Khazohpa nata Davi likawh ta biehraina
Ezra mo Ethan Maskil.
1 ABEIPA zawngiahna kyhzy cha chhâzaw ta hla ta sa aw na ta; ei pakah ta a ngâchhihna zie cha chhâ zydua taihta ei pahnosa aw.
2 Zawngiahna cha chhâzaw châta pa-ipa ta y aw ta, na ngâchhihna cha avâ zy liana tlai khita â-ipa ta a y aw.
3 “Ei chyhsa atlypa hnohna chata bie hraih na ta, na chakaopa Davi liata chhie sa haw na ta:
4 ‘Na pathlazy cha chhâzaw châta pa-i aw na ta, na beidyuchhai chhao chhâ zydua taihta ei paryh aw,’ tahpa ta,” tah chi ta. Selah
5 Hy ABEIPA, avâzy khita na hmonoâh taopa he reithai aw ei ta. mopathaipa zy ahmaohpakhyna liana khita, na ngiachhiena he ama reithai hra aw!
6 Avâzy liana khita ABEIPA nata a pakho theipa ahy e a y? Kheihhawhpa khazoh zy heta hmahta ABEIPA alyupa y veih ei,
7 mopathaihpa zy a pahmaohpakhyna liata chichhih ngaitapa, a kiahpâh liata chyhsa zydua hlâta chi chai awpa cha ahy ma a y?
8 Hy ABEIPA Pheisaih zy Khazohpa, hy ABEIPA, nâ hawhta thatlôpa ahy y ta, na ngiachhiena cha na chheipâh liata y vei ma?
9 Nâ chata tilaipi chalâhparâna chô liata ryu rei chi ta; a chalâhparâpa zy a chatlaopa zy cha sidiapa ta na paysa tyh.
10 Na chata Rahabi cha chariah thipa hawhta pazao khai chi ta, nama khakhaipazy cha na bâh thatlôpa ta papai haw chi ta.
11 Avâzy khi nâma eih châ ta. alei chhao he nâma eih a châ; khizaw nata a chhôh liata hmo a ypa zydua he nâma taopa a châ.
12 Maw nata chho cha nâma taopa châ ta; Tabaw nata Hamaw cha na moh vâta thaphapa ta ama sa tyh.
13 Nâ chata bâh hmotaothei ngaitapa hnei chi ta; na ku cha a tha a tlô, na ku chachâh lâ cha palyupalihpa ta y ta.
14 Siana nata pachiana siapa cha na beidyuchhai bôna châ ta; zawngiahna nata hmeihseihna cha na hmiakô liata ama sie tyh.
15 Pyu thapha a chhihpa a thei tyhpa pho cha ama nohhlao na. hy ABEIPA, âmo cha na hmia khaihpa liata ama y tyh.
16 na moh vâta noh y ta thaphapa ta y ei ta, na siana vâta palyupalihpa ta ama y tyh.
17 Nâ cha ama thatlôna rôhnahna châ tlôh chi ta; na khokheina vâta eima ki he palyupalihpa ta a y aw.
18 Eima vyhphao he ABEIPA eih châ tlôh ta, eima beipa he Izarel sahlao Mo Pathaihpa eih a châ.
19 Cha nona chata na mo pathaipa zy hnohta aluahna liata reih chi ta; “Chyhsa pakha thatlô ngaitapa chô liana chata baona pahno na ta, chyhsa pakha chyhsa zy hry liata atlyhpa cha palyupalih haw na ta.
20 Na chakaopa Davi cha hmô na ta; ei sathaw pathaihpa chata ano cha thu haw na ta;
21 ei ku he ano liata pa-ipa ta y aw ta. ei bâh heta ano cha tha a patlô aw.
