.
14 ABEIPA o liata ama vaw sopa sôh zy ama vaw puakhei nahta theihthaipa Hilkiah chata Mawsi hmâpa ta piepa ABEIPA ryhpa châbu cha hmô ta.
15 Hilkiah chata chârohtuhpa Shaphana hnohta, “ABEIPA o liata ryhpa châbu eima hmô haw,” tah ta. Hilkiah chata châbu cha Shaphana pie ta.
16 Shaphana chata châbu cha abeipa lâta lata vawkhei ta, “Na chakaotuhpa zy tao awpa ta raopa zydua cha tao ei ta,
17 ABEIPA o liata tâkâ a ypa cha thaoh ei ta, hyutuhpa zy nata raihriatuhpa zy cha pie ei ta,” tahpa ta tlôkhei ta.
18 Chârohtuhpa Shaphana chata, “Theihthaipa Hilkiah chata châbu eina pie,” tahpa ta abeipa cha chho hra ta Chatawhcha Shaphana chata abeipa hmiakô liata reih ta.
19 Chatawhcha abeipa ta ryhpa biezy cha a thei nahta a poh hrie ta.
20 Abeipa chata, “Sie ula, ryhpa bie nama hmôna kyh liana heta keima nata Izarel nata Zudah râh liata chyhsa zy chata ABEIPA na kei chhohiapa teh u; eima mahpawzy ta he ryhpa châbu liata ropa hawhna heta ABEIPA bie cha ama vaw pyh leipa vâna heta eima chô liata ABEIPA pathi-iana cha thata vaw châ tlôh ta,” tahpa ta,
21 Hilkiah zy, Shaphana sawchapawpa Ahika zy, Mika sawchapawpa Abadaw zy, châ rohtuhpa Shaphana zy, abei chakaotuhpa Asaiah zy cha bie pie ta.
22 Chatanachata abeipa ta bie a piepa zy nata Hilkiah cha chysia mohôhtuhpa Hasrah sawchapawpa Tikava sawchapawpa Shaluma lahpinô hrohsopa Huldah lâna chata vawh ta, cha kyh liana chata a kei chhohia ei ta, ano cha Zerusale o nona su liata a pahrâpa châ ta.
23 Chatawhcha ano chata ama hnohta, “ABEIPA Izarel zy Khazohpa chata he tana heta a tah ‘Kei lâta cha vaw tuahtuhpa cha chho ula.
24 ABEIPA chata he tana heta a tah, he su nata a chhôh liata a ypa zy chô liana heta hmo pha leipa patlôsa aw na ta, Zudah beipa hmiakô liata ama rei hawpa châbu liata a ropa chhie zydua chhao.
25 Ama ku hmotaopa ta ei pathi ama pa-ia nawpa ta nâ heisai pata khazoh nohthlah hropa zy chata rohpahâhpa ama raopa vâta he râh chô liana heta ei hiehâhna leithapa châ ta, padiapa châ aw vei, tahpa ta.
26 Anodeikuacha ABEIPA a chhohia awpa ta cha vaw tuahtuhpa Zudah beipa hnohna chata he tana heta reih teh u,
27 ABEIPA Izarel zy Khazohpa chata he tana heta a tah, cha biezy na pahnopa chata na pathipalôh a panaipa vâta Khazohpa hmiakô liata a panawh chi ta, he su kyh nata a chhôh liata a ypa zy kyh pahnopa ta ei hmiakô liata a panawh chi ta, na poh hriepa ta, ei hmiakô liata na chapa vâta kei chhaota na bie cha vaw nahthlie na ta.
28 Na mahpaw zy lâta cha pasiesa aw na ta, na thlâ lâta thlahlôh ngaitapa ta sie aw chi ta, he su nata a chhôh liata a ypa zy chô liata ei vaw patlôsa awpa hmo pha leipa zydua cha na mo ta hmô aw vei,’ tahpa ta tah teh u,” tah ta. Chatawhcha abeipa lâta bie cha tlôkhei ei ta.
29 Chatanachata abeipa chata chyhsa tuah ta, Zudah râh nata Zerusale liata machâ zydua cha aw pakhy ta.
30 Chatawhcha abeipa nata Zudah chyhsa zydua theihthaipa nata Livai sahlao zy, zawpi zydua a lai chyh ta ABEIPA o lâ khy ei ta; ABEIPA o liata ama hmôpa biehrai châbu liata bie zydua cha ama nah theina liata reih ta.
31 Chatawhcha abeipa cha a su liata a duah ta, cha châbu liata a rohpa biehrai bie cha pa-i nawpa ta a pathipalôh zydua ta nata a thlahmipa zydua ta ABEIPA zi awpa nata a biepiepa zy, a bie pahnosapa zy, a bieraopa zy a pyh awpa ta ABEIPA hmiakô liana chata bie hraih ei ta.
32 Chatawhcha Zerusale nata Benzami mo zydua cha cha hawhta y awpa ta tahpa châ ta. Zerusale mozy chata Khazohpa, ama mahpaw zy Khazohpa biehraipa hawhna chata tao ei ta.
33 Zôsiah chata Izarel râh ta a pahlypa zydua tawhtapa hmo pasichhihpa zydua cha pahleipadia ta, Izarel râh liata a ypa zydua cha ABEIPA ama Khazohpa chakaosa ta. Chatawhcha a hro chhôh liana chata ABEIPA, ama mahpaw zy Khazohpa ama zipa cha tleisai veih ei.