Khazohpa zawngiahna khâ to nawpa ta thlahchhâna
Davi Thlahchhâna.
1 Hy ABEIPA, kei lâna heta na nah vaw pachôh la, nâ chhy mah y, sipasa nata dyhchhie ngaitapa eicha hih.
2 Ei hrona he pahlôh mah y, Khazohpa a pachâpa châ tlôh na ta; nâma ngâtuhpa, châ chakaopa he pachha mah y.
3 Hy ABEIPA, na ngiachhie mah y; na cha Khazohpa cha tlôh chi ta, noh y ta cha pado tyh tlô na ta.
4 Cha chakaopa hrona he tha papha mah y, hy ABEIPA, ei palôhrupa he nâ lâta khâchâ soh tyh tlôh na ta.
5 ABEIPA, nâ cha pha chi ta, a ngiahthai hoh chi ta, châ awtuhpa maih chô liata zawngiahna hnei thlu tlôh chi ta.
6 Hy ABEIPA, ei thlahchhâna liana heta nah pachôh la; ngiachhie ei châ hawna ao he nahthlie mah y.
7 Ei nôpo nona chata ei cha pado aw, nâ ta nâ chhy tlôh aw chi ta.
8 Hy Abeipa, khazoh zy hry liata nâ hawhpa rai y leipa ei ta, na hmotaopa zy hawhpa he hmotaopa rai y hra veih ei.
9 Hy Abeipa, na taopa pho to zydua avy aw ei ta, na hmiakô liata a boh aw ei ta, na moh cha ama vaw palyupalih aw.
10 Nâ cha rôhnah chi ta, hmonoâhpa zy tao tyh hra chi ta, nâma deita he Khazohpa na châ.
11 Hy ABEIPA, na lâpi cha na pachu mah y, na bie hmeihseihpa liata ei y aw; na moh chi awpa ta pathipalôh miakha ta na paphaosa mah y.
12 Hy Abeipa ei Khazohpa, ei pathipalôh zydua ta cha reithai aw na ta, na moh he chhâzaw ta ei palyupalih aw.
13 Ei chô liata na zawngiahna cha thata châ ta; ei hrona he khaotlôh ry chaipa tawhtapa pachha tlôh chi ta.
14 Hy Khazohpa, chyhsa a palaipa zy chata na thyuhnao ei ta; chyhsa nôchhiepa a pôhpakhypa zy châta ei hrona he pahlei a chhuahpa ta tlua ei ta, nâ cha ama hmiakô liata cha soh tyh veih ei.
15 Châhrasala, hy Abeipa, nâ cha thapasana nata ngiachhiena hneipa, nônaipa, zawngiahna nata hmeihseihna a hnei thlâhpa na châ.
16 Kei lâ a vaw heih la, na ngiachhie mah y; cha chakaopa na thatlôna pie la, na seichanô saw he pachha mah y.
17 Phana awpa pahnosana na pamosa mah y, nâ haotuhpa zy chata cha cha hmôpa ta ama maophyuhna awpa ta, ABEIPA, nâ ta na bao chi ta, thlah eina palôhpa vâ chi ta.