Zeremiah 20
Zeremiah ama patâhpa vâta Pahsu chôta chhiesana
1 Ima sawchapawpa, ABEIPA o liata mokhâtuhpa hyutuh chaipa, theihthaipa Pahsu chata Zeremiah ta cha biezy cha a chhochhieliepa thei ta.
2 Pahsu chata hrohsopa Zeremiah tu ta, ABEIPA o liata Benzami kuh ochhi machhua lâtahpa keihrai liana chata patâhsa ta.
3 A vy lâna chata Pashu ta Zeremiah cha keihrai daina tawhta pathlie ta, Zeremiah chata a hnohta, “ABEIPA chata na moh cha Pashu cha bi vei, Kyh to liata chichhipa* tlao a cha bi.
4 ABEIPA chata he tana heta tah tlôh ta: Nâma châta nata na viasa zydua chata rarôypa ta ei cha tao aw. Âmo cha ama khakhaipazy zaozi ta pao aw ei ta, nâ deikua chata na mo ta na moh thlâh ha aw. Zudah sahlao zydua cha Babylaw beipa ku liata pie khai ha aw na ta; âmo cha Babylaw lâta sei ta a chhi aw ta, zaozi ta a thie aw ei.
5 Cha tawhna heih chata khihpi hneirôhna zydua zy, a hmo pasopa zyduazy nata Zudah beizy ryu zydua cha ama khakhaipazy ku liata pie aw na ta, âmo chata hrao aw ei ta, patu aw ei ta, Babylaw lâta amâ chhi aw.
6 Nâ Pashu y, na o liata a pahrâpa zydua chhaota sei ta atâh aw eichi ta; Babylaw lâna chata sie hra aw chi ta; cha liana chata thi aw chi ta, cha liana chata pabupa ta y aw chi ta, nâ nata na viasa zydua haipa bie na chhochhielie tyhpa chhao heta,” tah ta.
Zeremiah chaphôhtuna
7 Hy ABEIPA y, nâ ta na dô chi ta,dôpa ta ei y haw hih; nâ cha kei hlâta thatlôpa châ chi ta,na pahnie chi ta. Noh y ta pahneisaopa ei châ haw; chyhsa ahyrai chhaota eina pahneisao ei hih.
8 Bie ei reina maihta aw na ta, “Nôchhiena nata hraona!” tahpa ta aw na ta. ABEIPA bie cha kei châta cha noh y ta pasipa nata mohnao tona dei a châ.
9 Keima ta, “Ano cha pado leipa aw na ta, â mo ta bie reih khao hra aw va na, “tah hra aw sala, ei rupa chhôh liata mei kâpa a khô hawpa hawhna heta, ei pathipalôh chhôh liana heta y tyh tlôh ta, y molo thei leipa na ta, ei pahnie chachei leipa a châ.
10 Chyhsa hluhpi paphôh parupa ei thei. Su to liata chichhihpa a y! ”Lei ula! Lei ei suh u!” tahpa ta. Ei viasa ei paopa a byh thlâh ha tuhpazy chata,“Dôpa ta y aw ta, eima pahnie aw, a chô liata eima phu eima la aw,” tah ei ta.
11 Châhrasala ABEIPA cha thatlôpa chichhih ngaitapa hawhta ei hnohta y ta; na taolatuhpazy cha pao aw ei ta,na pahnie aw veih ei. Maohphyupa ta y aw ei ta, ama hlaotloh lei awpa vâta. Ama chhâzaw mohchhiena cha mypa ta y aw vei.
12 Hy Pheisaihzy ABEIPA, a siapazy apasiatuhpa, pathipalôh nata palôhrupa a hmô pahlietuhpa, ama chô liata na phuh lana cha na pahmô teh, ei thâtih he cha pavaosa tlôh na ta.
13 ABEIPA lâna chata hla sa ula; ABEIPA cha reithai teh u! Hmo moleipa a taotuhpazy ku tawhta bao a ngiahpazy hrona cha pabohsa tlôh ta.
14 Ei pina noh cha chhiesapa ta y mawh sy! Ei nô ta eina sana no cha, byhnâ awpa ta y hra khah se!
15 Ei paw lâta, “Sawchapawpa na hnei haw,” tahpa bie vaw tlôkheipa ta, a vaw palysatuhpa cha chhiesapa ta y mawh sy.
16 Cha chyhsa cha ABEIPA ta ngiachhie chachei leipa ta, roryhrapa ta a paysapa khihpizy hawhta y mawh sy; my ta cha awpa pyu thei sala nohchhô ta cha zikyurâna pyu,
17 chhi chhôh liata eina thie leipa vâna khata; chata châ sala, ei nô cha ei thlâ a châ thla ha awpa tlaita, a chhi chata chhâzaw ta eina phaoh thlâh ha awpa.
18 Hriapasapa nata pachârôhna ta y awpa ta maohphyu ngaitapa ta ei hro chhôh nohzy hmâ awpa heta, khazia ma chhi tawhta ei pua tly?