Beih keipa achuna
1 ABEIPA chata he tana heta a tah, “Sie la, beihvituhpa beih-lei tithei chalei teh, chatawhcha zawpi sahlao machâzy nata theihthaipa hry liata machâzy a chhi la,
2 Harasi Ochhi a ngiana thaby liata Benhinô Saikao liana chata sie la, cha liana chata na hnohta bie ei cha chho awpa he phuah mah y.
3 He tana heta tah mah y, ‘Zudah beizy nata Zerusale a pahrâpazy saih u, ABEIPA bie he thei teh u, Izarelzy Khazohpa Pheisaihzy ABEIPA chata he tana heta a tah, pachâ teh u, he su liana heta a theipa maih nah parona taihta hmopha leipa ei patlôsa aw.
4 Chyhsazy chata na pathlua ei ta, he su he papua ei ta, âmo nata ama pawzy nata Zudah abeizy chhaota ama pahno beih leipa khazoh hropazy hnohta ropahâhpa ama raopa vâta nata he su he a thaipa thisaih ta ama pabiepa vâta nata,
5 Baal hnohta raopa hlânazy chata ama sawzy ama raona awpa ta Baal su sâhpa zy ama taopa vâta, cha cha ei biepiepa châ leipa ta, reih hra leipa na ta, ei pathipalôh liata chhao y beih hra vei;
6 chavâta nohzy a vaw tlô aw, ABEIPA ta a tah, cha nohzy liana chata he su he, Tôphe bipa châ khao leipa aw ta, Benhinô Saikao bipa châ hra aw vei, Thina Saikao bipa ta tlao a châ ha aw.
7 He su liana heta Zudah nata Zerusale hmo a chhuahpazy cha hrao leipa ta pachâsa aw na ta, âmo cha zaozi ta ama khakhaipazy hmiakô liata nata ama hrona la a chhuahtuhpazy ku liata ei papao aw. Ama rizy cha avâ pavawzy nata alei liata sahrâhpazy niepa châta ei pie aw.
8 He khihpi he noâhpa châta nata pasipa ta tao aw na ta; a siepa maih potlanazy vâna chata noâhpa ta y aw ei ta, ama pasi hra aw.
9 Ama sawchapawzy nata ama sawchanôzy sapa paniesa aw na ta, chatawhcha ama khakhaipazy nata ama hrona la a chhuahtuhpazy ta chadopa ta nôpopa ta ama paysa tina chata, ahyrai ta ama vaihzy sapa ama nie aw.’
10 “Chatawhcha na sielâhpazy mohmô liata tithei cha pakei aw chi ta,
11 âmo hnohta he tana heta tah mah y, ‘Pheisaihzy ABEIPA chata he tana heta a tah: He hawhna hra heta he chyhsazy nata he khihpi he ei pakei aw, beihvituhpa beih chyhpa ta pakei ta tao pathi heih awpa rimâ a châ leipa hawhna heta. Tôphe liata ama pabu aw, pabuna su a y khao leina taihta.
12 Cha tlatluna chata he su he ei tao aw, ABEIPA ta a tah, cha hawhna hra chata he khihpi he Tôphe hawhta taona taihta a chhôh liata a pahrâpazy chô liata chhao ei tao aw.
13 Zerusale ozy nata Zudah abei sahlao ozy, o to ta vâphuh liata avâ lâ hmo zy hnohta ropahâhpa rao hawna zydua nata khazoh hropazy hnohta dopa hlâna patlai hawhna zydua cha Tôphe su hawh tlaita papuapaleipa ta a châ aw.’”
14 Zeremiah cha ABEIPA ta bie reih awpa ta a tuana su Tôphe tawhna chata a vy ta, ABEIPA o dôhpachhôh liana chata a duah ta, zawpi zydua hnohna chata he tana heta tah ta:
15 “Izarelzy Khazohpa Pheisaihzy ABEIPA chata he tana heta a tah, hmopha leipa ei reipa zydua kha, he khihpi nata khi hropa zydua liana heta ei vaw patlôsa aw, ei bie nahthlie awpa ta ama pathipalôh ama pachyupa vâta.”