Zeremiah 1

Zeremiah 1

Zeremiah awna nata pasiesana

1 Benzami râh liata Anathô khih liata theihthaipazy hry liatahpa, Hilkiah sawchapawpa, Zeremiah biezy,

2 Zudah beipa, Amawna sawchapawpa Zôsiah daihti nota, abeina kô hrawhleithôhna liana chata a hnohta ABEIPA bie vaw tlô ta.

3 Zudah beipa, Zôsiah sawchapawpa Zehôiki abei no chhaota vaw tlô ta, Zudah beipa Zôsiah sawchapawpa Zedekiah kô hrawhleikhana chhâna, Zerusale sei ta siekheipa thla pangawhna taihna khata.

4 ABEIPA bie cha ei hnohta vaw tlô ta,

5 “Py chhôh liata ei cha tao hlâta cha pahno na ta, chhi tawhta na pua hlâ chhaota cha pathaisa na ta;phopizy hnohta hrohsopa ta ei cha rao haw,” tahpa ta.

6 Chatanachata kei chata, “Aw, Abeipa KHAZOHPA! Pachâ teh, bie rei thai va na, ei hawti bailai,” tah na ta.

7 ABEIPA deikua chata ei hnohta, he tana heta tah ta, “‘Hawti ei châ,’ tah khâ; ei cha tuana maihta sie aw chi ta, bie ei cha piepa maih na reih awpa a châ.

8 Âmo vâta chi khah y, cha pachha awpa ta na hnohta ei y na, ABEIPA ta a tah.”

9 Chatanachata ABEIPA chata a ku vaw pazawh ta ei pakah hria ta; ABEIPA chata ei hnohta, “Nahthlie teh, na pakah liata ei biezy ei soh aw.

10 Moh teh, phopizy nata khihnarâhzy chô liata phia awpazy nata phie awpazy, pahleipadia awpazy, thy awpazy, sa awpa nata loh awpa ta, he noh liana heta ei cha soh,” tah ta.

11 Chatawhcha ABEIPA bie ei hnohta vaw tlô ta, “Zeremiah y, khâpa na hmô?” tah ta. Kei chata, ‘Almond tho chôhchahrei ei hmô,” tah na ta.

12 ABEIPA chata ei hnohta, “Na hmôpa â do kaw na: ei bie patlô awpa ta amâ chiehpa ta ei y,” tah ta.

13 ABEIPA bie cha a ei nona ta ei hnohta vaw tlô heih ta, “Khâpa na hmô?” tahpa ta. Kei chata, “Beih a tlao ngâpa, a pakah cha maw lâ a heisaipa ei hmô,” tah na ta.

14 Chatanachata ABEIPA chata ei hnohta, “A râh liata a pahrâpa zydua chô liata maw lâ tawhta hmopha leipa a vaw pua aw.

15 Pachâ teh, maw lâ khihnarâh phopi zydua aw tlôh aw na ta, tahpa he, ABEIPA bie reipa a châ; a vy aw ei ta, Zerusale chhikao a ngianazy, a chheipâh kuh pâhchhô zydua thaby liata zy nata Zudah khihpi zydua liata zy ama beidyuchhai ama patyuh chyu aw.

16 Na pathlua ei ta, khazoh hropazy lâta khâpaleipa rohpahâhpa rao ei ta, âmo ku tlai ta taopa achhy ei ta, he ama moleina zydua kyh liata ei bie pachiapa zydua cha ei phuah aw.

17 Chavâta na chai a saih la, thyu la, bie ei cha piepa zydua cha ama hnohta kei reih teh. Ama hmiakô liata thlahzopa ta y leipa la, chata leipa ta la ama hmiakô liata thlahzopa ta ei cha paysa aw.

18 Pachâ teh, he noh liana heta a râh zydua, Zudah beizy, abeisaw zy, a theihthaipazy nata cha râh liatahpa tawhna chata kuh dôhna khihpi nata thua tôh nata daw pâhchhô ta ei cha tao hih.

19 Châ dyuh aw ei ta; châhrasala cha pahnie aw veih ei, cha pachha awpa ta na hnohta y tlôh na ta, tahpa he, ABEIPA reipa a châ.” 

Zeremiah (Jeremiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52

Zeremiah 2

Zeremiah 2

A sy ngâpa Izarel sahlao hnohta ABEIPA ta ahawna

1 ABEIPA bie cha ei hnohta vaw tlô heih ta,

2 ‘Sie la, Zerusale nah theina liata awh teh, ABEIPA chata he tana a tah, Na thyutlia noh ta na ngiachhie zie zy, apahawpa cha nota kyh eina pachâzie zy chi kha ei thei thlâh ha na, chi hie leipa lyurâh râhpathohpa liata eina zizie chi kha.

3 Izarel cha ABEIPA châta pathaisa eihpa, thei a pôh tuapa a châ. Ano a nietuhpa maihta thai lei châ aw ei ta; ama chô liata raona a vaw tlô aw, ABEIPA ta a tah.”

4 Hy Zakaw chhôhkhapa nata Izarel chhôhkhapa zydua saih u, ABEIPA bie he nahthlie teh u.

5 ABEIPA chata he tana heta a tah: “Nama pathlahtuhpazy ta keima liata sia leina khâpa ama hmô, kei tawhta lâhlapi ta tlei haw ei ta, khâpahrao leipa a chadai ei ta, amâ palai haw tly?

6 ABEIPA Izi râh tawhta maniah puakheipa ta râhpathohpa râh chawhkaraipa khaotlô su, thina nohpahlina nata râh chawhpa su, ahy hmah ta sie pahlie beih leipa, ahy hmah y leina su liata maniah chhihthatuhpa kha, khataih liata a y, tah hra veih ei?’

7 Râh pha ngaitapa liata a theilâpa nata a phana nie awpa ta cha chhihtha eina ta. Châhrasala nama ngia nona chata ei râh papuapalei eichi ta, ei ryuto cha hmo pasichhihpa ta nama tao.

8 Theihthaipazy chhaota, ‘ABEIPA cha khataih liata a y?’ tah leipa ei ta. Ryhpa a hmâhtuhpazy ta na pahno hra veih ei; ryureituhpazy kei lâta a ty ei ta; hrohsopa zy ta Baal moh ta chhochhielie ei ta, hmo phahnai lei awpazy a chadai ei ta.

