Mikai ta Ahaba nata Zehôsapha nawhna a chhochhieliena (1Ab 22:1-40)
1 Chatanachata Zehôsapha cha hneirôhpa ta rôhnah ngaita kaw ta; Ahaba nata a zaokhina tao ta.
2 Kô khazie tlyma tawhna chata Samari liata Ahaba lâta zu ta, Ahaba chata ano nata a sahlaozy cha mietahkupa nata viahchao tôhpa zy a hluhpi vaw thiepa ta, Ramôkilia khih adyuh awpa ta reipasao ta.
3 Izarel beipa Ahaba chata Zudah beipa Zehôsapha hnohta, “Ramôkilia khih adyuh awpa ta khykhoh aw mapi mâ?” tah ta. Ano chata a chhy ta, “Kei nata nâma, ei chyhsa nata na chyhsa zy cha pôhkha eima châ mâ tâh, chariah cha hmaohkha ta eimâ dyuh aw,” tah ta.
4 Zehôsapha chata Izarel beipa hnohta, “ABEIPA a chhohiapa ta pasia tua la,” tah ta.
5 Chatanachata Izarel beipa chata hrohsopa sahlao chyhsa za palih aw pakhy ta, ama hnohta, “Ramôkilia khih adyu awpa ta eima pua aw ma, pua aw vei ma?” tah ta. Âmo chata, “Khy teh, Khazohpa ta abeipa ku liata a pie aw,” tah ei ta,
6 Châhrasala Zehôsapha chata, “ABEIPA hrohsopa ahy chhâ ma eimâ chhohia awpa y vei ei tlyma? tah ta.
7 Izarel beipa chata Zehôsapha hnohta, “ABEIPA maniah a chhohiapa awpa chyhsa pakha cha a y kha; châhrasala ano la ei hao ngaitapa a châ, keima kyh he a chhiena lâ sai leipa ta cha a phana lâ rai reih beih tlôh lei khâh ta, cha chyhsa cha Imlah sawchapawpa Mikai a châ,” tah ta. Chatawhcha Zehôsapha chata, “Ei abeipa chata cha hawhna chata tah khah se,” tah ta,
8 Chatanachata Izarel beipa chata hyutuhpa pakha aw ta, “Imlah sawchapawpa Mikai a vaw chhi parah teh,” tah ta.
9 Izarel beipa nata Zudah beipa cha Samari kuh chhikao a ngiana kiapâh su liata ama abei poh ta a tobipa ta ama abeidyuchhai rairieh liata atyuh ei ta; hrohsopa zydua chata ama hmiakô liata chhochhieliepa ta reih ei ta.
10 Khenanah sawchapawpa Zedekiah ta thua kizy tao ta. “ABEIPA ta he tana heta a tah. Hezy heta Suria mozy cha ama leidia khaina taihta na daih aw,’ tahpa ta,” tah ta.
11 Cha hawhna hra chata hrohsopa hropa zy chhaota, “Ramôkilia lâna chata khy la, thlao a chhipa ta y teh, ABEIPA ta abeipa ku liana heta a pie aw,” tahpa ta chhochhielie ei ta.
12 Mikai aw awpa ta ama tuapa chata Mikai hnohta, “Hrohsopa zy chata reikha tlapa ta a phana lâta abeipa hnohta bie reih chyu ei ta; chavâta nâma chhaota ama rei hawpa hawhta a phana lâta rei mah y”, tahpa ta reih ta.
13 Mikai chata, “ABEIPA hrona reipa ta ei reih, ei Khazohpa ta a reipa hawh tlaita ei reih aw,” tah ta.
14 Chatawhcha abeipa lâta a tlô nahta abeipa ta a hnohta, “Mikai y, Ramôkilia adyuh awpa ta eima sie aw ma, sie aw vei maw?” tah ta. Ano chata, “Khy ula, thlao a chhipa ta y teh u, na ku liata piepa a châ aw,” tah ta.
15 Châhrasala abeipa chata a hnohta, “Bie hmeihseihpa dei leipa ta cha ei hnohta ABEIPA moh ta rei lei awpa ta ei khazie ma chhie ei cha pasasa aw?” tah ta.
16 Ano chata, “Mietahkupa vaihtuhpa a hnei leipa hawhta Izarel sahlao zydua cha tlâhzy liata pai khaipa ta hmô na ta; ABEIPA ta, ‘Na sahlao heta hyutuhpa hnei khao leipa ei ta, ama o lâta thlahlôh ngaitapa ta a di ei se,’ a tah na,” tah ta.
