Zeremiah 15
Zudah chôta ABEIPA hiehâhna a dia thei leipa
1 ABEIPA chata ei hnohta, “Mawsi nata Samuel cha ei hmiakô liata a vaw duah hra ei sala, ei pathipalôh he chyhsazy lâna he a heih hlei aw vei. Ei hmô thei leina lâta papua la, sie syulyu se!
2 Âmo chata na hnohta, ‘Khataih lâ eima sie aw?’ ama cha tah khiahtala ama hnohta, ‘He tana heta ABEIPA ta a tah:“Thina châta a chapazy cha thina lâ; zaozi châta a a chapazy cha zaozi lâ; chakâhna châta a chapazy cha chakâhna lâ; seichana châta a chapazy cha seichâna lâta,” na tah awpa a châ.
3 “Âmo chô liata chi palih ei raopa aw, ABEIPA ta a tah: thina awpa ta zaozi, hri charei na awpa ta i zy, nie khaipa nata pahleipadia awpa ta avâ pavawzy nata lyurâhpa sahrâhpa zy.
4 Zudah beipa Hezekiah sawchapawpa Manase ta Zerusale liata a taopa vâta alei khihnarâh zydua hry liata a pasie ngâpa ta ei tao aw.
5 “Hy Zerusale y, ahy e cha ngiachhie aw? Ahy e cha pachârôhkhei aw? Na yzie hiahri awpa ta ahy e a vaw tlei aw tly?
6 Nâ ta na thy chi ta, hnôh lâ nâ sy lymâ, ABEIPA ta a tah;nâ chado na ai ta, na chô liata ei ku pathla na ta, ei cha pahleipadia.
7 Râh zydua kuh chhikaozy liana chata zina ta âmo ei zi haw; saw luh pahleipa ta tao na ta, ei chyhsazy pahleipadia na ta; ama yzie ama pathlei leipa vâta.
8 Tilaipi leisadi hlâta a hluhpa ta ama nôhmeizy papôh na ta; nohchhô ta satliapazy, nohzy chô liana chata hraotuhpa patlôsa na ta; nôpona nata hmo rarôhypa sôkha ta ei patlô thlusa.
9 Pasari a satuhpa cha panao ha ta; a thlahpa a pathlie haw; nohchhô a châ nota a no khô haw ta;nozapa ta a mo chhi ta. A laibâhpa zy cha ama khakhaipa zy ku liata zaozi ta thie awpa ta ei pie aw, ABEIPA ta a tah.”
10 Ei nâ y, alei zydua liata chalyuchalituhpa nata a eituhpa ta eina sapa chi he, ei hu a po kaw dia, a pôh awpa ta dyu pacheisa leipa na ta, a pôh awpa ta dyu chei hra va na, châhrasala ama zydua ta chhie na sapa tlôh ei ta.
11 ABEIPA chata hmeiseipa ta cha hmo phapa châta ei cha pa-i aw, hmeiseihpa ta cha chhiena noh nata rietheina noh liata khakhaipa a vypa ta na hnohta ei hiapa vei khiahtala! tah ta.
12 Chyhsa ta thua, maw lâta thua nata dawh cha a parao thei aw mâ?
13 “Na moleinazy vâna heta na sôh nata na ryu hmozy cha a mâ leipa ta hraona châta ei pie aw, na râh zydua ta.
14 Râh na pahno beih leipa liana chata na khakhaipazy chakao awpa ta ei cha tao aw, ei hiehâhpa vâta mei pati awpa a ypa chata na chô liata cha kâ tlôh aw ta,” tah ta.
Zeremiah hnohta Abeipa bietaina
15 Hy ABEIPA y, nâ ta na pahno na; nâ thei thlâh ha la, na tly mah y, na taolatuhpazy chô liata phuh na lapa mah y. Na chadona he kei ta leidia pâ leipa aw sala; nâma vâta mohchhie a phaohpa ei châ tahpa pahno mah y.
16 Na biezy cha hmôpa châ ta, nie na ta, na biezy cha ei châta lyna nata pathipalôh thaphana a châ; Hy ABEIPA Pheisaihzy Khazohpa na moh phaoh haw tlôh na ta.
17 Phasana chakaotuhpa sahlao hry liata a hlao leipa nata thaphakhei hra va na; nama ku vâta ano ei ta atyu na ta, palôh châ leina ta na pabie tlôh chi ta.
18 Khazia ma ei pasapa pai thei leipa ta, ei hmah a tlâh thei vei? Kei lâta vatiepa doh a hmâhpa ti a kua tyhpa hawhta na châ aw ma?
19 Chavâta ABEIPA chata he tana heta a tah: “Na kua khiahtala ei cha tao pathi aw, ei hmiakô liata nâ duah heih aw na. “Hmo phahnai leipa tawhta hmo sôpa sai na reih khiahtala keima pakah hawhta na châ aw. Âmo chata nâ lâta a vaw heih ei sala,nâ deikua chata âmo lâta nâ heih awpa châ vei.
20 He chyhsazy liana heta dawh kuh pâhchhô ta cha tao aw na ta; châ dyuh aw ei ta, châhrasala cha pahnie aw veih ei, cha pachha awpa nata pabohsa awpa ta na hnohta y tlôh na ta, ABEIPA ta a tah.
21 Hmoparaopazy ku tawhta cha pachha aw na ta, nôchhiepazy ku tawhta ei cha chatlai aw.