9 “Chavâta cha kho aw ei na ta, nama sawzy saw heihpazy chhao ei kho aw, tahpa he, ABEIPA bie reipa a châ.

10 Kupra liahpahlô liata sie ula, moh teh u, Keda lâta na tuah ula, pakhâta ta pachâ teh u; he hawhpa hmo a y beih tlyma pahnon awpa ta.

11 Phopizy chata ama khazoh ama ri beih ma, khazoh hmeiseipa a châ leipa chhao? Ei chyhsazy deikua chata ama rôhnahna cha hmo phahnai lei ngaitapa ta tlao ri ei ta.

12 Hy avâzy saih u, noâh ula, chi ngâsâpa ta y ula; roryhra khaipa ta y teh u, ABEIPA ta a tah,

13 ei chyhsazy ta hmo miano parao tlôh ei ta; kei, hrona tikhaoh he na siesai ei ta, ti ona chao ei ta, ti ona keipa, ti a o thei lei awpa cha.

14 “Izarel cha sei a châ ma? O chhôh liata sei a pihpa a châ ma? Kheihta zie ta e pasaipa-ipa ta a y haw tly?

15 Chakeibarôhneipa dawpazy chata a rôh thlupa ta a chô liata ama ao papua ei ta. A râh cha roryhrapa ta ama paysa khai haw; a khihpizy chhao a pahrâtuhpa hnei leipa ta a kâ khai haw.

16 Memphi mo nata Tahpahe mozy chhao a laki ama pamih khai haw.

17 ABEIPA na Khazohpa chata lâpi liata a cha chhihtha nota nâ râsaipa vâta, cha cha na chô liata na patlôsapa châ vei mâ?

18 Nile tizy do awpa ta Izi râh lâpi nâ chhihpa he, khâpa e na châta hlaona a châ aw? Euphrate ti doh awpa ta Asuria lâpi nâ chhihpa he, khâpa e na châta hlaona a châ aw?

19 Na moleina chata pasa cha pataosa aw ta, hnôh lâ nâ syna kyh chata a cha ra aw. Eina china hnei leipa ta, ABEIPA na Khazohpa na siesaipa he, hmo molei ngaitapa nata kha ngaitapa a châ, tahpa he, vaw pahno la hmô pasia teh, Abeipa Pheisaihzy KHAZOHPA ta a tah.

20 “Hlâno tawhta na raopaky paraopa ta, na chahryna zy chhao chi haw tlôh chi ta;’ Cha chakao khao aw va na,’ tah chi ta. Tlâh sâhpa to liata zy, thobu to zy liata a bôhpa ta sihryna hmo tao chi ta.

21 Chata hrasala chi pathaihpa hmâpa ta kre pha ngaitapa cha loh na ta. Kheihta zie ta a paliepa ta kei chôta kre pakheipa ta nâ lie haw tly?

22 Lô-iah ta apasipa ta sâbaw hluhpi hmâh hra la, na hmoparaona cha ei mohmô liata âlâ thlyu, Abeipa KHAZOHPA ta a tah.

23 ‘Apapuapalei va na, Baal chhao zi hra va na,‘kheihta zie ta e na tah thei tly? Saikao liata na yzie moh la, na hmotao hawpazy cha pahno teh: râraoseihpa zeinô paw kho no hawhta na châpa kha,

24 râhpathohpa liata a tlaihpa alâ hrâhpa, paw a kho nota â pathluahpa hawhta a khona a thatlôna cha: Ahy e a pakhâ thei aw? A tluatuhpa cha a ri a pathei khoh kha se; a daihti ta cha ama hmô thlâh ha aw.

25 Na phei liata pheiky ky leipa ta y leipa la, na dâh chhao phi kha se. Nâ deikua chata, ‘Hnabeiseina alei khai aw, reikhiapa chyhsazy vâna ta âmo ei chadai aw tah chi ta.

26 “Parutuhpa pachhaipa ta a y nota a no a zapa hawhta Izarel chhôhkha zy ama no a za haw: âmo zy, ama beizy, ama beisaw zy, ama theihthaipa zy nata ama hrohsopa zy chhao,

27 tho thabypa lâta, ‘Ei paw na châ,’ tahpa ta, alô lâta, ‘Na satuhpa na châ,” a tahtuhpa zy cha. Hmia chhy leipa ta ama ky tlao na chhy ei ta. Ama nôpo tina deikua chata, Thyu la, maniah pachha teh!’ ama tah aw.

28 Na khazoh na taopazy kha khataih liata ama y haw tly? Âmo cha thyu ei sala, na nôpo nota ama cha pachha thei ngyu aw; Hy Zudah, na khazoh zyhna khihpi zy hluhna zie hawh tlai ama châ mâ tâh.

29 “Khazia e ei chô liata palôh châ leipa ta khâ nama y? Nama zydua ta ei chôta hmo parao tlôh eichi, ABEIPA ta a tah.

30 Nama sawzy tu na ta, phahnai vei, phakhei hlei veih ei; chakeibarôhneipa a pahleipadia ngâpa hawhta nâmo zaozi chata nama hrohsopa zy a pahlei khai haw.

31 Hy thyutliazy saih u, ABEIPA bie he pahno teh u, Izarel sahlao chata râhpathohpa hawhta ei châ ma? Zohna chhakalupa râh ei châ ma? Ei chyhsa zy chata khazia e, ‘A siapa ta eima pua haw, nâ lâta vaw kua khao aw ma pi,’ ama tah tly?

32 Laihsa chata a tobinazy mypa ta,Myuh thieh chata a tobina a my thei ma? Ei chyhsa zy deikua chata noh reitiah lei chhôhta eina my haw ei.

33 “Kyhpachâtuhpa hmô theina awpa ta na yzie na pado kaw dia! Chanô moleipazy hnohta chhao na yzie na pachu haw hih.

34 Na hnozy liata chhao sipasapa athaipazy hrona thisaih a lâ ta; chyhsa ta ama hrao nota ku patupa chhao châ tlôh leipa ta.Cha bailai ta nâma chata,

35 ‘Thai ei châ na, kei liata hiehâhna a dia na,’ tah heih chi ta.Pachâ teh, ‘Molei vana na tahpa vâta na thâtih ei pachia aw.

