Ahaziah Zudah liata abeina (2Ab 8:25-29)
1 Zerusale mozy chata a sawchapaw seihnai chaipa Ahaziah cha ano vyuhpa ta abei ta tao ei ta; a saw uhtheipa zydua cha pheisaih sahlao Arabia mozy nata ama yna su liata a vypa sahlao chata thie khai haw tlôh ei ta. Chatanachata Zudah beipa Zehôra sawchapawpa Ahaziah cha a bei haw ta.
2 Ahaziah cha abei tua nota kô sypalih nata kô nopa châ ta, Zerusale liata kô kha a bei ta. A nô moh cha Athaliah, ômri sawchanônô châ ta.
3 Ano chhao chata Ahaba chhôhkha zy lâpi a chhihpa cha a chhih hra ta, a nô cha hmo parao ngaitapa tao awpa ta a chhithatuhpa châ ta.
4 Ahaba chhôhkha zy taopa hawh hra ta ABEIPA mohmô liata hmo pha leipa tao ta; a paw a thi tawhta paraopa ta a y nawpa ta a chhithatuhpa ama châ.
5 Ama chhithapa hawhna chata y hra ta, Ramôkilia lâta Suria beipa Hazael adyuh awpa ta Izarel beipa Ahaba sawchapawpa Zehôra hnohta sie ta. Châhrasala Zehôra cha Suria mo chata hmah vaw paphaosa haw ei ta,
6 Ramah liata Suria beipa Hazael nata amâ dyuhna hmahphaopa patlâ awpa ta Zezrel lâta vaw kua haw ta. Zudah beipa Zehôra sawchapawpa Ahaziah cha Izarel beipa Ahaba sawchapawpa Zôrama tlâh leipa a hmôpa ta Zezrel lâ cha sie ta.
Zehu ta Ahaziah a thie(2Ab 9:27-29)
7 Châhrasala Ahaziah, Zôrama hnohta siepa ta a leidiana cha Khazohpa taopa châ ta. Nimshi sawchapawpa Zehu adyuh awpa ta Zehôra hnohta a siepa vâta. Cha chyhsa cha Ahaba chhôhkhapa zy pamua awpa ta ABEIPA raopa châ tlôh ta.
8 Chatawhcha Zehu ta Ahaba chhôhkhapa zy parao awpa ta a dyuh no ta, Zudah pawhrâhpa zy nata Ahaziah unawhpa sawchapawpa zy sahlao ta Ahaziah ama chakao haipa hmô ta, thi haw ta.
9 Ahaziah cha tlua ei ta, Samari liata a nyupa patu ei ta, Zehu lâta a vaw chhi ei ta, thie ei ta. “A pathipalôh zydua ta ABEIPA a tlua tyhpa Zehôsapha sawchapawpa châ tlôh ta,” tah ei ta, pabu ei ta. Chatanachata Ahaziah chhôhkha zy chata ama râh liana chata biehneipa hnei khao leipa ei ta.
Athaliah abeina a chhu(2Ab 11:1-21)
10 Ahaziah nô Athaliah chata a sawchapawpa a thi tahpa a thei nahta thyu ta, Zudah bei chi zydua cha thie khai ta.
11 Ahaziah sawchapawpa Zôasha deikua cha abei sawchanônô Zehôsabia chata abei sawchapawpa ama thiepa zy hry tawhtapa cha siekhei ta, a mohôhtuhpa chhaota, rakhô chhôhpadâhpa liata nyu haw ta. Chatanachata abeipa Zehôra sawchanônô Zehôsabia, theihthaipa Zehôiada lahpinô ta Athaliah hmô thei leipa ta ano cha nyu ta, thie leipa ei ta;
12 ama hnohta pahrâpa ta, Khazohpa o liata kô charu a ru lâta y ta, Athaliah cha ama râh liana chata abei haw ta.