A dyuhtuhpazy hriena
1 Na pado beih leipazy hiahripa ta y na ta, na tlua beih leipazy hmôpa ta y na ta; ei moh a phaoh leipa phopi hnohna chata, Na moh teh u, na moh teh u,” tah na ta.
2 Chyhsa atyhmâhpazy chata noh y ta ei ku ei pazawh tyh, cha sahlao cha âmo pachânazy lymâ hawhta lâpi pha leipa liata a sie tyhpa zy;
3 sahdôzy liata atheipa ta beih lei raopa chô liata zy khâpa leipa ropahâhpa raopa ta, ei hmiakô lia tlaita ei hie na pahâh tyhpa zy;
4 thlâzy hry liata atyuhpa ta, su dâhthlohpazy liata a rie tyhpa zy; vaosa niepa ta, ama beihzy liata hmo pasichhihpa tihâh a y tyhpa zy;
5 “Nâma deita ta a duah teh, nâ vaw hnia khâ, nâ hlâta cha ei pathaih via hih,” a tah tyhpazy ama châ. Cha sahlao cha ei hnapasu liata meikhuh a ypa, noh y ta mei a ia thlâh ha tyhpa cha ama châ.
6 Ei hmiakô liata ato ropa ta a y; A thlih thlâh ha leipa aw na ta, viari tlao ei thô aw,
7 kalachhôh liata nama hmoparaona nata nama pawzy hmoparaona cha viari ei thô rairieh aw, ABEIPA ta a tah; âmo chata tlâhpi chô liatazy rohpahâhpazy ama raopa vâta, tlâhzy chô liata ei moh ama reipachhie tyhpa vâta, ama raihria cha a hmiatua chaipa ta ama kalachhôh liata ei panuapa aw.
8 ABEIPA chata he tana heta a tah; Kresao liata kresawti thiehpa hmô ei ta, chyhsa ta, Parao khâ, kha liana khata byhnâ y tlôh ta,’ ama tahpa hawhna khata, ei chakaotuhpazy vâta ei tah hra aw, ama zydua ta ei parao khai vei na hâh ta.
9 Zakaw tawhta chizy papua aw na ta, Zudah tawhta ei tlâhzy a totu awpa ei papua aw; ei chyhsa a tlypazy chata cha cha to aw ei ta, ei chakaotuhpazy cha cha liana chata ama pahrâ aw.
10 Ei chyhsa nâ tluatuhpazy chata Sharaw cha mietahkupa zaw sahdô châ aw ta, Akaw Saikao cha viahchao zaw abyuna su awpa a châ aw.
11 Châhrasala nâmo ABEIPA siesaipa ta, ei tlâh pathaihpa mypa ta, vâhneina taotuhpa chata tlâhkhai a chhuahdypa ta, tovyuh a pietuhpa chata kresawti pahlao chiehpa a pabie tyhpa saih u;
12 ei cha aw nona khata a chhy khoh leipa ta, bie ei reih nona khata nah ta thei khoh leipa ta, ei mohmô liata hmo moleina cha tlao tao eichi ta, ei ly leina cha namâ tlyhpa vâta; zawpi ta nama tovyuh cha raopa eina ta, nama zydua ta thina liana chata nama bôh khai aw.
13 Chavâta Abeipa KHAZOHPA chata he tana heta a tah: Ei chakaotuhpazy chata nie aw ei ta, nâmo deikua cha nodipa ta nama y aw; ei chakaotuhpazy chata doh aw ei ta, nâmo deikua cha dâhphipa ta nama y aw; ei chakaotuhpazy cha thaphapa ta y aw ei ta, nâmo deikua cha nozapa ta nama y aw;
14 ei chakaotuhpazy cha pathipalôh ta amâ lypa vâta thaphapa ta sa aw ei ta, nâmo deikua cha pathipalôh ta pachârôhpa ta nama ypa vâta cha aw eichi ta, thlahpa ta rietheipa ta nama ypa vâta nama sa ngâ aw.
15 Nama mo cha chhie sakhâhna châta ei chyhsa atlyhpazy châta hmâh aw ei ta, Abeipa KHAZOHPA chata a cha thie aw ei; châhrasala a chakaotuhpazy cha mo hropa ta a bie ha aw.
16 Alei liana heta anosasyh ta byhnâ a awpa châ aw ta, alei liana heta chhie sakhâhtuhpa cha bie hmeihseihpa Khazohpa reipa ta chhie a sa aw, cha hlâta nôponazy cha mypa ta a y hawpa vâta nata, ei mo tawhta nyupa ta a y hawpa vâta.
Avâ thiehpa nata alei thiehpa
17 “Pachâ teh u, avâ thiehpa nata alei thiehpa ei tao hih; cha hlâta hmozy cha a thei thlâh hapa ta y khao leipa aw ta, palôhrupa liata chhao a ngia khao hra aw vei.
18 Châhrasala ei hmotaopa liana chata chhâzaw ta alypa ta thaphapa ta y teh u; Zerusale cha thaphana ta tao na ta, a chyhsazy cha alyna ta ei tao hih.
19 Zerusale chô liana chata thaphapa ta y aw na ta, ei chyhsazy chô liata chhao ei ly aw; a chhôh liana chata chana pyu cha theipa ta châ khao leipa aw ta, sâh ngâna pyu chhao theipa châ khao hra aw vei.
20 Hawsaihpa ta a thipa cha liana cha y leipa aw ta, pawpipa a hro nozy a paki mâh leipa y hra aw vei, hawti cha kô za kha a châ nata thi tlôh aw ta, moleipa kô za kha deita a hrohpa cha chhiesapa ta a châ aw.
21 Ozy sa aw ei ta, cha liana chata ama pahrâ hra aw; kresadôzy tao aw ei ta, a theilâpa ama nie hra aw.
22 Mo hropa yna awpa ta o sa khao leipa aw ei ta; mo hropa nie awpa ta kresadô tao khao aw veih ei; tho hro chhôh nohzy hawhna heta ei chyhsa hro chhôh nohzy cha châ tlôh aw ta, ei chyhsa a tlypazy cha bohpi ama hriapa chô liana chata amâ ly aw.
23 Khâpa hrao leipa ta hriapasa leipa aw ei ta, vâchhiena chata saw sa hra aw veih ei; ABEIPA byhnâ awpa chyhsa pathlazy châ tlôh ei ta, ama sawzy cha ama hnohta ama y thlâh ha aw.
24 Âmo ta eina aw hlâta a chhy aw na ta, bie ama rei hai no chhaota ei nah ta ei thei aw.
25 Changie nata mietahkupa taw cha hmaohkha ta ama lao bâ aw ei ta, chakeibarôhneipa chata viahchao tôhpa hawhta sâkô a bâ aw; doh lei cha parih niepa châta a châ aw. Ei tlâhpi pathaihpa liana chata a pasasa khao leipa aw ei ta, parao khao hra aw veih ei,ABEIPA ta a tah.”