2 Thâtihzy Rona 20
Môaba nata Amawna tiahna
1 Cha hnôh lâna chata Môaba pathlazy nata Amawna pathlazy cha Meuni mo thokha zy chhaota Zehôsapha adyuh awpa ta vaw pua ei ta.
2 Ahy zy tlyma ta Zehôsapha hnohta, “Nâmo adyuh awpa ta zawpi hluh ngaitapa tilaipi haosâ Suria tawhta vaw pua chaimâh ei ta, Hazazôtama liata ama y haw, (cha cha Engedi a châ),” tahpa ta chho ei ta.
3 Zehôsapha chata chi ta, ABEIPA tlua awpa ta bie pie ta, Zudah râh zydua liana chata nie leipa ta y awpa ta bie pathâhsa ta.
4 Chatawhcha Zudah zy cha ABEIPA baona tluapa ta ahmaohpakhy ei ta; Zudah khi to tawhta ABEIPA tlua awpa ta a vy ei ta.
5 Zehôsapha cha ABEIPA o liata dôhpachhôh thiehpa kiapâh liata Zudah mo nata Zerusale mo ahmaohpakhypa hry liana chata a duah ta,
6 “Hy ABEIPA eima mahpaw zy Khazohpa y, avâ liata Khazohpa châ va chi mâ? Pho to chô liata ryureituhpa châ va chi ma?” Na ku liana chata hmotaotheina nata thatlôna y ta, ahyhmah ta pakhâ theipa châ va chi.
7 Hy eima Khazohpa y, he râh liata a pahrâpa zy he, na chyhsa Izarel zy papuapa chi ta, na kei Abaraha pathlazy chhâzaw châta na piepa châ vei mâ?
8 He râh liana heta vaw y haw ei ta, eima chô liata hmo pha leipa zaozi ta ryureina zy tlyma, hri zy tlyma, chakâhna zy tlyma a vaw tlô khiahtala he o liata nata na hmiakô liata a vaw duah aw pi ta, he o liana heta na moh y tlôh ta, eima nôpona liana chata cha pado aw pi ta,
9 nâma ta maniah nahthliepa ta maniah na pachha aw tahpa ta, na moh châta su pathaihpa cha sapa ei ta.
10 Chatanachata Amawna pathlazy nata Môaba mo nata Seira Tlâh liatahpa Izarel mo Izi râh tawhta ama vaw pua nota siehnaopa pasai leipa chi ta, kua saipa ta, âmo pahleipadia leipa sahlaozy ta,
11 eima pahrâ awpa ta râh maniah na piepa tawhtapa papuapa ta viarithô awpa ta maniah ama chhuahna zie he vaw pahno teh.
12 Hy eima Khazohpa y, ama chô liata ryurei aw va chi mâ? Chyhsa cha zie zydua maniah adyuh awpa ta a vaw puapazy cha adyuh thei awpa rimâ châ tlôh lei khâh pi ta. A taona zie awpa rai pahno hra ma pi, nâma lâta tlao eimâ vaw heih,” tah ta.
13 Zudah sahlao zydua cha ama saw nawh chyhpa ta ama lahpinô zy, ama sawzy chhaota ABEIPA hmiakô liata a duah ei ta.
14 Chatanachata zawpi hry liata Zahaziel chô liana chata ABEIPA Thlahpa vaw tlô ta, cha chyhsa cha Zekaria sawchapawpa châ ta, cha cha Benaia sawchapawpa châ ta, cha cha Zeiel sawchapawpa châ ta, cha cha Asapha pathla, Livai chyhsa Mataniah sawchapawpa a châ.
15 Ano chata, “Nâmo Zudah râh liatahpa zydua nata Zerusale liata a ypa zydua nata nâ Abei Zehôsapha y, vaw nahthlie teh u: ABEIPA ta nama hnohta he tana heta a tah, ‘Chi khah ula, cha zawpi hluh ngaitapa zy vâna chata riahchhiepa ta y hra khah u; adyuhna cha nâmo adyuhna châ leipa ta Khazohpa adyuhna châ tlôh ta.
16 Mylâ a za dyuh teh u; Ziza lâ khyna lâta a khy ei ta; Zeruel râhpathohpa kiapâh saikao chhâna lâta nama za hmô aw.
17 He adyuhna he namâ dyuh awpa byuh aw vei; a paziah ula, hy Zudah mozy nata Zerusale mozy saih u,’ tahpa ta. Chi khah u, riahchhiepa ta y hra khah u, mylâ adyuh awpa ta pua teh u, ABEIPA cha nâmo chhâh châ tlôh ta,” tah ta.
18 Zehôsapha cha a hmia alei lâ a khupa ta a bôh ta, Zudah mo zydua nata Zerusale mo zydua cha ABEIPA achhypa ta ABEIPA hmiakô liata a bôh ei ta.
19 Kôha pathla nata Kôrah pathla Livai mozy cha ao paro ngaitapa ta ABEIPA Izarel zy Khazohpa reithai awpa ta a vaw duah ei ta.
