Isai 66
Abeipa pachianazy nata Zaio nohhlao nawpa zie
1 ABEIPA chata he tana heta a tah: Avâ ei beidyuchhai châ ta, alei ei phei tlyna a châ; o kheihawhpa e eina sapa aw eichi? Khataih su e ei pahâna awpa cha?
2 He hmo zydua he ei ku ta ei taopa châ tlôh ta, chatanachata he hmo zydua he keima eih a châ, ABEIPA ta a tah. Châhrasala he hawhpa chyhsa lâna heta ei moh aw, Chyhsa a panawhpa ta a ypa nata palôhrupa a ngiapachhi ngaitapa, ei bie liata a chalyu tyhpa hih.
3 “Viahchao tôhpa a thietuhpa cha chyhsa a thietuhpa hawhta châ ta; mietahkupa taw ta atheihtuhpa cha i rao ataituhpa hawhta châ ta; hlâna ahlâtuhpa cha viahchao thisaih a hlâtuhpa hawhta châ ta; deiryh a raotuhpa cha khazoh nohthlahpa byhnâ a awtuhpa hawhta a châ. Âmo lâthlôh cha a tlyh haw ei ta, âmo hmo pasichhihpa zy liana chata ama palôhrupa â ly tyh.
4 Ei aw nona khata ahy hmahta nâ chhy leipa ei ta; bie ei rei nona khata nah ta thei leipa ei ta; ei mohmôna liata hmo moleina cha tlao ama tao, ei hmo ly leipazy cha amâ tlyhpa vâta kei chhaota âmo châta pasana ei tly pa aw ei, ama chipazy cha ama chô liata ei patlôsa aw,” tahpa ta.
5 A bie liata a chalyu tyhpa saih u, ABEIPA bie he thei teh u: Nama unawhpa nâmo châ haotuhpa nata ei moh vâta nâmo cha papua tyhpazy chata, Namâ lyna ei hmô thei nawpa ta ABEIPA cha a rôhnahna pamosa mawh sy,” tah ei ta, châhrasala cha chata ama no a pazasa aw.
6 “Cha khihpi liata a paro ngâpa pyu cha achhyna-o liata ao a châ! A khakhaipa viari a thôtuhpa ABEIPA ao a châ chuh!
7 Ano chata azei hmâ leipa ta saw sa ta, pasa hmâ leipa ta sawchapawpa sa ta.
8 Cha hawpa cha ahy e a pahno beih? Cha hawhpazy cha ahy e a hmô beih? Noh kha ta râh sôkha ta a pie aw ma? Ei kha ta phopi sapa ta a y aw ma? Zaio chata nawh a zei nata a sawzy cha sa tlôh ta.
9 Sana daihti patlôsa tlôh ta, pasasa aw vana mâ? ABEIPA ta a tah; kei a pasasa tyhtuhpa heta a chhi ei khaw aw mâ? na Khazohpa ta tah.
10 Zerusale kyh a pachâtuhpa zydua saih u, Zerusale cha tha phakhei ula, alykhei teh u; mâchhie a satuhpa zydua saih u, alyna vâta thapha khei teh u;
11 pazy eichi ta, a thatlôna sâhpi liatazy nama lôhrâ tlô thei nawpa nata nama pazypa ta a rôhnahna hluh ngaitapa liana chata namâ ly thei nawpa ta,” tahpa he.
12 ABEIPA chata he hawhna heta tah tlôh ta: Aryhna cha chavah laipa hawhta ano lâna chata palosa aw na ta, phopi rôhnahna cha vatie kao a khô ngâpa hawhta ano lâ taihta ei palosa hra aw; cha cha nama pazy aw, a kâ lâta a byh chô liana chata a châ pyh aw ei, pakhu liata pasuapalipa ta na y aw.
13 Chyhsa, a nô ta thlah a palôhpa hawhta, thlah ei cha palôh aw ei; chatanachata Zerusale lâna chata thlahlôhpa ta nama y aw.
14 Cha cha hmô aw eichi ta, nama pathipalôh cha a tha pha aw ta; nama ruzy chhao sibiepa a hrohpa hawhta a laiseih aw; chatanachata ABEIPA ku cha a chakaotuhpazy lâta a y tahpa pahno aw ei ta, a khakhaipazy chô liata a palôh tlâh aw vei.
15 Pachâ teh u, a pathi-iana cha patlôsa awpa nata a chhoreina cha meipalei zy ta patlôsa awpa ta ABEIPA cha mei nata a vy tlô aw ta, a talailizy cha khisô hawhta a châ aw.
16 Mei ta ABEIPA ta a pachia aw, a zaozi ta chyhsa zydua a pachia aw; chatanachata ABEIPA ta a thihpazy cha a hluhpi ama châ aw.
17 Sahdôzy liana chata sie ei ta, a liah liatahpa hnôh lâta a ypa a pathaisapa nata a pathaisa tyhpa zy, vaosa nata hmo pasi a chhihpa nata siahloh a niepazy cha a raopa ta ama leidia aw, ABEIPA ta a tah.
18 Ama hmotaopazy nata ama pachâpazy cha pahno tlôh na ta, phopi to rai nata reih to rai ei chhi pakhyna daihti vaw tlô aw ta; a vy aw ei ta, ei rôhnahna ama hmô aw,
19 chatawhcha âmo hry lâna chata ngiana paysa aw na ta, âmo hry liata hriena a khôkhâhpa maih cha phopi to hnohta Tasi zy, Luda zy, libaw a keituhpa hnohta Tubal nata Zava sahlao hnohta zy, liahpahlôh a hla ngaita kawpa zy, ei mohpathâna a pahno beih leipa, ei rôhnahna a hmô beih leipa sahlao hnohta zy ei tuah aw; chatanachata phopi to hry liata rôhnahna kyh ama phuah aw.
20 Chatawhcha Izarel pathlazy ta ama hmohlâpa hmobaoh pathaihpa ABEIPA o liata ama vaw cheih tyhpa hawhna heta ABEIPA liata hmo hlâ awpa chata phopi to rai hry tawhta nama unawhpa zydua cha arâ chô liata zy, talailih liata zy, asyna liata zy, sabaitu chô liata zy, râraoseihpa chô liata zy, Zerusale ei tlâh pathaihpa liana chata amâ vaw chhi aw, ABEIPA ta a tah.
21 Chatawhcha cha hry liata chhao cha theihthaipa châta zy, Livai chyhsa châta zy ei la aw, ABEIPA ta a tah.
22 Avâ thiehpa nata alei thiehpa ei tao awpa cha ei hmiakô liata a y lymâ awpa hawhta, nama pathlazy nata nama moh cha a y lymâ thlâh ha aw, ABEIPA ta a tah.
23 Thla thiehpa tawhta thla thiehpa hropa taihta, pahânoh tawhta pahânoh hropa taihta, chyhsa zydua ei hmiakô liata na naoh awpa ta amâ vy hôlô aw, ABEIPA ta a tah.
24 “Chatawhcha vaw pua tyh aw ei ta, keima liata a paraotuhpazy ri cha amâ mô aw, ama lôzy cha thi leipa aw ta, ama mei cha pachhaipa ta y aw vei; chyhsa zydua châta hmo pasichhih ngaitapa a châ aw,” tahpa ta.