Khazohpa chyhsa Mawsi Thlahchhâna.
1 ABEIPA, nâ cha chhâ zydua chhôhta eima pahrâna na châ tyh.
2 Tlâhzy a y hlâta leilô nata khizaw na padua hlâ chhao khata, chhâzaw tawhta chhâzaw taih chhaota, nâ cha Khazohpa na châ.
3 Na châta chyhsapa he leidiana lâta pakuasa tyh chi ta, “Chyhsa saw saih u, kua heih teh u!” na tah tyh.
4 Na pachâ ta cha kô sâh kha he zâhia a leipa hawh deita châ tlôh ta, zâ vaih khana chhôh hawhta deita a châ hra.
5 Â mo cha ti laipa hawhta phaoh pathlah tyh chi ta; thaokha a môpa hawhta deita ama châ, my nah chata sibiepa a kaw thaopa hawhta ama châ;
6 my nah chata lochopa ta y ta; zâ lâna chata tai pathlahpa ta y ta, a uah tyh.
7 Na hiehâhna ta pahleipadiapa ta y pi ta; na pathi-iana liata nô papopa ta y tlôh hra pi ta.
8 Eima hmoparaona zy cha na hmiakô liata soh chi ta, eima molei nyupa zy cha na hmia khaihpa liata soh haw chi ta.
9 Eima hro noh zydua he na hiehâhna liata lei tyh ta, eima hro chhôh kôzy he phôhpa hawhta eima pachhâ tyh.
10 Eima hro chhôh kôzy cha kô sysari châ ta, thatlôna vâta kô sycharie chhao a châ thei na; châhrasala a pasihna cha hriapasana nata pachârôhna dei a châ; thlai lei ta, keimo chhao eimâ zaw syulyu tyh he.
11 Ahy e na pathi-iana hmotaothei zie pahnopa ta, nâma chi awpa zie hawhta na hiehâhna cha a pahno tly?
12 Eima hro chhôh nohzy rei zie awpa maniah pachu mah y, sona pathipalôh eima hneipâ na hâh ta.
13 Hy ABEIPA, vaw kua heih mah y! Khachâ e a châ aw? Cha chakaopa zy kyh liana chata na palôhrupa pakua mah y!
14 My nah chata na zawngiahna ta lôhhrâ maniah patlô mah y, eima hro chhôh zydua heta thaphapa ta eimâ ly lymâ theina hâh ta.
15 Nâ ta rietheipa ta maniah na paysa no nata hmopha leipa eimâ tyhna kô chhôh hawhna zy khata maniah palysa mah y.
16 Na raihria cha châ chakaopa zy liata a luah sala. na rôhnahna cha ama sawzy liata aluah mawh sy.
17 Abeipa eima Khazohpa chhithana cha eima chô liata y mawh sy. eima ku raihria he eima chô liata pa-i hra mah y. eima ku raihria he pa-i mah y.