20 Chatawhcha a mylâ chata mydi ta thyu ei ta, Tekôa râhpathohpa lâta a ngia ei ta; ama sie nona chata Zehôsapha cha a duah ta, “Hy Zudah mozy nata Zerusale mozy saih u, ei bie he nahthlie teh u! ABEIPA nama Khazohpa cha ngâ ula, â ipa ta nama y aw; a hrohsopa zy cha ngâ ula, thlaochhi ngaitapa ta nama y aw,” tah ta.
21 Zawpi zy a pasyu khai nahta pheisaih zy hmiakô liata a siena chôta ABEIPA palyupalihna nata a pathaihna a ngiana zie awpa ta hla a sa tuh awpa rao ta, “ABEIPA lâta alyna bie reih teh u, a zawngiahna cha chhâzaw ta y tlôh aw ta, tah teh u,”tah ta.
22 Chatawhcha hla sapa ta ama reithai pata nahta Amawna pathlazy, Môaba pathlazy, Seira Tlâh liatahpa zy, Zudah sahlao adyuh awpa ta a vaw puapa zy, abyhtuh awpa zy ABEIPA ta soh ta, chatanachata panawhpa ta y haw ei ta.
23 Amawna pathlazy nata Môaba pathlazy chata Seira Tlâh liata a ypa zy cha pamo khaipa nata pahleipadia khai a chhuahpa ta adyuh ei ta, Seira Tlâh liatahpa zy ama pahleipadia khai nata âmo nata âmo cha a pahleipadia a chhuahpa ta adyuh chaimâh ei ta.
24 Zudah sahlao chata râhpathohpa saina su sâhpa ama tlô nata zawpi lâta moh ei ta; athihpa ri cha alei liana chata a hluah hôlô ta; pakha ta hmah a râpa y leipa ei ta.
25 Zehôsapha nata a sahlao zy cha hraona sôh la awpa ta vawh ei ta, athihpa rizy hry liana chata sôh zy, chysia zy, alôsôhpa zy thata kei hmô ei ta, ama phaoh thei leina taihta la ei ta. Hluh ngaita ta, noh thôh tlai hraona sôh cha paly ei ta.
26 A noh palih noh liana chata Berakah Saikao liata a pahmaoh ei ta, cha liana chata ABEIPA palyupalih ei ta; cha vâna chata atahmâ taihta cha su moh cha Berakah saikao ama tah.
27 Chatanachata Zudah chyhsa nata Zerusale chyhsa zydua cha kua haw heih ei ta, Zehôsapha chata Zerusale lâ thapha ngaitapa ta kua awpa ta a chhi ei ta, ABEIPA ta ama khakhaipa zy kyh liata thapha ngaitapa ta a paysa hawpa vâta.
28 Tlaipi zy, totâ zy, chiahmie zy chhaota Zerusale liata ABEIPA o cha kei tlô haw ei ta.
29 ABEIPA ta Izarel zy khakhaipa adyuh tahpa ama thei nahta râh to liata chyhsa zy chata Khazohpa cha chi kaw ei ta.
30 Chatanachata Zehôsapha khihnarâh cha thlahlôhpa ta y ta, Khazohpa ta ama chheipâh liata chyhsa zy tawhtapa thlahlôhna a piepa vâta.
Zehôsapha abeina(1Ab 22:41-50)
31 Cha hawhna chata Zehôsapha cha Zudah zy chô liata a bei haw ta, kô sythôh nata kô pangawhpa a châ nahta a bei pathao ta, Zerusale liata kô syno nata kô pangawh a bei ta. A nô moh cha Azubah, Shilhi sawchanônô a châ.
32 ABEIPA mohmô liata hmo pha taopa ta a paw Asa lâpi cha tleisai leipa ta a chhi ta.
33 Anodeikuacha su sâhpa zy cha pahleipadiapa châ leipa ta; zawpi zy chhaota ama mahpaw zy, Khazohpa chô liata ama pathipalôh pachhô hra veih ei.
34 Zehôsapha hmotaopa zydua cha a thaona tawhta a chhâna taihta, Hanani sawchapawpa Zehu thâtih rona liata ropa ta y ta, cha cha Izarel Abeizy Châbu liata ropa châ ta.
35 Cha hnôh lâna chata Zudah beipa Zehôsapha chata Izarel beipa Ahaziah bie a paraokhei ta, ano chata hmo pha lei ngaitapa ta tao tyh ta.
36 Tasi lâta a sie awpa balyh tao khoh ei ta, Eziôkeba liata balyh zy cha tao ei ta.
37 Chatanachata Maresa chyhsa Dôdavahu sawchapawpa Elieza ta Zehôsapha hnohta, “Ahaziah bie nâ paraokheipa vâta ABEIPA ta na hmotao a chhuahpa he khâpa hrao leipa a pachâsa haw ta,” tah ta. Chatanachata balyh zy cha rao khai haw ta, Tasi lâna chata sie thei khao leipa ei ta.