36 Khazia e pachâna hnei leipa ta na yzie na panano tyh? Asuria na zakheipa hawhna khata Izi chhao na zakhei aw.

37 Na kuzy khômakhipa ta âmo tawhta na pua heih aw, ABEIPA ta na ngâpazy cha thy tlôh ta,âmo liana chata vânoh topa ta y aw va chi. 

Zeremiah (Jeremiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52

Zeremiah 3

Zeremiah 3

1 Chyhsa ta lahpinô ma sala,ano siesaipa ta vahpa hropa a pyh sala,ano chata a vaw pyh heih aw ma? Chanô cha thata puapaleipa ta chhâzaw ta y aw vei ma? tah ei ta. Nâ deikua cha kyhpachâtuhpa hluhpi hnohta sihrypa ta y chi ta; cha ta chôna chata kei lâta na vaw kua heih aw ma?ABEIPA ta a tah.

2 A sâhpa su pathaihparohpa lâta na mozy kaw ua la, moh teh! Ama cha kiakhei leina su khataih liata a y? Râhpathohpa liata Arabia chyhsa hawhna tlai ta,âmo hâpa ta lâkiazy liata nâ tyuh thlâh ha tyh.Na sihryna zy nata na moleina zy ta râh cha na papuapalei khai haw.

3 Chavâta avâ cha pasuasapa châ leipa ta,vâsua hnôh lâtahpa chhao suah hra vei; chyhsa sihrypa hmia phaopa hawhta phaoh chi ta,na hmia kawh kaw tlôh chi ta.

4 ‘Ei pâ y, ei satlia nota na chhihthatuhpa na châ,’Tahpa ta eina awpa chi châ vei ma?

5 Chhâzaw ta a pathi a ia aw ma? A chhâna taihta ma a pathi iapa ta a y aw? Pachâ teh, cha hawhna chata reih tlai chi ta,châhrasala a molei thei chaipa hawhta hmo tao chi ta.

Zerusale nata Zudah raona zikyurâna

6 Zôsiah abei nota, ABEIPA ta ei hnohta, “Hnôh lâ a sy khohpa Izarel hmotaopa kha na hmô ma? Tlâh sâhpa to liata khypa ta thobuh to ry liata zy a sihryna hmo a taopazy kha?

7 Kei chata, ‘He hmo zydua a tao khai tawhna heta kei lâta a vaw kua hei aw tly’, tah na ta; châhrasala vaw kua hlei leipa ta; chatawhcha a na rônô dôhmâhpa Zudah chata hmô haw hra ta.

8 Ano chata hnôh lâ a sy khohpa, Izarel cha a sihryna vâ tlai ta mapa ta, mana châ ei piepa a hmôpa chhaota; a narônô dôhmâhpa Zudah chata chi hlei leipa ta, tlao vawh ta sihryna hmo kei tao hra ta.

9 A sihryna a papeisa leipa vâta, râh cha papuapalei khai haw ta, alô nata tho thabypa liata sihry haw ta.

10 Chata chôna chhaota, a narônô dôhmâhpa Zudah cha pathipalôh hmeiseihpa ta kei lâta vaw kua leipa ta a pakheipa ta vaw kua ta, ABEIPA ta a tah.”

11 Chatawhcha ABEIPA ta ei hnohta, “Hnôh lâ a sy tyhpa Izarel chata a narônô dôhmâhpa Zudah hlâna chata a sia viapa ta a palâsa ta.

12 ‘Sie la, he biezy he maw lâ kei phuah teh,hnôh lâ a sy khaipa Izarel y,vaw kua te, ABEIPA ta a tah. Hiehâh hmia phaopa ta cha moh leipa aw ei na ta; zawngiah thei ngaitapa châ tlôh na ta, ABEIPA ta a tah; chhâzaw ta hiehâhpa ta y aw va na.

13 ABEIPA na Khazohpa chô liata nâ tyna zy thobuh ry liata khichhaipa chyhsazy hnohta na pasaina zy,ei reikah na zyh leina zyta na hmoparaona liana chata reihpha cheih teh,ABEIPA ta a tah.

14 Hy hnôh lâ a sy khohpa sawzy saih u, vaw kua teh u,ABEIPA ta a tah; nâmo lâta vahpa châ tlôh na ta; nama hry tawhta khihpi liatahpa pano cha la aw ei na ta,Zaio lâta ei châ chhi aw ei,

15 “‘Ei palôh hawhpa mietahkuvaihtuhpazy cha pie aw ei na ta, âmo ta pahnona nata novâhna zy ta ama cha pasa aw.

16 Chatawhcha vaw hluhpa ta râh liata nama vaw pôh tita, cha nohzy liana chata âmo ta, “ABEIPA Biehrai Byh,” tah beih khao aw veih ei, ABEIPA ta a tah. Ama palôhrupa liata a ngia leipa aw ta, nâ thei thlâh hra aw veih ei; ngiabâh khao leipa aw ei ta, tao khao hra aw veih ei.

17 cha daihti liana chata Zerusale cha ABEIPA abeidyuchhai bi aw ei ta; cha liana chata phopi zydua cha ABEIPA mohta Zerusale liata amâ vy pakhy aw; ama pathipalôh moleina pachyuna hawhna chata y khao aw veih ei.

18 Cha nohzy liana chata Zudah chhôhkhapa zy cha Izarel chhôhkhapa zy chhaota hmaohkha ta y aw ei ta, maw lâ râh tawhta ama pathlapazy hnohta ryuto awpa ta ei piepa râh liana chata hmaohkha ta amâ vaw ngia aw.

19 “‘Kei deikua chata,pho hluhpi hry liata ryuto awpa pha chaipa râh pha ngaitapa cha piepa ta sawnawhzy hry liata cha sopa ei khoh zie cha,Ei paw, tahpa ta na padopa ta eina zi na tawhtapa tlei aw va chi,tahpa vaw pangiasa na ta.

20 Lahpinô dôhmâhpa ta a vahpa a pheisaipa hawhta,hy Izarel chhôhkhapa saih u,eina dô ha eichi he,’ ABEIPA ta a tah.”

21 A sâhpa su pathaihparohpa chhôh liata pyu a y na,Izarel sawzy châpa nata hmo ahawpa pyu cha; ABEIPA ama Khazohpa my ei ta,ama yzie khâpa hrao leipa ta ama pachâsa hawpa vâta.

