Zerusale pahleipadiana chhochhieliena
1 Abei Zedekiah ta Malkiah sawchapawpa Pashu nata Maasei sawchapawpa theihthaipa Zephania zy cha Zeremiah hnohta,
2 “Babylaw beipa Nebukaneza chata maniah a dyuh haw tlôh ta, ABEIPA chata a hmotao rôhnahpa a tao tyhpa hawhna khata maniah bao khopa ta pakuasa heih aw vei ma, tahpa ABEIPA na vaw hiahripa mawh sy,” tah awpa ta a chhohia tua nona khata, Zeremiah hnohta ABEIPA bie a vaw tlôpa cha he he a châ.
3 Zeremiah chata âmo hnohta:
4 “Zedekiah hnohna chata he hawhna heta kei reih teh u, ‘Izarel Khazohpa ABEIPA chata he tana heta a tah: Babylaw bei nata Kaldia chyhsa kuh khôtho lâta cha chadôtuhpa na dyuhna chhaichhi ei vaw pakuasa aw; he khihpi chhôh liana heta ano cha ei pahmaoh aw.
5 Keima tlai chhaota hiehâhpa lâta palôh châ leipa pathi-iapa ta, bâh pazawhpa ta, bâ thatlôpa hmâpa ta ei châ dyuh aw.
6 He khihpi liata a pahrâpa chyhsazy nata sahrohzy he thie aw na ta; potlana ru ngaitapa ta ama thi aw.
7 Cha hnôh lâna chata ABEIPA chata Zudah bei Zedekiah nata a chakaopazy nata mo hropa, he khihpi liata potlana nata zaozi nata chakâhpa ta a thi leipazy cha Babylaw bei Nebukaneza ku liata nata ama khakhaipazy ku liata nata âmo thie a chhuahtuhpazy ku liana chata ei pie aw. Zaozi tiahpa ta thie aw ta; pahlôh hra leipa aw ta, ngiachhie chachei leipa aw ta, zaw a ngiah hra aw vei,’ a tah.
8 “Chatawhcha he chyhsazy hnohna heta he tana heta reih teh, ‘ABEIPA chata he tana heta a tah: Hrona lâpi nata thina lâpi ei cha sopa ei hih.
9 He khihpi chhôh liata a ypa cha zaozi ta tlyma, chakâhna ta tlyma, potlana ta tlyma ama thi aw; Kaldia cha chadôtuhpa hnohta puapa ta, anosasyh ta a pihpazy deikua cha ama hro cha hraona châta a châ aw.
10 He khihpi phana awpa a châ leipa, a chhiena awpa khâchâ ei chhuah haw; Babylaw beipa ku liata piepa châ aw ta, ano chata mei ta a rao aw, ABEIPA ta a tah.
Zudah beizy lâta chhochhieliena biezy
11 “Zudah bei chhôhkhapazy kyh liana cha‘ABEIPA bie he nahthlie teh u!
12 Hy Davi chhôhkhapazy saih u! Hetana heta ABEIPA chata a tah: “My na chata pachiana a dopa ta pachia ula, taolatuhpa ku tawhta hraona pasa ataopa cha pachha ula, chata leipa ta cha ei pathi-iana mei hawhta pua aw ta, ahyhmah pachhai thei leipa ta a kâ aw na, nama hmo moleipa taopa vâna heta.”
13 “Hy saikao liata a pahrâpazy saih u, nâmo bypi lôpanô liata pahrâpa ta, ‘Ahyma maniah zuhnao aw ta, ahyma eima yna liata a vaw ngia aw? a tahtuhpazy saih u, ei châ dyuh aw ei na, ABEIPA ta a tah.
14 Nama hmotaopa theilâpa lymâ hawhta cha hrie aw ei na ta; a râh thothi liana chata mei patih aw na ta, a chheipa zydua cha a kâ patlô aw, ABEIPA ta a tah.”