Hlazy 88
Thina tawhta aboh nawpa ta thlahchhâna
Hla Kôrah Sawchapawpazy Reithaina Hla. Hla chhihthatuhpa châta: Mahalath Leannoth ta sa awpa. Ezra mo Hima Maskil.
1 Hy ABEIPA, ei Khazohpa, a chhô a zâ ta châkheina hiah tyh na ta.
2 Ei thlahchhâna he na hmiakô liata tlô sala, ei awna liana heta nah vaw pachôh mah y!
3 Ei hrona he nôpona zy ta bie ta. ei hro heta Sheôl cha a vaw hnia haw tlôh ta.
4 A thi awpazy hry liata reipâpa châ na ta; thatlôna rai a hnei leipa chyhsa hawhta ei châ,
5 chariah thipa sahlao, thlâ liata aziapa zy hawhta, athihpa hry liata thypa ei châ, chazy na pahno khao leipa hawhta, na ku tawhtapa pahleipadiapa ama châ.
6 Khaotlôh ry chaipa liata na pazia haw chi ta, su zoh ngaitapa, athuh ngaitapa zy liana chata.
7 Na pathi-iana chata khâchâ na vi ta, nâ ta na chalâhparâpa zydua ta riena pathei haw chi ta. Selah
8 Ei pahno patheipazy cha eina hlapa ta paysa chi ta; ama châta pasichhih ngaitapa ta na tao haw chi ta. Khawhlôhpa ta y na ta, pua thei va na;
9 rietheina vâta ei moh rao via ngâ ta. Hy ABEIPA, noh chareih ta cha pado na ta; nâ lâta ei kuzy pazawh na ta.
10 Athihpa zy châna chata hmonoâhpazy na tao aw ma? Thlahmihpa zy chata thyupa ta ama cha reithai thei aw ei ma? Selah
11 Na kyhpachâ ngiachhiena cha thlâ liata pahnosapa ta, na ngâchhih zie cha leidiana su liata pahnosapa ta a y aw ma?
12 Na hmonoâh taopa zy cha zohna liata pahnopa ta a y aw ma, na pachha hmotaotheina cha myna lyurâh liata pahnopa ta a y hra aw ma?
13 Hy ABEIPA, kei deikua chata cha pado na ta; ei thlahchhâna cha my ta a cha dy aw.
14 ABEIPA, khazia e ei hrona he na thy pathla tly? Khazia kei tawhta na hmia nâ nyu?
15 Ei hawtita tawhta riethei taopa nata thi daihmâpa ta y tyh na ta, hmo rarôh y ngaitapa zy pasa taopa ta; patypamâpa ta ei y tyh.
16 Na hiehâhna ru ngaitapa chata na vao haw ta; na hmo rarôh y ngaitapa zy chata na pahleipadia haw ta.
17 Chazy chata noh y ta, ti hawhta na pado ei ta; na pado chyu ei ta.
18 Kyh na pachâtuhpa nata viasa cha eina hlapa ta paysa haw chi ta; ei pahno patheipa zy cha la syulyu ha chi ta.