22 “Hy hnôh lâ a sy khohpa sawzy saih u,vaw kua ula,nama hnôh lâ a sy tyhna zy cha, ei patlâh aw na,“Moh teh, nâ lâta ei vy hih,nâ cha ABEIPA eima Khazohpa châ tlôh chi ta.

23 Hmeiseihpa ta tlâhzy he phahnai leipa ta tlâh chô liata pyu paro ngâpazy he. Izarel pachhana cha ABEIPA eima Khazohpa liana tlai heta a y.

24 “Châhrasala cha hmo pasichhihpa chata eima thyutlia no tawhta eima pathlatuhpazy ta tha ama hryuna cha nie khai haw ta, ama mietahkupa zawzy ama sahroh zawzy, ama sawchapaw zy, ama sawchanô zy taih chhaota.

25 Nozapa ta a zia ei suh u, eima maophyuna ta maniah khu mawh sy; ABEIPA eima Khazohpa chô liata hmo parao pi ta, keimo nata eima pathlatuhpazy ta, eima thyutlia no tawhta atanoh taihta; ABEIPA eima Khazohpa reikah eimâ ngiah leipa vâta.” 

Zeremiah (Jeremiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52

Zeremiah 4

Zeremiah 4

1 “Hy Izarel y, nâ palie khiahtala kei lâta tlai na vaw kua awpa a châ, ABEIPA ta a tah. Na pasichhihna zy ei mohmô leipa liata soh pa ta,

2 hmeiseihpa ta bie pachiapa do ngaitapa hmâpa ta a siapa ta, ‘ABEIPA a hroh,’ tahpa ta,chhie na sakhâh khiahtala phopizy cha ano liata huhiehpa ta y aw ei ta, ano cha amâ palaikhei ha aw.”

3 Zudah chyhsazy nata Zerusale hnohta ABEIPA chata he tana heta a tah:“Nama chhaolei akhaipa cha palie ula,ahlohzy hry liata chi hie khah u.

4 Nâmo Zudah râh liata chyhsa nata Zerusale liata a pahrâpazy saih u, ABEIPA châta nama chopaw tai teh u; chata leipa ta cha nama hmo moleipa taopazy vâta ei hiehâhna mei hawhta pua aw ta,ahy hmah ta pachhai thei leipa ta a kâ pathlei aw na.

Zudah siehnaopa pachhiparyna

5 Zudah râh liata chho ula, Zerusale liata phuah teh u,“A râh liana chata chiahmie tô ula; a paro ngaitapa ta awh teh u,‘A vaw pakhy ula, kuh dôhpa khihpi zy liata a ngia ei suh u!’ tah teh u.

6 Zaio lâta pahnosana chaluah ula,abohna tluapa ta a râ ula,nainô sôpa ta y khah u,maw lâ tawhta hmopha leipa ei patlôsa aw,paraona ru ngaitapa cha.

7 Râhhmâhpa hry tawhta chakeibarôhneipa pua na, phopizy a parao awpa cha a su tawhtapa a pua haw; a vy hai na, na lyurâh rory a pahrasa awpa nata na khihpi zy pahrâpa ta y leina taihta a pathaihparohsa awpa ta.

8 Cha vâna chata lathopala poh a sai ula,mâchhiesapa ta cha teh u; keimo tawhta ABEIPA hiehâhna ru ngaitapa cha pai tlôh lei khâh ta.”

9 “Cha noh liana chata ABEIPA chata abei pathipalôh nata abeisawzy pathipalôh chhao, riahchhiepa ta y aw ta; theihthaipa zy cha noâhpa ta y aw ei ta, hrohsopa zy chata noâh ama tah ngaita aw,” a tah

10 Chatanachata kei chata, “Hy Abeipa KHAZOHPA y, he chyhsazy nata Zerusale he thata na dô he, ‘Adyhna nama hnei aw,’ tah chi ta, zaozi ta hrona tlao a chhôpahlie ha he,” tah na ta.

11 Cha tina chata he chyhsazy nata Zerusale hnohta, “Râhpathohpa a sâhpa su pathaihparohpa tawhta thlih lalôhpa ei chyhsazy sawchanô a zi pasia awpa ta châ leipa ta, pathai awpa châ hra leipa ta, 

12 thlih ru ngaitapa ei bie ta a vaw tlô aw. Ama thâtih a reihtuhpa he keima ei châ, tahpa a châ aw.”

13 Pachâ teh, meihdozy hawhta a khy aw,talailizy khisô hawhna tlai cha; a arâzy cha pahmôpizy hlâta ama chatlie via. Eima hu a po kaw dia,paraopa ta y haw tlôh pi ta!

14 Hy Zerusale, pachhapa ta na y theina hâh ta,hmo paraona tawhta na pathipalôh pathai la. Khachâ e na pachâna moleipa cha nâ vao aw:

15 Dana tawhta ao vaw pua ta,Ephrai Tlâh tawhta hmopha leipa a phuah.

16 Phopizy cha chho ula; Zerusale liata phuah teh u,Râh hlapapi tawhta siehnaotuhpazy ama vaw tlô, Zudah khihpizy liata ama ao ama papua.

17 Kei chôta âtypa vâta lyu a vaihtuhpazy hawhta a chheipâh ta chadô ei ta, ABEIPA ta a tah.

18 Na yzie nata na hmotaopazy chata hezy he na chô liata a tlôkhei he. He he na raona awpa a châ,Pasa ngaita ta, na pathipalôh a chhô,” tah ta.

19 Ei pathipalôh a pasa, ei pathipalôh a pasa! Ei pathipalôh liana tlai a pasa! Ei chhôh liata ei pathipalôh patypamâpa ta y ta; y molo thei va na; Hy ei hrona, chiahmie pyu,adyuhna rahaopa na theipa vâta.

20 Pahleipadiana chôta pahleipadiana a tlô haw,a râh zydua cha hraopa ta a y haw,ei poh-ozy cha sôkha ta parao ei ta, ei paraipazy chhao sôkha ta paraopa ta a y.

