Atotaotheipa nohpahli liata yna
1 Chônôchaipa anyuna su liata a pahrâpa cha. Atotaotheipa nohpahli liana chata a y thlâh ha aw.
2 ABEIPA kyh liana chata, “Ano cha ei pabohna nata ei kuh; ei Khazohpa, ei ngâpa cha a châ.” ei tah aw.
3 Ano chata khoheih a chôhtuhpa heih tawhtapa nata potlana chi a chhihpa tawhna chata a cha pachha aw;
4 a mathlaw ta cha khu aw ta. ano mathlaw ry liana chata cha paboh aw ta; a hmeihseihna cha vyhphao nata chhana a châ.
5 Zâ ta hmo rarôh ypa cha chi leipa aw chi ta, nohchhô ta châtai a zaw tyhpa cha chi hra aw va chi.
6 zohna liata potla a charei tyhpa nata nohchhôh ta hmo a parao tyhpa paraona cha chi chacheita aw va chi.
7 Na kâ lâta sâh kha pao aw ei ta, na chachâh lâta thy kha ama pao aw; châhrasala nâ châ hnia aw veih ei;
8 Na mo ta moh aw chi ta. hmoparaopa zy atyuna cha, a hmô ta deita na hmô aw.
9 Hy ABEIPA, nâ cha ei pabohna châ tlôh chi ta, Chônôchaipa cha na pahrâna châta hmâh chi ta.
10 hmo moleipa rai ta a tyh leipa aw chi ta, potlana chhaota na poh-o a hnia hra aw vei.
11 Na siena to rai liata cha hrôbieh awpa ta nâma kyh liata la vâlyuhchâpa zy châhbi pie tlôh aw ta.
12 Ama ku ta cha chalo aw ei ta. chata leipa ta la na phei alô ta nâ pachhi pathlei aw na.
13 Chakeibarôhhneipa nata vâzi cha tly aw chi ta, chakeibarôhneipa dawpa nata parihpi cha na phei ta na tly chheih aw.
14 Khazohpa ta ei chô liata kyhpachâna khâchâ a pahrâpa vâta pachha haw na ta; ei mo a pahnopa vâta su sâhpa liata ei patyuh aw.
15 Ano chata na pado aw ta, chatanacha ei chhy aw; kei cha a nôpo nona chata a hnohta y aw na ta. ano cha pachhapa ta ei palyupalih aw.
16 Hro pasihna ta a palôh patlâh aw na ta. ei pachhana cha ei pahmôsa hra aw,” a tah.