Hlazy 84
Khazohpa o vâna
Hla chhihthatuhpa châta. Gittith ta sa awpa: Kôrah Sawchapawpazy Reithaina Hla.
1 Hy Pheisaihzy ABEIPA, na byureihzy cha kho â chhi kaw dia!
2 Ei hrona heta ABEIPA dôhpachhôh tlyhmia zy cha vâ ngaita ta, panaopâ ta; ei pathipalôh nata ei sapa he Khazohpa hro lâna chata aw ta.
3 Boby ta o hmô ta, sivia ta ano châta bu hmô hra ta, a taw sona awpa ta, hy Pheisaihzy ABEIPA, ei Beipa nata ei Khazohpa, cha cha na maisâh zy tlai a châ.
4 Na o liata a pahrâpa zy cha ama nohhlao na, nâ cha khâ ama cha reithai aw. Selah
5 Nâma liata a pahrâpa zy cha ama nohhlao na, a pathipalôh liata Zaio pangaina lâthlôhzy a ypa cha.
6 Ti y leina saikao amâ chhih nata tihnawh ypa zy lâta a lie ta; vâsua hmiatuapa chata tipo zy cha a pabie tyh.
7 Amâ si nota ama tha y via lymâ ei ta; Zaio liata khazoh zy Khazohpa ama hmô aw.
8 Hy ABEIPA Pheisaih zy Khazohpa, ei thlahchhâna he thei la; hy Zakaw Khazohpa, nah vaw pachôh mah y! Selah
9 Hy Khazohpa, eima vyhphao moh tua; na sathaw thupa hmia he moh tua!
10 Na dôhpachhôh tlyhmia liata noh kha ypa he su hropa liata ypa, noh sâh kha hlâta pha via tlôh ta. Hmoparaopa zy hry liata pahrâpa hlâta cha ei Khazohpa-o ochhi thaby liata a duah awpa chhao ei khoh via.
11 ABEIPA Khazohpa cha kuh nata vyhphao châ tlôh ta; ano chata ngiachhiena nata rôhnahna pie aw ta, ABEIPA chata a dopa ta a ypa zy tawhna chata hmophapa pakhâ aw vei.
12 Hy Pheisaihzy ABEIPA, nâma châ ngâpa chyhsa cha a nohhlaona!