ABEIPA ta zawpizy a pachâna
1 ABEIPA bie cha ei hnohta vaw tlô ta:
2 “Lahpinô na hnei awpa châ leipa ta, he su liana heta sawchapawzy nata sawchanôzy na hnei awpa châ hra vei.
3 Sawchapaw nata sawchanô he su liata a pihpazy nata he râh liata paw nata nô âmo a satuhpazy kyh liana chata, ABEIPA ta he tana heta a tah:
4 Hri ta thi aw ei ta. Ahyhmah chakhei leipa nata ahyhmah pabu leipa ta ama y aw; alei chô liata i hawhta ama châ aw. Zaozi zy, chakâhnazy ta leidia aw ei ta,’ ama rizy cha avâ pavawzy nata lyurâhpa sazy niepa a châ aw.
5 “ABEIPA chata he tana heta a tah: mâchhiesapa o liata a ngia khâ, mâchhiesa awpa ta vawh khâ, âmo chakhei khâ; he chyhsazy tawhna heta ei thlahlôhna la haw tlôh na ta, kyhpachâ ngiachhiena nata zawngiahna chhaota, ABEIPA ta a tah.
6 He râh liana heta a laipa nata a nawhpazy thi aw ei ta; pabupa châ leipa ei ta, ahyhmah ta mâchhiesa leipa aw ei ta, a âpa ta, a pôlôpa ta a ngyu hra aw veih ei.
7 Mâchhiesapazy cha athihpa amâ ngiahna thlahpalôh awpa ta ahyhmah ta niepa pie leipa aw ei ta; ama paw tlyma, ama nô tlyma vâta chhao palôhtlâhna nyu doh awpa ahyhmah ta pie hra aw veih ei.
8 Nie nata dona liata ama hryta atyuh awpa ta kyhchhina liata a ngia hra aw va chi.
9 Pheisaihzy ABEIPA, Izarel Khazohpa chata he tana heta tah tlôh ta: Nama mohmô liata nama hroh chhôhna heta alyna pyu zy, thaphana pyu zy, myuh a hneituhpa ao zy, myuh ao zy he su liana heta ei padia aw na.
10 “He bie zydua he, he chyhsa hnohta na chho tita âmo chata, ‘Khâpavâta e ABEIPA ta eima chô liata he hawhta hmopha leipa a vaw reih tly? Khâpama eimâ paraoh tly? ABEIPA eima Khazohpa chô liata eima molei hmoparaona cha khâpa e a châ?’ ama cha tah khiahta cha,
11 he hawhna heta na tah aw: ‘Nama mahpawzy ta eina siesai vâ ei ta a châ, khazoh hrozy a chadai ei ta, chakao ei ta, achhy ei ta, na siesai ei ta, ei ryhpa bie zyh leipa ei ta,
12 nâmo chata nama pawzy hlâta moleina a ru viata tao eichi ta, nahthlie teh u, chyhsa to ta ama palôhrupa chhoruna moleina lâ zi eichi ta, kei na nahthlie leipa eichi ta;
13 ‘chavâta he râh tawhtapa he nâmo nata nama pawzy chhaota nama pahno beih leipa râh liana chata cha papua aw ei na ta, cha liana chata a chhô a zâ ta khazoh hropazy nama chakao aw, cha ngiachhie khao tlôh leipa aw ei na ta,’ ABEIPA ta a tah.
14 “Chavâta pachâ teh u, nohzy a vaw tlô aw, ABEIPA ta a tah, ‘Izarel sawzy Izi râh tawhta ABEIPA a chhithatuhpa a hrota a hro chhôh cha,’ tah khao leipa ta,
15 ‘Maw lâ râh nata a chadai paina râh zydua tawhta Izarel pathlazy a chhithatuhpa ABEIPA a hrota a hro chhôh cha,’ tlao ama tah aw. Ama mahpawzy hnohta ei piepa âmo râh liana tlai chata chhihtha heih aw na ta.
16 “Nga patutuhpa hluhpi bie ta aw na ta, âmo ta ama patu aw; cha khai tawhna chata râh a khietuhpa a hluhpi bie ei ta aw, tlâh to nata tlâh byuhpa to liata nata lôpanô khaoh liatazy chhao ama tlua aw.
17 Ama yzie zydua liana chata ei mo y tlôh ta; keima tawhta nyupa ta y leipa ta ama hmo paraonazy chhao ei mo tawhta nyupa ta y hra vei.
18 Chatanachata ama hmo pasichhihpa rizy ta ei râh ama papuapaleipa nata ama pasichhihna liata ei ryutona’ râh ama pabiepa vâta, ama moleina nata ama paraona cha a lie nota ei thô aw, ABEIPA ta a tah.”
19 Hy ABEIPA y, ei thatlôna nata ei kuh nôpo nota ei pabohna, kaokih tawhta phopizy a vy aw ei ta: “Eima mahpawzy chata haipa hmophahnai leipa, a thôhna a hnei leipa dei leipa cha khâpa hmah ryuto veih ei.
20 Chyhsa ta anosasyh chata khazohzy a tao thei ma? Chazy cha khazoh nah kaw châ ei va, “ama tah aw.
21 “Chavâta pachâ teh u, atahmâ heta âmo ei pahnosa tua aw, ei ku nata ei hmotaotheina pahnosa aw na ta, ei moh he ABEIPA a châ tahpa ama pahno aw.”