Senakeri hraona (2Ab 18:13-37; Is 36:1-22)
1 Cha hawhta ngâchhih ngaitapa ta ama tao tawhna chata Asuria beipa Senakeri vaw thyu ta, Zudah râh liana chata a vaw ngia ta, kuh hneipa khihzy cha vaw dôh ta, la a vaw chhuah ta.
2 Senakeri vaw thyu ta, Zerusale a vaw dyuh a chhuah tahpa Hezekiah ta a thei nahta,
3 khih khôtho lâta tizy cha chhie awpa ta a chyhsa laipa zy nata a chyhsa thatlôpa zy cha a chhohia ta; bao ei ta.
4 Chyhsa hluhpi a hmaohpakhy ei ta, ti zydua nata râh chhôh liata a lohpa chavah zy cha pakhâ ei ta, “Asuria beizy cha a vaw ngiapa ta, ti hluhpi khazia e zua ama hnei aw,” tah ei ta.
5 A riah a paphasa ta kuh dôhna zydua cha tao ta, o sâhpa zy sa pathi ta khôtho lâ kuh zy chhao. Davi khih liata Milô cha pa-i ta, chaihrai zy nata vyhphao zy hluhpi tao ta.
6 Chatawhcha adyuhna liata zawpi hyutuhpa zy tao ta, khihpi ochhi su kawhna liata aw pakhy ta,
7 “Thatlô ngaitapa ta riahpha ngaitapa ta y ula, Asuria bei nata a sahlao zy zawpi cha chi leipa ula, palôh duapa ta y hra khah u; keimo chhâh a châpa cha, âmo chhâh a châpa hlâta thatlô viapa châ tlôh ta.
8 Ano chhâh a châpa cha sapa pheisaih châ ei ta; maniah bao awpa nata maniah adyuh awpa keimo chhâh a châpa deikua cha ABEIPA eima Khazohpa châ tlôh ta,” tahpa ta bie reipa cha angiapâ ei ta.
9 Cha hnôh lâna chata Asuria beipa Senakeri chata a pheisaih zy chhaota Lakhi dôh ei ta, Zudah beipa Hezekiah nata Zerusale liata Zudah chyhsa zydua hnohna chata,
10 Asuria beipa Senakeri chata he tana heta a tah, “Zerusale la lei awpa cha khâpa ma nama ngâ na?’
11 Hezekiah chata, “ABEIPA eima Khazohpa ta Asuria beipa ku tawhtapa maniah a pachha aw,” tahpa ta nodipa nata dâhphipa ta nama thi nawpa ta a cha reipasaopa châ vei mâ?
12 Hezekiah he vei ma a su sâhpa zy nata a maisâh zy pachopa ta Zudah chyhsa nata Zerusale liata chyhsa zy hnohta, “Maisâh miakha liata Khazohpa achhy aw eichi ta, rohpahâhpa nama rao aw,” tahpa ta bie a pietuhpa kha?
13 Kei nata ei mahpaw zy ta râh to pho to chô liata eima hmotaopa zy kha pahno veih eichi ma? Khâpa pho khazoh hmahta ei ku tawhtapa ama khihnarâh cha ama pabosapa thei leipa châ vei ma?
14 Ahy pho khazoh ma ei mahpaw zy ta ama pahleipadia, ei ku tawhtapa ama chyhsa zy a pachha thei nawpa cha?
15 Chavâta Hezekiah chata chadô leipa ei sala, cha hawhna chata cha reipasao leipa ei sala, ano cha ngâ khah u; khâpa pho khazoh nata khâpa râh khazoh hmahta ama chyhsa zy ei ku tawhtapa nata ei mahpaw zy ku tawhtapa a pachha theipa y leipa ei ta, kheihta e nama Khazohpa chata ei ku tawhtapa zua a cha pachha aw ei?’ tahpa ta.” Zerusale lâ chyhsa tuah ta.
16 Chatawhcha a chyhsa zy chata cha hlâta tha via ta ABEIPA Khazohpa nata a chakaotuhpa Hezekiah kyh a pha leina lâta reih ei ta.
17 Izarel zy ABEIPA Khazohpa hie pahâhpa nata a reipachhiena zie lâta cha roh hra ta, “Râh to, pho to khazoh zy ta ei ku tawhtapa ama chyhsa zy ama pachha thei leipa hawh hra ta, Hezekiah Khazohpa chhaota ei ku tawhtapa a chyhsa zy pachha chachei ta aw vei,” tahpa ta.