21 Khachâ e pahnosana hmô aw na ta,chiahmie pyu ei thei aw?

22 “Ei chyhsazy cha hru kaw ei ta,na pahno tlôh leipa ei ta; hawti hrupa novâhna a hnei leipa hawhta ama châ. Hmo moleina tao thai ei ta,hmophapa taona zie deikua cha thai veih ei.

23 Alei cha moh na ta, roryhrapa nata a ruapa ta a y; avâzy chhaota khaihna hnei hra veih ei.

24 Tlâhzy moh na ta, a chalyu ta,a tlâh byupazy chhao a pasi ngâ hra.

25 Vaw moh na ta, chyhsa y leipa ei ta,avâ pavaw zydua a zaw khai haw.

26 Vaw moh na ta, lyu phapazy cha râhpathohpa lâta a lie haw,khihpi zydua chhao roryhrapa ta a châ khai haw,ABEIPA nata a hiehâhna ru ngaitapa hmiakô liana chata.

27 ABEIPA chata he tana heta a tah, a râh zydua roryhrapa ta y aw ta, ei parao khai ha aw.

28 Cha vâna chata alei chata mâchhiesapa ta y aw ta,chô lâ avâzy chhao a zoh aw; bie reih haw na ta, a ngiapachhi leipa na ta pathleih hra aw va na.”

29 Arâ a kiahpa nata libaw a hmâhtuhpazy pyu ta khihpi zydua cha a râpai ei ta; râhhmâhpa liata a ngia ei ta,lôpanô suzy liata kiah ei ta; khihpi to siesai ei ta, pahratuhpa pakha hmah y leipa ta.

30 Chatawhcha nâ, hraopa ta na y tina chata, kheihta e na tah aw? Poh sailawpa a bupa ta, ngôh hmobaohzy ta a tobipa ta,na mozy hlyu hnia hra la. Na ngiana cha khâpa hrao leipa ta a châ. Na satliazy chata a cha mohnao thlyu ei,na hrona la amâ chhuah.

31 Chanô sawzeipa awpa pyu thei na ta, saw tuapa a satuhpa pasa tao haipa Zaio sawchanô hu tôpa pyu cha, a kuzy pakaipa ta,“Ei hu a po kaw dia! Lianycheituhpazy hmiakô liata ei hrona a panao khai haw,” tahpa cha. 

Zeremiah (Jeremiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52

Zeremiah 5

Zeremiah 5

Zerusale nata Zudah moleinazy

1 Zerusale othliah liazy liata a râ hrei ula,moh ula, ngia ula! A bypazy tlua ula, mo pakha chhâ a siapa ta a taopa hmeiseihna a tluatuhpa rai nama hmô thei khiahtala,Zerusale cha ei ngiahthai aw.

2 Âmo ta, “ABEIPA a hroh,” tah hra ei sala, haipa ta chhie ama sakhâhpa a châ.

3 Hy ABEIPA, bie hmeiseihpa cha na hmo khona zie châ vei ma? Âmo cha tu chi ta, châhrasala ama pachârôh hlei vei; âmo cha pahleipadia chi ta,na chhoreina cha a pyh khoh hlei veih ei. Ama hmia cha alô hlâta pachâsa via ei ta; kua khoh veih ei.

4 Kei chata, “Hezy he chyhsa chhiepa châ ei ta, hru hra ei ta; ABEIPA ryhpa ama Khazohpa bieraopa cha pahno veih ei.

5 Molaipazy lâta vawh aw na ta, kei rei aw na ta; âmo chata ABEIPA ryhpa nata ama Khazohpa bieraopazy cha ama pahnopâ kha,” tah na ta. Châhrasala he chyhsazy heta bie a paraohpa ta raopakypa thlie ei ta,chahryna rizy cha chhie haw ei ta.

6 Chavâta râhhmâhpa ry liata chakeibarôhneipa ta âmo tai aw ta, râhpathohpa changie ta âmo chaih aw ta,Keichho ta ama khihpizy a byh aw ta, cha liata a puapa maih cha a hrie chheih khai aw;ama hmoparaonazy hluh ta, ama hnôh lâ a syna zy a hluh ngaitapa vâta.

7 “Kheihta e, ei châ ngiahthai thei aw? Na sawzy chata na siesai ei ta,khazoh châ leipazy reipa ta chhie sakhâh ei ta. Ama rihbiena taihta pasa ei na ta,sihryhpa ta na pheisai ei ta.

8 My ta arâ rihbiepa hawhta châ ei ta,chyhsa to âmo vaih lahpinô hiatliapa ta sa ei ta.

9 He hmo vâna heta hrie aw vana ma? ABEIPA ta a tah; phopi chô liana heta phuh la aw vana ma?

10 “Kresadôzy liana chata kiah ula, parao teh u,anodeikua cha parao khai khah u;a chiahzy cha la ula, ABEIPA eih châ tlôh lei khâh ta.

11 Izarel chhôhkhapa zy nata Zudah chhôhkhapa zy chata ei chô liata sa thisahlaipa ta tao tlôh ei ta, ABEIPA ta a tah.

12 ABEIPA cha haipa ta pachâpa ta khâpa hmâh tah thei tlôh aw vei,Paraona eima chô liata tlô aw vei,zaozi tlyma, chakâna tlyma pasa tao aw ma pi.

13 Hrohsopazy chhao ziza dei châ aw ei ta; âmo liata bie cha y tlôh leipa ta. Ama chô liata cha hawhta taopa a châ aw!” tah ei ta.

14 Chavâta ABEIPA Pheisaihzy Khazohpa chata he tana heta a tah:“Cha hawhpa bie cha ama reipa vâta pachâ teh,na pakah liata ei biezy cha mei ta pachâsa aw na ta, he chyhsa zawpizy he tho ta,chatawhcha a kâ khai aw.

15 Pachâ teh u, Hy Izarel chhôhkhapa zy saih u, lâ hlapi tawhta phopi râh lâta ei vaw chhi aw, ABEIPA ta a tah. Phopi thatlô ngaitapa,hlâno tawhtapa phopi,ama rei na pahno leipa,ama bie reipa na thei leipa phopi zy cha.

16 Ama lava cha thlâ a pahypa châ ta, ama zydua ta thatlô ngaitapa sai châ ei ta.

17 Na sâh hria chiehpa nata na niepa ama nie khai aw; na sawchapawzy nata sawchanôzy nie awpa tlai cha; na mietahkupa zawzy nata na sahro zawzy nie aw ei ta; na krezôhzy nata theiku kôzy nie aw ei ta; kuh dôhpa khihpizy na ngâ tyhpa zy tlai kha,zaozi ta ama parao khai aw.”

