Zeremiah 25
Babylaw ta kô sysari roryhrapa ta a paysa
1 Zudahzy beipa Zehôiki, Zôsiah sawchapawpa kô palihna liata, Zudah chyhsa zydua kyh liata Zeremiah hnohta bie a vaw tlôpa cha, (cha daihti cha Babylaw beipa Nebukareza kô khana châ ta) cha bie cha hrohsopa Zeremiah ta Zudah chyhsa zydua nata Zerusale liata ypa zydua hnohta a reipa cha a châ:
3 “Kô kih nata kô thôh chhôh tlai Zudahzy beipa Zôsiah, Amawna sawchapawpa, kô hrawhleithôhna tawhta he noh taihna heta, ABEIPA bie cha kei hnohta vaw tlô tyh ta, mydi ta thyupa ta nama hnohta khâ reih na ta, châhrasala nahthlie leipa eichi ta.
4 ABEIPA ta nama hnohta a chakaotuhpa hrohsopa zydua tuah ta, mydi ta thyupa ta tuah ta; châhrasala nahthlie leipa eichi ta, thei awpa ta nama nah pachôh hra veih eichi,
5 âmo chata, ‘Chyhsa to nama moleina lâpi tawhta vaw kua ula, nama hmotaopa moleina tawhtapa chhao, ABEIPA ta nama hnohta nata nama pawzy hnohta hlâno tawhta chhâzaw châta a cha piepa râh liana heta pahrâ teh u;
6 khazoh hrohpazy hnohta âmo chakao awpa nata achhy awpa nata nama ku raihria liata ei hie pahâh awpa ta sie khah u. Chatanachata cha pasasa aw veih ei na,’ tahpa ta.
7 Châhrasala nama châta a pha lei awpa ta nama ku raihria liata ei hie na pahâhsa awpa ta na nahthlie leipa eichi ta, ABEIPA ta a tah.
8 “Chavâta Pheisaihzy ABEIPA chata he tana heta a tah: Ei bie nama nahthlie leipa vâta,
9 pachâ teh u, maw lâ phopi zydua cha bie ta aw na ta, ABEIPA ta a tah, na chakaotuhpa Babylaw beipa Nebukareza chhao bie ei ta aw, âmo cha he râh nata a chhôh liata a ypazy nata he chheipâh liata phopi a ypa zydua adyuh awpa ta vaw chhihtha aw na ta; pahleipadia khai aw na ta, noâhpa ta nata naihbeichiepa ta roryhrapa ta khâ a y thlâh ha awpa ta ei tao aw.
10 Cha tawhna heih chata âmo tawhta thaphana pyu nata lyna pyu zy, myuthieh hneituhpa ao nata myuthieh ao zy sâhcharona pyu nata sathaw meiôh khaihna ei la aw.
11 He râh zydua he rao aw ta, roryhrapa ta a y aw; he phopizy heta Babylaw beipa kô sysari ama chakao aw.
12 Kô sysari a tloh nata Babylaw beipa nata cha phopi cha Kaldia mo râh cha ama moleina vâta hrie aw na ta, chhâzaw ta roryhrapa ta ei paysa aw na, ABEIPA ta a tah.
13 Cha râh chô liana chata ei bie ama chôta ei reipa zydua, Zeremiah ta phopi zydua chôta a chhochhieliepa, he châbu liata a ropa ei patlôsa aw.
14 Phopi hluhpi nata abei rôhnah ngaitapazy chata âmo hry liatahpa sei ta tao tlôh aw ei ta; ama hmotaopa lymâ hawhta nata ama ku rai hriapa lymâ hawhta ei thô aw.”
Phopi châta hiehâhna nyu
15 ABEIPA Izarelzy Khazohpa chata he tana heta a tah: “Ei ku liata he hiehâhna kresawti nyu he la la, ei cha tuana awpa phopi zydua cha padosa teh.
