Zudah liata Zehôra abeina (2Ab 8:16-24)
1 Zehôsapha cha a mahpaw zy hnohta â mô ta, a mahpaw zy hry liata, a mahpaw Davi khihpi liata pabu ei ta; a sawchapawpa Zehôra ano vyuhpa ta a bei ta.
2 Ano chata unawhpa Zehôsapha sawchapawpa zy hnei ta; Azariah zy, Zehiel zy, Zekaria zy, Azariah zy, Mikhael zy, Shephatiah zy ama châ; he zydua he Izarel beipa Zehôsapha sawchapawpa zy sai ama châ.
3 Ama paw chata hmo rôhnah ngaitapa pie ta, tâkâri zy, ngôh zy, hmo sôh ngaitapa zy, Zudah râh liata kuh a hneipa khihzy chhao; châhrasala khihnarâh cha Zehôra pie ta, pih tuapa a châpa vâta.
4 Zehôra ta a paw khihnarâh a pahrâ nahta tha a patlô ha ta, a unawhpa zydua cha zaozi ta thie khai ta, Izarel zy hry liata pawhrâhpa hluhpi zy chhaota.
5 Zehôra cha kô sythôh nata kô no a châ nahta a bei pathao ta, Zerusale liata kô charie a bei ta.
6 Ahaba chhôhkha zy taopa hawhta, Izarel beizy lâpi cha a chhih hra ta; Ahaba sawchanônô lahpinô ta a hneipa vâta. Chatanachata ABEIPA mohmô liata hmo pha lei ngaitapa ta tao tyh ta.
7 Châhrasala ABEIPA ta Davi chhôhkha cha pahleipadia khoh leipa ta, Davi hnohta biehraipa vâta nata ano nata a pathlazy taihta mei-ôh pahneisa awpa bie a vaw taih hawpa vâta.
8 Ano chhâ liana chata Edôma mo cha Zudah mozy liata aty ei ta, abei a tao chhy ei ta.
9 Chatanachata Zehôra cha a pheisaih hyutuhpa zy nata a talaili zydua chhaota kei pua ta, zâ ta kei pua ta, âmo nata talaili chô liata hyutuhpa zy a padotuhpa Edôma mozy cha a kei dyuh ta.
10 Chatanachata Edôma mozy cha atahmâ taihta Zudah zy liata amâ ty thlâh haw. Cha nona chata Libnah khih chhao ano liata aty hra ei ta, ABEIPA ama mahpaw zy Khazohpa cha amâ heisaipa vâta.
11 Zudah râh tlâh zy liata su sâhpa zy tao ta, Zerusale mozy cha paheisa ta, Zudah zy cha pavia sa ta.
12 Chatawhcha hrohsopa Elaiza tawhta ano liata châ vaw tlô ta, “ABEIPA na mahpaw Davi Khazohpa chata he tana heta a tah, ‘Na paw Zehôsapha lâpi zy a chhih leipa chi ta.
13 Izarel abeizy lâpi tlao a chhih chi ta, Zudah zy nata Zerusale liata a ypa zy Ahaba chhôhkha zy hawhta papheisa chi ta, na unawhpa, na paw chhôhkhapa zy nâma hlâta a pha viapa na thie hrapa vâta,
14 ABEIPA ta na chyhsa zy, na sawzy, na lahpinô zy, na sahro zy hrie aw ta,
15 nâma ta rih pasa ngaitapa hnei aw chi ta, nohchareih cha na pasana vâta na rih cha tla ngâpa ta a tla khaina taihta,” tahpa ta.
16 Chatanachata Ethiôpia mozy chheipâh liatahpa Philistina mo nata Arabia mo palôhrupa cha Zehôra adyuh awpa ta ABEIPA ta pathyu ta;
17 Zudah mozy cha a kei dyuh ei ta, ama râh liata a ngia ei ta, abei o liata hmo zydua cha la khai ei ta, a sawchapawzy lahpinô zy chhao, a sawchapawpa seihnai chaipa Zehôahaza dei leipa cha a saw chhao pahlôhpa veih ei.
18 Cha hnôh lâna chata ABEIPA ta patlâh thei leipa rih pasana ta hrie ta.
19 Kô no tawhna chata a pasana vâta a rih cha tla haw ta, pasana rarôh y ngaitapa ta thi haw ta. A chyhsa zy chata a paw zana ta mei ama patipa hawhna khata mei taopa veih ei.
20 A bei tua nota kô sythôh nata kô no châ ta, Zerusale liata kô charie a bei ta; ahyhmah pasô leipata thi ta. Davi khihpi liata pabu ei ta, abei sahlao thlâ liata deikua châ vei.