Beihvituhpa beih-lei achuna
1 ABEIPA tawhta Zeremiah hnohta bie a vaw tlôpa chata:
2 “Thyu la, beihvituhpa o lâna chata zu la, cha liana chata ei biezy ei cha pahnosa aw,” tah ta.
3 Chatanachata beihvituhpa o lâna chata zu na ta, beih taona a hlôpa liana chata rai vaw hria ta.
4 Chatawhcha beih-lei ta beih a vi haipa cha a pha leipa khiahta cha, beihvituhpa chata a pha a tahna zie hawhta beih hropa lâta vi heih tyh ta
5 Chatanachata ABEIPA bie cha ei hnohta vaw tlô heih ta:
6 “Hy Izarel chhôhkhapa saih u, he beihvituhpa hawhna heta cha tao thei vei eina mâ? ABEIPA ta a tah. Beihvituhpa ku liata beih-lei hawhna heta ei ku liata nama y, hy Izarel chhôhkhapa saih u.
7 Khatita rai phopi tlyma, khihnarâh tlyma phia aw na ta, pachhaih aw na ta, ei parao aw, tahpa ta a vaw reipa rai châ aw sala,
8 cha phopi chata a thâtih ei reipa vâta a hmo moleina tawhta a heisai khiahtala, a chô liata hmopha leipa tao ei chhuahpa cha ei pathlei aw.
9 Khatita rai phopi tlyma nata khihnarâh tlyma kyh liata tao aw na ta ei padua aw, tahpa ta a vaw reipa rai châ aw sala,
10 ei reikah nahthlie leipa ta, ei mohmôna liata hmopha leipa a tao khiahtala, ano chata hmophapa tao ei chhuahpa cha ei pathlei aw.
11 Chavâta atahmâ Zudah chyhsazy nata Zerusale liata a pahrâpazy hnohna chata: ‘ABEIPA chata he tana heta a tah, nama chô liata hmopha leipa a chhuah na ta, ei pachâ. Atahmâ chyhsa to ta ama yzie pha leipa a heisai ei sala, nama yzie nata nama hmotaopazy tao pathi teh u,’ tah mah y.
12 “Châhrasala âmo ta la, ‘Hnabeiseina rai y vei! Keimo pachâna hawhta y aw pi ta, chyhsa to âmo palôhrupa pachâna moleipa lymâ hawhta eima y aw,’ ama tah tyh.
13 “Chavâta ABEIPA ta he tana heta a tah: Phopizy hiahri tua rai teh u,he hawhpa he ahy e a pahno beih tly?Laihsakôpa Izarel chata hmo chichhihpa a tao haw hih.
14 Lebanaw dâhaw chata tlâh laki a pathai beih ma? Lâ hlapi tawhta ti chakuapa a za lohpa a kua beih ma?
15 Ei chyhsa deikua chata na my ei ta, khâpahrao leipa hnohta rohpahâhpa rao ei ta; ama siena awpa liata a pakhâsa ei ta, lâpi parohpa cha a chhih khao leipa ei ta, lâpi hmeiseih leipa lachô lâta a chhi ei ta,
16 a râh cha roryhrapa ta ama paysa, chhâzaw ta pasi awpa ta. A chapiapa maihta noâhpa ta ama luh ama chahuah.
17 Nochhi thlih hawhta khakhaipa hmiakô liata ei papai aw. Ama vâchhiena noh liana chata ei hmia châ leipa ta,ei hnokhi ei pamosa aw.”
Chyhsa bie paraona nata Zeremiah thlahchhâna
18 Âmo chata, “A vy ula, Zeremiah he tei ei suh u, theihthaipa tawhta ryhpa dia tlôh leipa aw ta, chyhsa sopa tawhta chhosiena dia hra leipa aw ta, hrohsopa tawhta bie dia hra aw vei. A vy ula, thata reipachhie ei suh u, a bie rai a papeisa leipa ta y ei suh u,” tah ei ta.
19 Na pachâ la, hy ABEIPA y,ei hiana he nahthlie mah y.
20 Moleina he hmophapa viarithôna a châ beih ma? Anodeikua cha ei hrona chata khaotlô chao ei ta. Âmo tawhta na pathi-iana pasai awpa nata âmo châta hmophapa reih awpa ta, na hmiakô liata ei duah tyhpa kha a thei thlâh ha mah y.
21 Chavâta ama sawzy cha chakâhna patysa la: zaozi thatlôna patosa teh, ama lahpinôzy saw pahleipa ta nôhmei ei se. Ama chapawzy hri ta thi ei sala, ama satliazy chhao adyuhna liata zaozi ta thie ei se.
22 Hraotuhpazy âmo lâta sôkhata na patlôsa nota ama o tawhta chapa pyu theipa ta y mawh sy! Na patu awpa ta khaotlô chao tlôh ei ta, ei phei a aona awpa ta khohei chôh tlôh ei ta.
23 Châhrasala nâ ta, hy ABEIPA, thi awpa ta eina teina zydua na pahno na. Ama hmoparaona a ngiahthai leipa la,na mohmô liata ama moleina pahlei hra khâ. Na hmiakô liana chata pao chyu ei sala; na hiehâhna noh liana chata âmo chôta tao mah y.