18 “Châhrasala cha nohzy liana chhao chata, cha pamua pathla aw veih ei na, tahpa he ABEIPA bie reipa a châ.

19 ‘Khazia e, ABEIPA eima Khazohpa ta he hmo zydua he eima chô liata a tao tly?’ chyhsazy ta ama tah tina chata, ‘Na siesai eichi ta, nama râh liata khazoh nanopazy nama chakaopa hawhta, cha hawhna hra chata nama râh leipa liata khichhaipa nama chakao aw,’ ama hnohta na tah awpa a châ.”

20 He he Zakaw chhôhkhapa liata reih ula, Zudah râh liata pathâhsa ula:

21 “Hy ahrupazy novâhna a hnei leipa saih u, he he nahthlie teh u, mo hnei ta a hmô tlôh leipa, nah hnei ta a thei tlôh leipa saih u.

22 Na chi vei ei chi ma? ABEIPA ta a tah; ei hmiakô liata a chalyu aw vei eichi ma? Kei he tilaipi râhri cha leisadi chhâzaw ta a khô leina awpa ta pakhâna,tilaipi chalâparâpazy chatlao ngâ hra sala khô thei leipa ta; paro ngâ hra sala a khô lei awpa ta a taotuhpa cha ei châ hih.

23 Châhrasala he chyhsazy heta pathipalôh chhorupa nata atyhmâhpa phaoh ei ta; aty ei ta, ama râ haw.

24 Ama pathipalôh chhaota,‘ABEIPA eima Khazohpa, a daihtita ta vâsua hmiatuapa nata vâsua hnôh lâtahpa a pasuasatuhpa,sâhria daihti maniah a rao patuhpa cha chi ei suh u,’ tah hra veih ei.

25 He hmozy he nama hmoparaonazy chata pahlei ta, nama moleinazy hmophapa a cha paky ei.

26 Ei chyhsazy hry liata hmoparaopa y tlôh ei ta; pavaw a byhtuhpa ta a byhpa hawhta a byh thlâh ha ei ta; khohei chôh ei ta chyhsazy a ao ei ta.

27 Pavaw byh pavaw ta a biepa hawhta, ama ozy cha dôna ta bie ta; chavâta vaw lai ei ta, hneirôh pa ei ta,

28 thawh ei ta, tlaoh ei ta. Ama moleina hmotaopazy chata adaihpa rakha hnei vei; paw hnei leipazy vânoh tona awpa ta ama chhâh a châ leipa ei ta, bao a ngiahpa cha pachha hra veih ei.

29 He hmozy vâna heta hrie aw vana ma? ABEIPA ta a tah, he hawhpa phopi chô liana heta ei hrona chata phuh la aw vei ma?”

30 Cha râh liana chata hmonoâhpa nata pasi a chhihna a vaw y haw:

31 hrohsopazy chata haipa ta chhochhielie ei ta, theihthaipazy chata âmo reisai ta ryu reih ei ta; ei chyhsazy chata cha hawhpa taopa cha ama khoh, a chhâna lâta cha kheihta e nama tah aw tly? 

Zeremiah (Jeremiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52

Zeremiah 6

Zeremiah 6

Zerusale nata Zudah raona

1 Benzami pathlahpa saih u,Zerusale liata chiahmie tô ula,Behakere liata pahnosana papua teh u; maw lâ tawhta raona a vaw pua na, pahleipadiana ru ngaitapa tlai cha.

2 Zaio sawchanô chhithai nata panyuhpa cha ei pahleipadia aw.

3 Mietahkuvaihtuhpazy ama mietahkupa zawzy chhaota ano lâta vaw tlô aw ei ta; a chheipâh liata ama poh-ozy parai aw ei ta,âmo su chyu liata ama bâ aw.

4 “Ano adyuh awpa ta a chhuahdy teh u; thyu ula, nohchhô nota siehnao ei suh u!”“Eima hu a po na, noh a kiah haw ta,zâ lâ nohpahlipa zy â sâh haw!”

5 “Thyu ula, zâ ta siehnao ei suh u, o rôhnahpazy pahleipadia ei suh u!”

6 Pheisaihzy ABEIPA chata he tana heta a tah:“Thozy thlu ula; Zerusale siehnaona chata a byuhpa tao teh u. Khihpi hrie awpa cha he he a châ; a chhôh liana chata pasaipa-ina sai a châ.

7 Tikhaoh reipa ti a papuapa hawhta a moleina cha a papua tyh; a chhôh liana chata nôchhiena nata ahraona a y tahpa pahnopa châ ta;ei hmiakô liata pasana nata hmah a paphaonazy a y thlâh haw.

8 Ei palôhrupa ta a cha panano sai hlâna heta,hy Zerusale, a chado kaw teh; chata leipa ta cha pahrâtuhpa a hnei leipa,lyurâh ta taopa ta roryhrapa ta ei cha paysa tlamaw aw na.”

9 Pheisaihzy ABEIPA chata he tana heta a tah: “Izarel laibâhpazy cha kre hawhta liahsa ta kâmo tho ula; kre thei a lyutuhpa hawhta a chiahzy cha pathâpazi heih teh u.”

10 Ama nahthlie thei na awpa ta ahy e a chho aw nata ahy e ei pahnosa aw? Pachâ teh, nahkhao pamaipa ta y ta, nahthlie thei veih ei; pachâ teh, ABEIPA bie cha ama châta mohnao chhihpa châ ta, alyna rai hnei khao veih ei.

11 Chavâta ABEIPA hiehâhna ta bie na ta; mao-ohpa he eina ai haw. “Khih liah liata hawti chô liata patlai la,satliapa a y pakhypazy chô liata chhao;a lahpinô hnohta a vahpa chhao lapa châ aw ta,machâzy nata pawpipazy chhao.

12 Ama ozy cha mo hropa lâta piepa châ aw ta,ama lyuzy nata ama lahpinôzy chhaota; cha râh liata a pahrâpazy chô liana chata ei ku hy tlôh aw na ta,” ABEIPA ta a tah

13 “A nawh chaipa tawhta a lai chaipa taihta, chyhsa to karâyna ta bie tlôh ei ta; hrohsopazy nata theihthaipazy tlai chhao,chyhsa to a do lei ngaitapa ta ama y.