22 Khakhaipa chata ano liata a hnaw leipa aw ta, hmoparaopa saw chhaota a rie pathei hra aw vei.
23 Ano adyuhtuhpa zy cha a hmiakô liata tusao aw na ta. ano a haopa zy cha ei tu aw.
24 Ano hnohna deikua cha ei ngâchhihna nata ei zawngiahna cha y aw ta. ei moh vâta a ki cha palyupalihpa ta a y hra aw.
25 A ku cha tilaipi liana chata pahniehsa aw na ta, a ku chachâh lâ cha chavah zy liana chata.
26 Ano chata, ‘Nâ cha, ei Paw, ei Khazohpa, ei pachhana lôpanô na châ.’ tahpa ta eina pado aw.
27 Kei ta ano cha ei saw tuapa ta tao aw na ta. alei liata abeizy hry liata chônôchaipa ta ei tao aw.
28 Ei zawngiahna cha chhâzaw ta a vaopa aw na ta. ei biehrai cha ano liata â ipa ta a y aw.
29 A chi pathlazy cha chhâzaw ta paysa aw na ta, a beidyuchhai cha avâ y chhôh noh taihta ei paysa hra aw.
30 A sawzy chata ei ryhpa bie he pathluapa ta, ei pachiana zy hawhta y leipa ta.
31 ei bieraopa paraopa ta, ei biepiepa zy amâ ô vei khiahta la,
32 ama paraona zy cha chôhchahrei ta a vyhnao aw na ta, ama hmoparaona zy cha chheina ta ei vyhnao aw;
33 châhrasala ei kyhpachâ ngiachhiena cha ano tawhtapa tlokhuh ta la chachei leipa aw na ta. ei ngâchhihna cha haipa ta a châ awpa pasaih hra aw va na.
34 Ei biehraina cha parao leipa awna ta, ei hmao tawhta hmo a vaw puapa chhao cha panano hra aw va na.
35 Ei kha ei pathaina reipa ta chhie sa na ta; Davi hnohta haipa reih aw va na.
36 Ei chi pathlazy cha chhâzaw ta y aw ei ta. ei beidyuchhai cha ei hmiakô liata noh hawhta a y hra aw.
37 Thlâpâ hawhta chhâzaw chôta pa-ipa ta y aw ta; avâ liata pahnosatuhpa ta ngâchhihpa hawhna khita,” tah chi ta. Selah.
38 Châhrasala nâ chata thy pathlahpa khoh leipa chi ta, na sathaw thupa chô liana chata na hiehâh haw ta.
39 Cha chakaopa biehraipa cha pasi chi ta; a lakho cha alei liata thy pathlahna taihta panawh haw chi ta.
40 A dona zydua cha papao chi ta; a kuhzy cha roryhrapa ta paysa haw chi ta.
41 Lâpi liata a siepa maihta a hmo hrao tyh ei ta; a chheipâh liata chyhsa zy reipachhiepa ta vaw y haw ta.
42 Ano adyuhtuhpa zy ku chachâh lâ cha palyupalih chi ta; a khakhaipa zydua cha thaphapa ta paysa haw chi ta.
43 A zaozi hâh cha paliesa haw chi ta. ano cha adyuhna liana chata a ipa ta paduasa khao leipa chi ta.
44 A khaihna cha padiasa chi ta, a beidyuchhai cha alei lâta thy pathlah haw chi ta.
45 A thyutlia no noh zy cha pachhohsa chi ta; ano cha maophyuhna ta khu haw tlôh chi ta. Selah
46 Hy ABEIPA, khachâ e? Chhâzaw ta na nyu aw tly? Khacha e na hiehâhna cha mei hawhta â lâ aw tly?
47 Ei daihti he a pachhoh awpa zie a thei thlâh ha la, chyhsa saw zydua he khâpa hrao leipa ta dia na tao!
48 Kheihhawhpa chyhsa ma thi noh hmô leipa ta a hrohpa cha? Ahyma Sheôl ku tawhta hrona a pachha awpa cha? Selah
49 Abeipa na kyhpachâ ngiachhiena hmiatuapa na ngâchhihna ta, Davi liata chhiesapa ta nâ taihpa zy kha, khataih lâ a y haw?
50 Hy Abeipa, châ chakaopa zy ama reipachhiena a thei thlâh ha mah y; pho thatlô ngaitapa zydua reipachhiena ei kalachhôh liata ei tao tyhna zie he,
51 hy ABEIPA, na khakhaipazy reipachhiena, na sathaw thupa hniezy reipachhiena cha.
52 ABEIPA cha chhâzaw ta reithaipa ta y mawh sy! Amen, Amen.