17 Izarel beipa chata Zehôsapha hnohta, “Keima kyh he a chhiena lâ dei leipa ta cha a phana lâ rai la reih aw vei, tahpa cha chho vana ma kha?” tah ta.
18 Mikai chata, “ABEIPA bie nahthlie teh u; ABEIPA cha abeidyuchhai liata a tyuhpa ta avâ zawpi sahlao zydua a chachâh lâ nata a chavei lâta a duahpa ta hmô na ta;
19 ABEIPA chata Izarel beipa Ahaba he Ramôkilia lâ khypa ta kaw thie awpa ta ahy e a reipasao aw?’ a tah tina chata, pakha ta, chata khata tah ta, mo hropa ta cha hawh, kha hawhta tah ta.
20 Thlahpa pakha vaw pua ta, ABEIPA hmiakô liata a duah ta, ‘Keima ta ei reipasao aw na,’ tah ta. ABEIPA ta a hnohta ‘Khâpa ta maw?’ tah ta.
21 Ano chata.” Vawh aw na ta, a hrohsopa zydua pakah liata thlahpa a haih thaipa ei kei châ aw.’ tah ta. Ano chata, ‘Kei reipasao tlai aw chi ta, na tao thei hra aw; vawh la, cha hawhna chata tao teh,’ tah ta.
22 Chatanachata ABEIPA chata he na hrohsopa zy pakah liana heta thlahpa haih thaipa soh ta; nâma kyh ABEIPA ta a pha leina lâta a reih haw,” tah ta.
23 Cha khai pata nahta Khenanah sawchapawpa Zedekiah chata a kei hnia ta, Mikai baih liata chabaih ta, “Na hnohta bie reih awpa ta ABEIPA Thlahpa chata khataih lâ eina pua sai?” tah ta.
24 Mikai chata, “Chhôhpadâhpa chhôh chaipa liata a nyu awpa ta a râpa ta nâ ngia tita na pahno aw,” tah ta.
25 Izarel abeipa chata, “Mikai he a chhi ula, khih a vaotuhpa Amaw nata abeipa sawchapawpa Zôasha lâta siekhei teh u;
26 ‘Abeipa ta he tana heta a tah, he chyhsa he lô-o liata khô ula, thlahlôh ngaitapa ta ei vy heih hlâ lei cha rietheina pati nata rietheina ti pie teh u, a tah,’ tah teh u,” tah ta.
27 Mikai chata, “Thlahlôh ngaitapa ta nâ vy heih khiahtala, keima hmâpa ta ABEIPA ta bie a reih leipa a châ aw,” tah ta, ano lilaw ta, “Nâmo zawpi zydua chhaota vaw thei teh u,” tah ta.
28 Izarel bei nata Zudah bei Zehôsapha cha Ramôkilia khih lâna chata khy ei ta.
29 Izarel beipa chata Zehôsapha hnohta. “A panano aw na ta. adyuhna lâna chata sie hra aw na ta, nâ deikua cha na abei poh a bu teh,” tah ta. Izarel beipa cha a panano ta; adyuhna lâna cha sie ei ta.
30 Syria beipa chata a talaili zy chô liata hyutuhpa zy hnohna chata, “Izarel bei dei leipa ta cha chyhsa chyhpa rai, chyhsa laipa rai adyuh khah u,” tahpa ta bie pie ta.
31 A talaili chô liata hyutuhpa zy chata Zehôsapha ama hmô nahta, “Izarel beipa a cha huh,” tah ei ta. Chatanachata adyuh a chhuahpa ta dô haw ei ta; châhrasala Zehôsapha cha aw ta, ABEIPA ta bao ta. Chatanachata Khazohpa ta âmo pakuasa haw ta,
32 talaili chô liata hyutuhpa zy chata kuasai haw heih ei ta.
33 Châhrasala chyhsa pakha heta a chhuahpa hlei hnei leipa ta a libaw a kei ta, Izarel beipa cha a chariah chhaichhi nata a chachôhna vyhphao likawh ta ka ta; chatanachata a talaili a pasiesatuhpa hnohna chata, “Pakuasa la, zawpi hry tawhtapa he na pua khei teh, hmah pasa ngaitapa ei phaoh,” tah ta.
34 Cha noh liana chata adyuhna cha ru ngaita ta, Izarel beipa cha Suria sahlaozy lâ a heihpa ta a talaili liata zâlâ taihta a duah ta; noh tla chyta thi haw ta.