Viarithô nawpa ta thlahchhâna
1 Hy ABEIPA, phuhlana bie a hneituhpa Khazohpa, na phuhlana bie hneituhpa Khazohpa, khaih mah y!
2 Nâ alei liata a pachiatuhpa, hria la; A palaipazy cha ama tytuna pie mah y!
3 ABEIPA, hmoparaopazy chata kha châ e, hmoparaopa zy chata khachâ e ama tiah aw tly?
4 Âmo cha reih chakhy ei ta, sâlâ ngaitapa ta bie reih ei ta, hmoparaotuhpa zydua cha âmosasyh ta ama reithai tyh.
5 Hy ABEIPA, na chyhsa zy cha patlaw chheih ei ta, na ryuto cha rie ama patheisa tyh.
6 Nôhmei nata khichhai cha thi ei ta. paw a hnei leipa cha lianyh ama chei hnao;
7 “ABEIPA ta hmô leipa aw ta, Zakaw Khazohpa ta a pachâ hra aw vei.” ama tah.
8 Chyhsa hry liata nôchhiepa zy saih u, pachâ teh u! Ahrupa saih u, khatita e nama so aw tly?
9 Nahkhao a paysatuhpa chata thei aw vei mâ?” “Mo a taotuhpa chata hmô aw vei mâ?
10 Pho to a padotuhpa chata ra aw vei mâ? Chyhsa zy sona a pachutuhpa cha,
11 ABEIPA chata chyhsapa pachâpa zy cha khâpa hrao leipa a châ tahpa a pahno.
12 Hmoparaopa chata khaohtlô chaopa ta a y hlâta, nôpo noh zy cha na pahâsa thei nawpa ta.
13 chyhsa na chhoreipa cha na ryhpa bie liatahpa na pachupa cha, hy ABEIPA, a nohhlao na.
14 ABEIPA chata a chyhsa zy thy pathlah tlôh leipa aw ta; a ryuto cha siesai hra aw vei;
15 pachiana cha siana lâta kua heih aw ta, pathipalôh dopa a phaohpa zydua chata cha cha ama zi aw.
16 Ahy e, hmo moleipa a taotuhpa zy na thyu hnaopa aw? Ahy e, hmoparaopa zy na thyu hnaopa awpa ta a duah aw?
17 ABEIPA cha nâ baotuhpa a châ leipa khiahta cha, ei hrona he a chatliepa ta sidiapa ta a y ha awpa a châ.
18 “Ei phei a hluah,” ei tah nona khata, hy ABEIPA, na zawngiahna chata na cha-ao chi ta.
19 Ei palôhrupa liata pachâpa hluhpi ei hnei nona chata, na thlahlôhna zy chata ei hrona he tha a paphasa tyh.
20 Hmoparaopa ryureituhpa zy ryhpa hmoparaona chata hmôtuhpa zy cha na kao thei aw ma?
21 A siapa hrona siehnao a chhuahpa ta a pakhy tyh ei ta. thai lei ama pachâsa tyh hra.
22 Châhrasala ABEIPA cha ei o asapa châ ta, ei Khazohpa cha ei pabohna lôpanô a châ.
23 Ano chata âmo hmoparaona tlai cha ama chô liata patlasa ta, âmo moleina tlai liana chata pahleipadia aw ta; ABEIPA eima Khazohpa chata a pahleipadia aw.