14 Ei chyhsazy hmah cha a naopata ta,‘A pha baona, a pha baona,’ tahpa ta reih ei ta, pha tlôh leipa ta.

15 Hmo pasichhihpa ama taopa chhaota,ama no a za ma? Tiarâh, ama no za chachei leipa ta; ama hmia chhao chhie hra vei. Chavâta a paopazy hry liata ama pao hra aw; âmo ei hrie tina chata thypa ta ama y aw,” ABEIPA ta a tah.

16 ABEIPA chata he tana heta a tah:“Lâpizy liata a duah ula, moh teh u,lâpi phapa yna lâpi hlôpazy cha hiahri teh u,cha liana chata sie ula,nama thlahpa châta pahâna nama hmô aw. Âmo deikua chata,‘Cha liana chata sie aw ma pi,’ tah ei ta.

17 Nama châta riahvaihtuhpazy rao na ta,‘Chiahmie pyu nahthlie teh u!’ tahpa ta. Âmo deikua chata, ‘Nahthlie aw mapi,’ tah ei ta.

18 Chavâta hy phopi saih u, nahthlie ula,hy pôhpakhypa saih u,ama chô liata a tlô awpa cha pahno teh u.

19 Hy leilô y, nahthlie teh; chyhsazy chô liana heta hmopha leipa ei patlôsa aw,ama pachâna theizy tlai cha,ei biezy ama nahthlie leipa vâta ei ryhpa zy hra cha thy pathlah ei ta.

20 Khâpa châta e Sheba tawhta deiryh zy,râh hlapapi tawhta basu zy,kei lâta a vaw tlô tyh tly? Nama raopa hlânazy a ly tlâh châ leipa ta,nama atheihnazy chata na palysa hra vei.

21 Chavâta ABEIPA ta he tana heta a tah:‘He chyhsazy hmiakô liana heta chapianazy soh aw na ta,cha liana chata pawzy cha ama sawchapawpazy chhaota hmaohkhata pao aw ei ta,vaih nata a viasa chhao ama leidia aw,’”

22 ABEIPA ta he tana heta a tah: “Maw lâ râh tawhta chyhsapazy amâ vy na,alei su chhâna tawhta phopi rôhnah ngaitapa ama vaw pua na.

23 Libaw nata asei chaba ei ta, zawngiahna rai a hnei leipa ama châ,ama pyu cha tilaipi paro ngâpa hawhta châ ta; arâ chô zy kiah ei ta, chyhsa to adyuhna lâ amâ chiehpa hawhta, Hy Zaio sawchanô a cha vaw siehnao aw ei!”

24 Ama pathâhna thei pi ta,eima kuzy thazeipa ta y haw ta;pasapa chata maniah a patu haw,chanô sawzeipa pasapa hawhna tlai cha.

25 Lyurâhpa lâta pua leipa ula,lâpi liata chhao sie hra khah u;cha liana chata khakhaipa zaozi y tlôh ta;su to liata chariah a y na.

26 Hy ei chyhsa sawchanô y,lathopala poh a sai la,buchâh hry liata a hlao teh;sawchapaw matlupa mâchhiesapa hawhta mâchhie sa la,thata chaphô tu teh;paraotuhpa eima chô liata sôkha ta vaw tlô tlôh aw ta.

27 “Ei chyhsazy hry liata a mohtuhpa nata pasiatuhpa ta cha tao na ta,ama yzie pahnopa ta na pasia thei nawpa ta.

28 Atyhmâhpa chhoru ngaitapa reipachhie hmâhpa ta a khiekhâpa,dawh nata thua hawhta châ ei ta;a do lei ngaitapa ta ama y.

29 Syuhu ta hmôpa ta mei liata kyh cha zao ta; pathaisa a chhuahna cha khâpa hraoleipa a châ,moleipazy thy pathlahpa cha tao leipa ta.

30 Chyhsazy chata tâkâri soh leipa ama bie aw, ABEIPA ta âmo a pathlua vâta .

Zeremiah (Jeremiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52

Zeremiah 7

Zeremiah 7

Nama yzie nata nama taonazy pado teh u

1 ABEIPA tawhta Zeremiah hnohta bie a vaw tlôpa cha; 

2 ABEIPA o chhikao liata a duah la, cha liana chata he bie he phuah la, ama hnohta reih teh, ‘Nâmo Zudah sahlao zydua ABEIPA achhy awpa ta he chhikao liata a ngiapazy chata ABEIPA bie he nahthlie teh u.’

3 Pheisaihzy ABEIPA Izarel Khazohpa chata he tana heta a tah, “Nama yzie nata nama hmotaopazy cha taopathi ula, he su liana heta ei cha pahrâsa aw ei.

4 ‘He he ABEIPA achhyna-o, ABEIPA achhyna-o, ABEIPA achhyna-o a châ he,’ tahpa haipa biezy he zo khah u.

5 “Nama yzie nata nama hmotaopazy cha tao pathipa ta, chyhsa nata a vaih likawh ta a do ngaitapa ta pachiapa ta, 

6 khichhaipazy, paw hnei leipa zy, nôhmei zy, pasaipa-i leipa ta he su liana heta athaipa thisaih palosa leipa ta, nama pha leina awpa ta khazoh hropazy namâ chadai hra leipa khiahtala, 

7 he râh, hlâno tawhta nama mahpawzy hnohta ei piepa liana heta chhâzaw taihta ei cha pahrâsa aw ei.

8 “Haipa bie phahnaina a y leipa cha tlao ngâ eichi ta. 

9 Parupa ta, lianycheihpa ta, a pheipa ta, haipa ta chhiesapa ta, Baal lâta khâpa leipa ropahâhpa raopa ta, khazoh hropa nama pahno leipa zy a chadaipa ta, 

10 he o keima moh tlai bipa liana heta ei hmiakô liata a vaw duahpa ta, he hmo pasi a chhihpa zydua he tao lymâna chô ta, ‘Pachhapa ei châ haw!’ nama tah aw ma? 

11 He o ei moh tlai bipa he, nama mohmô liata paruhmâhpazy lôpu hawhta ma a châ? Keima tlai heta ei hmô mâ tâh, ABEIPA ta a tah. 

