Zeremiah 24
Theiku phapa nata chhiepa pamosana
1 ABEIPA chata na pahnosa ta, theiku hrâbyh miano ABEIPA achhyna-o hmiakô liata a vaw patyuh ta; Babylaw beipa Nebukareza ta Zudah zy beipa Zekôniah Zehôiki sawchapawpa nata Zudah beisawzy zôthaipazy nata syudaipazy chhaota, Zerusale tawhta Babylaw seichâna ta a chhi tawhna khata.
2 Hrâbyh miakha liana chata theiku pha ngaitapa, theiku hmoh tuapa hawhpa y ta, hrâbyh hropa liana deikua chata’ theiku chhie ngaitapa nie tlâh châ leina taihta a chhiepa y ta.
3 ABEIPA chata ei hnohta, “Zeremiah, khâpa na hmô?” tah ta. Kei chata, ‘’Theiku, theiku phapa a pha ngaitapa nata a chhiepazy nie tlâh leina taihta a chhiepa,” tah na ta.
4 ABEIPA bie cha ei hnohta vaw tlô ta.
5 “ABEIPA Izarelzy Khazohpa chata he tana heta a tah: Zudah seichâna ta atâhpazy hawhta, Kaldia sahlao râh liata ama phana awpa ta ei tuapazy cha he theiku phapa hawhta ei moh aw.
6 Ama phana chata ama chô liata ei mo tawpâ aw na ta, he râh liana heta ei chhihtha heih aw. Âmo sa aw na ta, phie aw va na; loh aw na ta, phia aw va na.
7 ABEIPA ei châ tahpa eina pahno nawpa ei ta, pathipalôh pie aw ei na ta; chatawhcha âmo cha ei chyhsazy châ aw ei ta, kei ama Khazohpa ei châ aw, pathipalôh zydua chhaota ei hnohta vaw kua tlôh aw ei ta.
8 “ABEIPA ta he tana heta a tah: Theiku chhiepa nie tlâh châ leina taihta a chhiepa hawhna heta, Zudahzy beipa Zedekiah nata abeisawzy nata Zerusale liata a laibâhpa he râh liata a ypazy nata Izi râh liata a pahrâpazy cha ei heisai tlai aw.
9 Riethei ngaitapa ta alei chô râh zydua hry liata a khiekhâ ngâ awpa ta ei tona zydua liata reipachhiepa nata pakhopa nata rapa nata chhiesapa châ awpa ta ei pie aw.
10 Âmo nata ama pawzy hnohta ei piepa râh tawhtapa he palâ khaipa ama châna taihta, âmo hry liata zaozi zy nata chakâhna zy, potlana zy ei tuah aw.”