Chaisaina raopa pamosana
1 ABEIPA chata ei hnohta he tana heta tah ta, “Sie la, lini chaisaihna chalei la, na chai a saih teh, ti liata ny khâ.”
2 Chatanachata ABEIPA bie hawhta chaisaihna cha chalei na ta, ei saih.
3 Chatawhcha ABEIPA bie cha a ei nona ta ei hnohta vaw tlô heih ta
4 “Chaisaihna na chaleipa nâ saipa kha la la, thyu la, Euphrate chavah pangai la, cha liata lôpanô khaoh liana chata nyu teh,” tahpa ta.
5 Chatanachata ABEIPA bie eina piepa hawhta sie na ta, Euphrate chavah kiapâh liana chata nyu haw na ta.
6 Chatawhcha noh hluhpi tawhna chata ABEIPA ta ei hnohta, “Thyu la, Euphrate chavah pangai la, chaisaihna ei cha panyusapa kha la teh,” tah ta.
7 Chatanachata Euphrate chavah lâna chata sie na ta, chaisaihna cha ei nyuna tawhtapa thaoh na ta. Pachâ teh, chaisaihna cha rao haw ta; khâpa châta hmahta pahnai khao vei.
8 Chatanachata ABEIPA bie cha ei hnohta vaw tlô ta:
9 “ABEIPA chata he tana heta a tah: He hawhna hra heta Zudah a palaikheipa nata Zerusale a palaikhei ngaitapa cha ei parao aw.
10 He chyhsa moleipa ei biezy nahthlie khoh leipa ta, âmo palôhrupa kuhchhana zipa ta khazoh hropazy chakaopa nata achhy awpa ta a chadaituhpazy he, he chaisaihna khâpa châta hmahta a phahnai leipa hawhpa he ama châ aw.
11 Chaisaihna cha chyhsa chai liata a bai thlâh hapa hawhna heta Izarel chhôhkhapa zydua nata Zudah chhôhkhapa zydua he ei chyhsazy nata ei moh pathâhna nata ei ngiana nata ei rôhnahna ama vaw châ thei nawpa ta, a saipa ta a bai thlâh ha awpa ta ei taopa châ tlôh ei ta, ABEIPA ta a tah, châhrasala thei khoh veih ei.
Titheih to a biepa pamosana
12 “He bie he ama hnohta na rei awpa a châ: ‘ABEIPA Izarel Khazohpa ta,’ a tah. “Titheih to kresawti ta pabie awpa a châ,” tahpa ta. Chatawhcha âmo ta na hnohta, ‘Titheih to kresawti ta a bie aw, tahpa cha pahno ma pi ma?’ tah aw ei ta.
13 Chatawhcha nâ ta ama hnohta, ‘ABEIPA chata he tana heta a tah: Pachâ teh, he râh heta a pahrâpa zydua, Davi ryureina dyuchhai liata atyuhpa abeizy, theihthaipazy, hrohsopazy nata Zerusale liata a pahrâpa zydua parina ta ei palie aw.
14 Âmo cha pakhysa aw na ta, pawzy ama sawchapawzy chhao tlaita, ABEIPA ta a tah. Âmo ei pahleipadia leina taihta la âmo cha ngâchhihpa ta pahlôhpa ta ei tha pasa awvei.”
Zudah ro khoh leina vâta seichâna pachhiparyna:
15 Nahthlie ula, nah pachôh teh u; apalai khah u, ABEIPA chata reih haw tlôh ta.
16 ABEIPA nama Khazohpa cha palyupalih ula, zohna a patlôsa hlâta a zoh chyta tlâh chô liata zy, nama phei a hlua hlâna heta khaihna nama hnabeisei hai nota, zohna lâta pachâsa ta, zohkaluhpa lâta a tao ei ta.
17 Châhrasala nama nahthlie vei khiahtala, namâ palaina vâta su dâhthlohpa liata ei cha ngâthlâh aw; ei mothlih chhao thata tla aw ta,a loh ngâthlâh ha aw, ABEIPA mietahkupa zaw cha seichâna ta a chhipa ama châpa vâta.
18 Abei nata a no hnohna chata; “A hnaipa ta atyuh teh u, nama lakhozy tla haw tlôh ta, nama rôhnahna lakho tlai cha,” tah ta.
19 Neke khihpizy cha a po khai haw, ahy hmah pahy awpa rimâ châ leipa ta; Zudah zydua seichâna ta amâ tâh, tlokhuh ta amâ tâh khai haw.
20 “Mo hmia pasaih teh u, maw lâ tawhta a vaw thyupazy huh. Mietahkupa zaw na hneipa kha na mietahkupa zaw kho chhih ngaitapa kha khataihta e a y?
21 Nama ta viasa ta na taopazy kha, na chô liata ama so tina chata kheihta e na tah aw? Chanô saw a zeipa hawhna heta pasa kawpa ta y aw va chi ma?
22 Na pathipalôh liata, ’Khâpa vâta ma hezy he ei chôta a vaw tlô?’ na tah khiahtala. Na hmoparaona vâta na hnorâh hlaipa châ ta,tao chhiepa ta na y.
23 Ethiôpia chyhsa ta vo pananopa ta, keichho ta a chei a panano thei ma? Chata a châ khiahta cha nâmo hmo moleina a tao tyhpazy chhaota, hmophapa nama tao thei aw cha.
24 Râhpathohpa ziza ta sâhkô a phaohpa hawh tlaita âmo ei papai aw.
25 He he na tovyuh na châta ei cha raopapa cha a châ, na my chi ta, haipa nâ ngâhchhâpa vâta.
26 Keima tlaita na hnorâh cha na hmia akhuna taihta cha hlaipa aw na ta, na nozana a la aw.
27 Nâ pheinazy, na sâna pyuzy, na moleina pachâna sihryna zy nata tlâh chôta lyuzy liata na pasi a chhihna kyh ei hmô haw. Hy Zerusale râh hu a pona! Pathaisapa ta na y hlâ cha khachâ e a châ aw?”