Hrohsopa Zehu Zehôsapha a chhoreina
1 Zudah beipa Zehôsapha cha thlahlôh ngaitapa ta Zerusale liata a o lâta kua haw heih ta.
2 Hrohsopa Hanania sawchapawpa Zehu chata vaw dy ta, Abei Zehôsapha hnohta, “Moleipa cha a chakheipa ta ABEIPA a haotuhpa zy cha ama kyh na pachâ aw ma? He vâna heta ABEIPA pathi-iana cha na chô liata a vaw y haw.
3 Anodeikuacha he râh tawhtapa Ashera pahleipadia chi ta, ABEIPA na tluapa vâna heta phana kyh, kheihawhpa tlyma cha na hnei,” tah ta.
Zehôsapha ta ryureituhpa zy a rao
4 Zehôsapha cha Zerusale liata y ta; Besheba tawhta Ephrai tlâh râh taihta a chyhsa zy hry lâta sie heih ta, ABEIPA ama mahpaw zy Khazohpa lâta chhitha heih ta.
5 Khi to liata Zudah râh kuh a hneipa khih zydua liana chata ryureituhpa zy soh ta,
6 ryureituhpa zy hnohna chata, “Nama hmotaopa cha pakhâta ta pachâpa ta tao teh u, chyhsa châta ryureipa châ leipa eichi ta, ABEIPA châta tlao châ tlôh ta; ryureina liana chata nama hnohta â hlao lymâ.
7 Chavâta ABEIPA chi ula, a sohsi ngaitapa ta tao teh u; ABEIPA eima Khazohpa liana chata hmoparaona nata hmia mona nata lymâ lana zy y vei,” tah ta.
8 Zehôsapha, chata Zerusale liata ABEIPA chata bie buapa paryhtuhpa châta Livai sahlao nata theihthaipa zy, Izarel chhôhkha pawhrâhpa zy soh hra ta.
9 “ABEIPA china chôta ngâchhih ngaitapa ta, palôhrupa do ngaitapa phaohpa ta nama tao awpa a châ:
10 khataih khihpa raita biepeipa vaw reihpa ta lianycheina kyh liata zy, ryhpa nata biepeipa kyh liata zy, bieraopa nata pachiana kyh liata zy, ama vaw khoh khiahtala, ABEIPA chô liata hmo ama parao lei nawpa ta a sohsi awpa ta chho teh u, nâmo nata nama unawhpa zy chô liata pathi-iana a vaw tlô pathlei lei nawpa ta. Cha hawhna chata tao ula thai lei châ aw vei eichi.
11 Chatawhcha ABEIPA lâ kyh zydua liana chata theihthaipa beichaipa Amariah cha nama hyutuhpa châ ta: abeipa lâ kyh zydua liana chata Zudah zy chhôhkha chô liata ryureituhpa Ishmael sawchapawpa Zebadia a châ; Livai mozy chhao nama hyutuhpa zy ama châ hra aw. Riahpha ngaitapa ta tao ula, chyhsa phapa zy hnohna chata ABEIPA cha y mawh sy!” tah ta.