Izarel chôta Khazohpa zawngiahna hmô nawpa ta thlahchhâna
Hla chhihthatuhpa châta: Kôrah sawchapawpazy Reithaina Hla.
1 ABEIPA, na lyurâh chô liana heta aly chi ta; Zakaw sahlao sei ta ama ypa cha pakuasa haw heih chi ta.
2 Na chyhsazy hmoparaona zy a ngiahthai chi ta; âmo moleina zydua khu khai haw chi ta. Selah
3 Na hiehâhna zydua cha la khai haw chi ta; na pathi-iana ru ngaitapa cha a heisai haw chi ta.
4 Hy maniah pachhatuhpa Khazohpa, maniah pakuasa la, eima chô liata na pathi-iana cha pabâ mah y!
5 Eima chô liata chhâzaw ta ma na pathi a ia aw tly? Na pathi-iana cha chhâ zydua taihta na paluahsa lymâ aw ma?
6 Nâ liana chata na chyhsa zy ama tha a pha thei na hâh ta, maniah pahra heih aw va chi ma?
7 Hy ABEIPA na zawngiahna cha maniah pahmôsa la, na pachhana cha maniah pie hra mah y.
8 ABEIPA Khazohpa bie rei awpa cha ei thei aw, a chyhsa zy nata a mopathaihpa zy lâta thlahlôhna bie reih tlôh aw ta, châhrasala âmo cha hruna lâta a heih khao khah ei se.
9 Pachhana cha ano a chituhpa zy a hniapa liana cha a y tlai tyh, eima lyurâh liana heta rôhnahna a pahrâ thei nawpa ta.
10 Zawngiahna nata hmeiseihna a tyh ei ta; siana nata adyhna ta a sy ei ta.
11 Hmeihseihna cha alei tawhta pyuh ta, siana chata avâ tawhta za moh haw ta.
12 ABEIPA chata hmophapa pie aw ta, eima lyurâh heta a theipa a papôh hra aw.
13 Siana chata hmia a sah aw ta, a hniezy cha lâpi ta a tao aw.