12 Hmiatua ta ei moh ei paysana ei su Shilôh lâna chata sie teh u, ei chyhsa Izarel moleina vâta ei hmotaopa cha kei moh teh u. 

13 Atahmâ, he hmo zydua he tao eichi ta, mydi ta thyupa ta nâmo lâta bie ei reipazy he nahthlie leipa ta, cha aw ei na ta, namâ chhy leipa vâna heta, 

14 Shilôh chôta ei taopa hawhna khata he o ei moh bipa nâmo nata nama mahpawzy lâta su ei cha piepa, nama ngâ tyhpa chô liana heta ei tao aw. 

15 Nama unawhpa zydua, Ephrai chi zydua, ei thypa hawhna khata ei cha thy aw ei, ABEIPA ta a tah.

Nohthlahpa a chhyna kyh liata Khazohpa hiehâhna

16 “He chyhsazy châna heta thlahchhâ leipa la, awh pata thlahchhâ leipa la, kei lâta hiapa hra kha, cha thei tlôh aw va na.

17 Zudah khihpizy liata nata Zerusale lâpizy liata ama hmotaopa cha hmô va chi ma?

18 Sawnawhpazy ta tho pakhy ei ta, pawzy ta mei patih ei ta, chanôzy ta avâ beinô lâta hlâ awpa ta viahchhâ awpa ta viahdie hly cha hri ei ta; khazoh hropazy dopa hmohlânazy patlai ei ta, ei hie eina pahâhsa na awpa ei ta.

19 Keima ma ei hie eina pahâh ei? ABEIPA ta a tah. Âmo nozana awpa ta âmo tlao châ vei ma?

20 Chavâta ABEIPA Khazohpa chata he tana heta a tah: He su chô liata zy, chyhsa nata sa chô liata zy, lyurâhpa liata tho nata alei theilâpa chô liata zy ei hiehâhna nata ei pathi-iana cha ei patlai aw; kâ aw ta, pachhaipa ta y aw vei.

Zudah tyna hri-iana

21 Pheisaihzy ABEIPA, Khazohpa chata he tana heta a tah: “Nama theihnazy nata raopa hlânazy cha hlâ ula, sa nie teh u.

22 Raona hlânazy tlyma, a theihnazy tlyma kyh liana chata nama mahpawzy hnohta rei leipa na ta, Izi râh tawhta âmo ei chhihtha nona chhao khata bie pie hra va na.

23 ‘Ei ao nahthlie ula, nama Khazohpa châ aw na ta, nâmo chhao ei chyhsazy nama châ aw. Nama pha theina awpa ta nama yzie awpa ei cha chhopa zydua cha zyh teh u,’ tahpa ta bie tlao ei pie.

24 Châhrasala nahthlie leipa ei ta, ama nah pachôh hra veih ei, ama pathipalôh moleina pachâpa ta âmo reisai ta tlao y ei ta, hmialâ tôhna châpa ta, hnôh lâ tlao amâ sy.

25 Nama mahpawzy Izi râh tawhta ama pua no tawhta atanoh taihna heta, na chakaotuhpa hrohsopa zydua mydi ta thyupa ta nâmo lâta nohchareih tuah tyh na ta;

26 châhrasala na nahthlie leipa ei ta, ama nah pachôh hra veih ei, ama ku pachhasa ei ta. Ama mahpawzy hlâna chata molei haw ei ta.

27 “He bie zydua he ama hnohta na reih awpa a châ, châhrasala cha nahthlie aw veih ei. Awh aw chi ta, châ chhy aw veih ei.

28 Âmo hnohta, “He phopi he ABEIPA ama Khazohpa ao nahthlie leipa ta, chhoreina a ngiah leipa phopi ama châ hih,” tah aw chi ta; hmeiseihna a leidia haw; ama pakah tawhtapa pachhaipa ta a châ haw.

29 Hy Zerusale y, na sâ tai la, thy la; su a sâhpa pathaihparohpazy liata cha teh, ABEIPA ta a hiehâhna totuhpa pho sahlaozy cha thypa ta hnôh chhy haw tlôh ta.

30 “ABEIPA ta Zudah pathlazy chata ei mohmô liata hmo moleina tao tlôh ei ta, ei moh bipa o liana chata papuapalei awpa ta ama hmo pasichhihpazy cha ama soh haw.

31 Ama sawchapawzy nata ama sawchanôzy mei liata rao awpa ta Hinô sawchapawpa saikao liata Tôphe a sâhpa suzy tao ei ta; chazy cha ei biepiepa châ leipa ta ei pathipalôh liata chhao a ngia beih hra vei,” tah ta.

32 Chavâta nohzy cha a vaw tlô aw, ABEIPA ta a tah, saikao cha Tôphe bipa châ khao leipa aw ta, Hinô saikao bipa châ hra aw vei, Thina saikao bipa tlao châ ha aw ta, Tôphe liana chata pabu aw ei ta, pabuna awpa su hropa a y khao leipa vâta.

33 Chyhsazy ri cha avâ pavawzy nata aleilô sahrâhpa zy niepa a châ aw, ahy hmah ta to aw veih ei.

34 Zudah khihpizy liata nata Zerusale khih liazy liana chata palaona pyu zy, thaphana pyu zy, myuh a hneituhpa ao zy, myuhthieh ao zy chhao ei chalihsa aw; a râh cha roryhrapa ta y tlôh aw ta. 

Zeremiah (Jeremiah)

Bo 1	Bo 2	Bo 3	Bo 4	Bo 5	Bo 6	Bo 7
Bo 8	Bo 9	Bo 10	Bo 11	Bo 12	Bo 13	Bo 14
Bo 15	Bo 16	Bo 17	Bo 18	Bo 19	Bo 20	Bo 21
Bo 22	Bo 23	Bo 24	Bo 25	Bo 26	Bo 27	Bo 28
Bo 29	Bo 30	Bo 31	Bo 32	Bo 33	Bo 34	Bo 35
Bo 36	Bo 37	Bo 38	Bo 39	Bo 40	Bo 41	Bo 42
Bo 43	Bo 44	Bo 45	Bo 46	Bo 47	Bo 48	Bo 49
Bo 50	Bo 51	Bo 52