Abeipa phana vâta reithaina
Reithaina Hla: Pahânoh Hla.
1 ABEIPA lâta alyna bie reipa nata Chônôchaipa, na moh reithaipa ta sapa he, hmopha ngaitapa châ ta;
2 ri hrawh a hneipa paropasyupa zy, Tlaipi zy, totâ palôh a pachhie theipa zy ta.
3 my ta na kyhpachâ ngiachhiena palâsapa nata zâ tato ta na ngiachhiena palâsapa he hmopha ngaitapa a châ.
4 ABEIPA, nâ chata na raihria ta na palysa tlôh chi ta; na ku hmotaopa zy vâta thaphapa ta ei sa aw.
5 Hy ABEIPA, na hmotaopa zy cha a rôhnah kaw dia! Na pachâna zy cha a thuh ngaitapa a châ!
6 Chyhsa nôchhiepa chata he he pahno vei, ahrupa ta pahno thai hra vei:
7 hmoparaopa zy sibiepa hawhta vaw pyuhpa ta, hmoparaona a taotuhpa zydua vânoh topa ta ama y nona heta, chhâzaw chata pahleipadiapa ta ama y awpa a vaw châ tyh tahpa hih.
8 hy ABEIPA, nâ deikua cha chhâzaw chata a sâh ngaitapa ta a y thlâh hapa na châ.
9 Hy ABEIPA, nama khakhaipa zy hih, nama khakhaipa zy he ama leidia aw; hmo a paraotuhpa zydua he papaipa ta ama y khai aw.
10 Châhrasala ei ki he chaoliah tôhpa ki hawhta palyupalih chi ta; sathaw thiehpa ta thupa ei châ haw.
11 Ei mo ta ei khakhaipa zy chô liata ei khona zie a tlohpa cha hmô aw ta, ei nah ta hmo moleina a taotuhpa, na siehnaotuhpa zy chô liata ei khona zie a tlôpa pyu cha a thei haw.
12 Chyhsa siapa cha thiahra hawhta lochopa ta y aw ta, Lebanaw liata sidy tho hawhta a laiseih aw.
13 ABEIPA o liata lopa zy cha, eima Khazohpa dôhpachhôh tlyhmia liana chata lochopa ta ama y aw.
14 A nôpi tawh chhaota khâ pathei aw ei ta, ti thata hneipa ta a hrohpa ta ama y aw.
15 ABEIPA cha a do ngaitapa a châ tahpa palâsana awpa ta; ano cha ei lôpanô châ ta, ano liana chata sia leina rai y vei.