18 Chatawhcha khih cha ama la thei nawpa ta a pahlaw awpa nata nôpapo ngaitapa ta aw sao ei ta.
19 Zerusale Khazohpa cha ku ta taopa, khizaw khazoh hawh deita ta reih ei ta.
20 Chatanachata Abei Hezekiah nata Amôza sawchapawpa hrohsopa Isai chata cha vâna chata thlahchhâ ei ta, avâ liatahpa pado ei ta.
21 ABEIPA ta vâlyuhchâpa tuah ta, cha chata Asuria beipa riehmo liata chyhsa thatlôpa riahphapa zydua zy, hmia a sahtuhpa hyutuhpa zy cha thie ta. Chatanachata noza ngaita hmia phaohpa ta a khihnarâh lâta kua haw ta. Chatawhcha a khazoh o lâta a vawpa cha ano saw sapa zy tlaita zaozi ta vaw thie haw ei ta.
22 Cha hawhna chata ABEIPA ta Hezekiah nata Zerusale liata chyhsa zy cha Asuria beipa Senakeri ku tawhtapa nata mo hropa zydua ku tawhtapa cha pabohsa ta; ama chheipâh liata chyhsa zy tawhtapa vaih ta.
23 Chatawhcha chyhsa hluhpi ta Zerusale lâta ABEIPA chata hmopiepa vaw cheih ei ta, hmo sôh ngaitapa zy Zudah beipa Hezekiah cha vaw pie ei ta; cha tawhna chata pho to mo hmô liata palyupalihpa ta y haw ta.
Hezekiah pasana(2Ab 20:1-11; Is 38:1-22)
24 Cha nona chata Hezekiah cha thi daihmâna taihta pasa ta, ABEIPA lâta thlahchhâ ta; a vaw chhy ta, pahnona pie ta.
25 Châhrasala Hezekiah chata ano châta a pha awpa hawhna chata tao leipa ta a palôhrupa a vaw palai hawpa vâna chata; ano chô liata nata Zudah zy nata Zerusale chô liata pathi-iana vaw tlô haw ta.
26 Anodeikuacha Hezekiah chata a paruhpa ta a palaina cha a ngiapachhipa ta a panawh heih ta, ano nata Zerusale liata chyhsa zy chhaota; chatanachata Hezekiah hro chhôh liana chata ABEIPA pathi-iana cha ama chô liata vaw tlô khao leipa ta.
Hezekiah ta Babylaw tawhta vyuhtuapazy â pyh(2Ab 20:12-19; Is 39:1-8)
27 Hezekiah chata sôh nata piah vaw hneirôh ta rôhnah ngaita ta. Tâkâri zy, ngôh zy, lôsôhpa zy, rohpahâhpa zy, vyhphao zy nata hmobaoh pha ngaitapa sona o sa ta;
28 sahroh to sona nata mietahkupa sahdô zy tao ta.
29 Khihzy chhao tao hra ta, mietahkupa zaw nata viahchao hri hnei ngaita ta; Khazohpa ta hneirôh ngaitapa ta tao ta.
30 Hezekiah heta Kihô chavah ti machhuah lâ tahpa pamai ta, Davi khih notla lâchhâh ta palosa ta. Chatanachata Hezekiah cha a hmotaopa zydua liana chata thlaochhipa ta y lymâ ta.
31 Babylaw molaipa zy ta lyuhchâpa tuapa ta a râh liata hmo noâhpa ama hiahrina kyh liata a palôhrupa liata a ypa zydua a pahno thei nawpa ta Khazohpa ta pathluapa ta pasia ta.
Hezekiah thina(2Ab 20:20-21)
32 Hezekiah hmotaopa hropa zydua, a hmotao phapa zy cha Amôza sawchapawpa hrohsopa Isai aluahna châbu Zudah bei nata Izarel Bei zy Châbu liata ropa châ ta.
33 Hezekiah cha a mahpaw zy hnohta a mô ta. Davi sawchapawpa zy thlâ su liata pabupa ta y ta; Zudah zydua nata Zerusale liata chyhsa zy chata a thi noh liana chata rôhnah ngaitapa ta tao ei ta. Chatawhcha a sawchapawpa Manase cha ano vyuhpa ta a bei haw ta.