16 Doh aw ei ta, paochheichhâ aw ei ta, ama hru aw, ama hnohta ei tua awpa zaozi vâna chata,” tahpa ta.
17 Chatawhcha ABEIPA ku liata nyu cha la na ta ABEIPA ta eina tuana phopi zydua cha padosa na ta;
18 chazy cha hezy he ama châ, Zerusale nata Zudah khihpizy, cha liata abeizy nata abeisawzy cha roryhrana zy, noâhpa ta zy, naihbeichiepa ta zy, chhiesapa ta zy to aw na ta, he noh hawhna heta;
19 Izi beipa Phirao nata ano a chakaopazy, abeisawzy nata chyhsa zydua zy,
20 phopi hropa a pahlaopa zydua zy, Uza râh liata abei zydua zy, Philistina râh liata abei zydua, Askelaw nata Azazah nata Ekraw nata Asadô liata a laibâhpa abeizy cha,
21 Edôma nata Môaba nata Amawni pathlazy;
22 Tyre abei zydua nata Sidaw abei zydua nata tilaipi haosâ liahpahlôzy abei zy;
23 Deda nata Tema nata Buza nata ama barôh ngyupa zydua zy;
24 Arabia bei zydua zy, râhpathohpa liata a pahrâpa phopi a pahlaopahlipa bei zydua zy;
25 Zimri bei zydua zy, Elami bei zydua zy, Mede bei zydua zy;
26 maw lâ bei zydua zy, a hlapa nata a hniapa liatahpa a pazi lymâpa ta, alei chô liata a ypa khizaw bei khihnarâh zydua zy cha. Chatawhcha ama do khai nata Babylaw abeipa ta a doh aw.
27 “Chatawhcha ama hnohta, ‘Pheisaihzy ABEIPA, Izarelzy Khazohpa chata he tana heta a tah: Doh ula, pari ula, pali ula, pao ula, thyu khao khah u, zaozi nama hry liata ei tuah awpa vâna chata,’ tah mah y.
28 “Chatawhcha nama ku liata nyu cha doh awpa ta ama la khoh vei khiahtala ama hnohta he tana heta tah mah y, ‘Pheisaihzy ABEIPA chata he tahna heta a tah: Nama doh tlai aw!
29 Ei moh bipa khihpi liata hmopha leipa tao pathao na ta, nâmo hrie leipa ta nama y aw ma? Hrie leipa ta y aw veih eichi, leilô liata pahrâpa zydua chô liata zaozi pado tlôh aw na ta, Pheisaihzy ABEIPA ta a tah.’
30 “Chavâta ama chô liata he bie zydua he chhochhielie la, ama hnohta he tana heta tah teh: ‘ABEIPA cha su sâhpa tawhta a rôh aw, a pahrâna pathaihpa tawhta a ao a papua aw; a dona chô liata thata a rôh aw, kre a saotuhpazy hawhta a awh aw, leilô a pahrâpa zydua chô liana chata.
31 Leilô chhâna taihta a pyu cha khaipalie aw ta, ABEIPA chata phopizy a kho ta; sapa zydua chô liata ryu a reih aw, hmoparaona cha zaozi hnohta a pie aw, ABEIPA ta a tah.’
32 “Pheisaihzy ABEIPA chata he tana heta a tah: Hmopha leipa chata phopi to a chahry khai aw na, thlihpi ru ngaitapa alei su chhâna tawhta a vaw pua aw!
33 “Cha noh liana chata ABEIPA thipazy chata alei chhâna tawhta alei chhâna taihta y aw ei ta. Mâchhiesa leipa nata pakhy leipa nata pabu leipa ta y aw ei ta; alei chô liata i hawhta ama cha aw.
34 “Mietahkuvaituhpazy saih u, sâh ula, cha teh u,nâmo mietahkupa zaw hry liata nôpawpazy saih u, buchadoh liata a tlie ngâ teh u, thiepa ta nama yna noh nata nama pai patla nohzy a vaw tlô haw tlai hih, hmobaoh a ngiapa hawhta nama pao aw.
35 Mietahkuvaituhpazy chata a râna lâpi hnei leipa aw ei ta, mietahkupa zaw hry liata nôpawpazy chhaota khôkhâna lâpi hnei aw veih ei.
36 Mietahkuvaituhpazy chana ao cha, mietahkupa zaw hry liata nôpawpazy sâh ngâpa pyu chhaota! ABEIPA ta ama bâna su roryhrapa ta a paysa hawpa vâta,
37 dopa thlahlôh chhihpazy cha a dâh karopa ta ama y hawna,ABEIPA hiehâhna ru ngaitapa vâta.
38 A yna a puasai haw chakeibarôhneipa hawh tlaita, ama râh cha rao khai haw tlôh ta, ABEIPA zaozi vâta nata a hiehâhna a ru ngaitapa vâta.”