Zeremiah 26
Zeremiah thina ta ama pachhipary
1 Zudah beipa Zôsiah sawchapawpa Zehôiki ryureina a thaona liata he bie he ABEIPA tawhta vaw tlô ta,
2 “ABEIPA chata he tana heta a tah: ABEIPA o dôhpachhôh liata a duah la, Zudah khihpi zydua achhy awpa ta ABEIPA o liata a vypazy hnohna chata, ama hnohta rei awpa ta bie ei cha piepa zydua, bie miakha hmah phih leipa ta reih khai teh.
3 Chyhsa to ta ama yzie moleipa siesaipa ta ama nahthlie ngyu aw la, ama hmotaopa moleipa vâta ama chô liata hmopha leipa tao ei chhuahpa cha ei pathlei theina hâh ta.
4 Nâma ta ama hnohta, ‘ABEIPA chata he tana heta a tah: Na nahthlie leipa ta nama hmiakô liata ei ryhpa ei sopa zy leipa ta,
5 mydi ta thyupa ta tuapa ta nama hnohta ei tuapa na chakaotuhpa hrohsopa bie nama nahthlie vei khiahtala,
6 he o he Shilôh hawhta tao aw na ta, he khihpi he alei chô liata phopi zydua chhiesapa ta ei tao aw,’ tah mah y.”
7 Theihthaipazy, hrohsopazy nata zawpi zydua chata ABEIPA o liata Zeremiah ta he bie a reipazy he thei ei ta.
8 Zeremiah ta zawpi zydua hnohta rei awpa ta ABEIPA ta a piepa zydua cha a rei khai nahta, theihthaipazy, hrohsopazy nata zawpi zydua chata ano patu ei ta, “Na thi tlai aw!
9 Khazia e ABEIPA moh reipa ta, ‘He o he Shilôh hawhta châ aw ta, he khihpi he roryhrapa ta a y aw,’ tahpa ta na chhochhielie?” tah ei ta. Chatawhcha ABEIPA o liata zawpi zydua chata Zeremiah cha padô ei ta.
10 Zudah abeisawzy chata he hmozy he ama thei nota, abei o tawhtapa ABEIPA o lâta khy ei ta, ABEIPA o a ngiana chhikao thiehpa liata atyuh ei ta.
11 ‘Theihthaipazy nata hrohsopazy chata abeisawzy nata zawpi zydua hnohna chata, “He chyhsa he thi tlâh a châ, he khihpi rao awpa kyh nama nah ta nama theipa hawhta chhochhielie tlôh ta”, tah ei ta.
12 Chatawhcha abeisawzy nata zawpi zydua hnohna chata Zeremiah chata, “Nama bie nahthlie hawpa zydua hawhna khata, he o nata he khihpi rao awpa kyh chhochhielie awpa ta ABEIPA ta eina tuah.
13 Chavâta atahmâ heta nama yzie nata nama taona zie pado ula, ABEIPA nama Khazohpa bie cha a ngiah teh u, chatanachata ABEIPA ta nama chô liata hmopha leipa a tlô awpa a phuah hawpa cha a pathlei thei aw.
14 Kei deikua cha, nama ku liata ei y hih. A do nata a pha nama tahpa hawhta tao teh u.
15 Eina thie khiah eichi tala, nâmo nata he khihpi nata a pahrâpazy chô liata a thaipa” thisaih nama patlôsa tlai aw tahpa pahno thlâh ha teh u, a dopa ta nama nahkhao liata he bie zydua he reih awpa ta ABEIPA ta nama hnohta eina tuah,” tah ta.
16 Chatanachata abeisawzy nata zawpizy chata theithaipazy nata hrohsopa zy hnohna chata, “He chyhsa he thie awpa châ vei, ABEIPA eima Khazohpa moh ta eima hnohta reipa a châ he,” tah ei ta.
17 Chatawhcha cha râh liata machâpa ahyzy tlyma a vaw duah ei ta, zawpi a pakhypazy hnohna chata,
18 “Morese chyhsa Mika chata Zudah beipa Hezekiah abei nona khata chhochhielie ta, Zudah chyhsa zydua hnohna chata: Pheisaihzy ABEIPA chata he tana heta a reih, ‘Zaio cha lyu hawhta paliepa châ aw ta; Zerusale cha hmo chhiepa sopakhyna a châ aw, a o tlâ cha râhhmâhpa su a sâhpa hawhta a châ aw,’ tah ta.
19 Zudah beipa Hezekiah nata Zudah mo zydua khata ano ama thie ma? ABEIPA chipa ta, ABEIPA khokheina cha a haw ei ta, ABEIPA chata âmo liata hmopha leipa a tlô awpa ta a phuapa cha pathleisa haw vei ma? Keimo ta eima chô liata hmopha leipa eima patlôsa aw hih,” tah ei ta.
20 Mo hropa ABEIPA moh ta a chhochhieliepa, Kiriaziari chyhsa Shemaiah sawchapawpa Uriah kha y hra ta, Zeremiah bie reipa zydua hawhta he khihpi nata he râh rao awpa kyh chhochhielie ta.
21 Abei Zehôiki nata a chyhsa thatlôpa zydua nata abeisaw zydua ta ama thei nahta, abei chata thie a chhuah ta, châhrasala Uriah ta a pahno nahta chi ta, a râ haw ta, Izi râh lâta sie haw ta.
22 Chatawhcha Abei Zehôiki chata Izi râh lâta chyhsa tuah ta, Akabaw sawchapawpa Elnatha nata mo hropazy chhaota,
23 chatawhcha Izi râh tawhta Uriah a chhi ei ta, Abei Zehôiki hnohta a vaw chhi ei ta, cha chata zaozi ta thie ta, a ri cha chyhsa nawhpa thlâ liata thy ei ta.
24 Châhrasala Shephana sawchapawpa Ahika chata zawpi hnohta thie awpa ta ama pie lei awpa ta Zeremiah cha a chakhei ta.