Izarel khakhaipa pahlei nawpa ta thlahchhâna
Hla. Asaph Reithaina Hla.
1 Hy Khazohpa, reih pathlie leipa ta y kha y; hy Khazohpa a chalih thlâh ha kha la, y molo cheita kha y!
2 Nahthlie teh, nama khakhaipazy cha atlaokali ei ta; nâma châ haotuhpa zy cha ama luh pachhua ei ta.
3 Na chyhsa zy he piehpie ngaitapa ta tei ei ta; na chyhsa nyupa zy chô liana heta a chhiena lâta chhosie ei ta.
4 Âmo chata, “A vy ula, ama pho leina taihta pahleipadia ei suh u; Izarel sahlao mo rai he a thei thlâhpa ta a y khao leina awpa ta!” tah ei ta.
5 Bie a paraohpa ta a chhohia ei ta; na chhôh liata a chhiena lâta tao awpa ta bie a taih chyu ei ta,
6 Edôma mo nata Ishmael mo poh-ozy,” “Môaba mo nata Hakara mozy,
7 Kebal mo nata Amawna mo nata Amele mozy, Philistina sahlao Tyre a pahrâpa zy chhaota;
8 Asuria mo chhao âmo a pazao ei ta; Lawta pathlapa zy cha bao ei ta. Selah
9 Âmo sahlao cha Midia mo chô liata na tao hawpa zy, Kisaw chavah liata Sisera nata Zabi chô liata na taopa hawhna zy khata tao hra mah y.
10 cha chyhsa zy cha Enadaw liata leidia ei ta, alei châta ie hawh deita ama vaw châ.
11 Ama molaipa zy cha Ôreba nata Ziba hawhna khata tao la; ama abeisaw zydua cha Zebah nata Zalmuna hawhna khata tao mah y,
12 âmo chata, “Khazohpa yna zy cha pahrâpa ei suh u,” ama tahpa kha.
13 Hy ei Khazohpa, âmo sahlao cha doh-lei a khie chahlô ngâpa hawhta tao mah y, thlih hmiakô liata sâh sihpa a phaoh ngâpa hawhna heta.
14 Râhhmâhpa a kâtuhpa mei hawhta nata tlâhzy a kâtuhpa mei paleih hawhna heta,
15 âmo cha na thlihpi ta a chadai la, na thlih ru ngaitapa ta pachisa mah y!
16 Hy ABEIPA, na moh ama tlua theina hâh ta, na hmia cha zana ta pabie mah y.
17 Chhâzaw ta maophyuhpa nata nôpo ngaitapa ta y ei sala; no pazapa ta ypa ta, leidia ei se.
18 Nâma deita he ABEIPA na châ tahpa, leilô zydua chô liata Chônôchaipa na châ tahpa ama pahno theina hâh ta.