Noh kâhpa kyh bie piepa thâtih
1 Noh kâhpa kyh liata Zeremiah hnohta ABEIPA bie a vaw tlôpa cha:
2 “Zudah chata mâchhie sa ta, a khihpizy a ry; alei liata chaphôhtuhpa ta amâ byu, Zerusale chapa ao cha a pathluah ngâ ta.
3 Chyhsa phapazy ta ama chakaotuhpazy ti pathai sa ei ta; ti pa-ona lâ vawh ei ta, ti hmô veih ei, ama tibeih a ruapa ta kua ei ta; nozapa nata nomaohpa ta y ei ta, ama luh amâ khu.
4 Râh liata vâsua y leipa vâta alei a kai, alei a palietuhpazy cha nozapa ta y ei ta, ama luh amâ khu.
5 Sasu cha lyu liata patawh ta, sibiepa a y leipa vâta a siesai.
6 Alâ hrâhpazy cha a byupa pathaihparohpa liata a duah ei ta, sihâ hawhta ama hu tô ei ta; nie awpa a y leipa vâta ama mo a zoh.
7 “Eima hmoparaona chata maniah leih hra sala,na moh vâta, Hy ABEIPA y, vaw hria mah y; eima paonazy hluh tlôh ta,na chô liata tlai molei haw pi ta.
8 Hy Izarel sahlao hnabeiseipa, nôpo nota pachhatuhpa y, khazia e, he râh liana heta khichhaipa hawhta zâ kha rie ta khi a tlyhpa hawh deita ta na y tly?
9 Khazia ma nomaohpa hawhta nata thatlôpa pachha thei tlôh leipa hawhta na y tly? Châhrasala nâ cha Hy ABEIPA, eima hry liata y chi ta, na moh phaoh pi ta; maniah siesai khah y.”
10 ABEIPA chata he chyhsazy kyh liana he, he tana heta a tah; “Viavi khoh tyh ei ta, ama phei chakâna pakhâ veih ei; chavâta ABEIPA ta âmo cha a pyh leipa ta, ama hmoparaona cha a thei thlâh ha aw ta, ama moleinazy cha a hrie aw.”
11 ABEIPA ta ei hnohta, “He chyhsazy phana awpa heta thlahchhâ khâ.
12 Nie leipa ta y hra ei sala, ama awpa cha nahthlie aw va na, raopa hlâna nata atheihna hlâ hra ei sala, a pyh aw va na; potlana zy, zaozi zy, chakâhna zy ta âmo tlao ei pahleipadia aw,” tah ta.
13 Chatawhcha kei chata, “Aw ABEIPA Khazohpa, pachâ tua, âmo hnohta hrohsopazy ta, ‘Zaozi a tyh leipa aw eichi ta, chakâhna pasa tao hra aw vei eichi, he su liana heta thlahlôhna tlao ei cha pie aw ei,’ ama tah tyh mâh tâh,” tah na ta.
14 ABEIPA chata ei hnohta, “Hrohsopazy chata keima moh ta haipa ta ama chhochhielie tyh; âmo cha tuah leipa na ta, bie ta leipa na ta, chho hra va na. Âmo mohmô leipazy, dyuthaipa dyutlai leipazy nata ama palôhrupa hainazy a cha chho ei,” tah ta.
15 Chavâta ABEIPA chata he tana heta a tah, tuah tlôh leipa hrohsopazy ei moh reipa ta, ‘He râh liana heta zaozi nata chakâhna tlô aw vei,’ tahpa ta a chhotuhpa lâta hrohsopazy cha zaozi nata chakâhna ta ama leidia aw.
16 Ama kei chhopa chyhsa chhao he, chakâhna nata zaozi vâta Zerusale othliah liana chata thypa châ aw ei ta, âmo nata ama lahpinô zy, ama sawchapaw zy, ama sawchanô zy chhaota, a pabutuhpa rai y aw veih ei. Ama hmoparaona cha âmo chô liata leihtha tlôh aw na ta.
17 “Ama hnohta he bie he na reih awpa a châ: ‘A chhô a zâ ta ei mothlih loh mawh sy, hie chachei kha sa, ei chyhsa ei sawchanô laihsakôpa chata paraona lai kawpa ta pasa a tao, hmah ru ngaitapa cha.
18 Lyu lâ ei pua nahta, zaozi ta thiepazy! Khihpi lâ ei ngia nahta, chakâh mozohpa zy! Hrohsopazy nata theihthaipazy cha râh liata a khiekhâ ei ta, a pachâna rai pahno veih ei, ’tahpa ta.”
19 Zudah cha na thy pathlah ma? Zaio cha na pasie haw ma? Eima châta patlâhna y leipa ta, Kheihta zie ta e pasa mania na pataosa? Thlahlôhna tlua pi ta, phana khâpa hmah vaw tlô vei; patlâhna daihti awpa chhao, pachâ tua, thlahzona dei.
20 Hy ABEIPA, eima pasichhihna kyh nata eima mahpawzy hmoparaona chhaota eima cha pahnosa, nâ lâta molei haw tlôh pi ta.
21 Na moh vâna chata maniah pasi khah y; na rôhnahna beidyuchhai moh pachhie khah y; eima hnohta na biehraipa cha a thei thlâh hapa ta parao khâ.
22 Pho hropa khazohzy hry liata avâ a pasuasa theipa ama y ma? Cha khiahla avâ ta vâsua rupa a pasuasa thei ma? Hy ABEIPA eima Khazohpa, cha cha nâ châ va chi ma?He hmo zydua he na taopa cha tlôh ta, eima hnabeisei chaipa nâma na châ.