Jerusale paraona vâta mâchhiesana
Asaph Reithaina Hla.
1 Khazohpa, pho hropa ta na ryutona liana heta a ngia ei ta; na chhyna-o pathaihpa cha papua ei ta; Zerusale he alô cho pakhypa lâta tao khai haw ei ta.
2 Cha chakaotuhpa zy ri cha avâ pavaw zy niepa lâta pie ei ta, na mopathaihpa zy sâh cha lyurâh sazy pie ei ta.
3 Ama thisaih cha Zerusale chheipâh liana heta ti hawhta leihtha ei ta, âmo a pabutuh awpa hra ahy hmahta y tlôh ei va.
4 Eima chheipâh ta chyhsa zy reipachhiepa ta vaw y pi ta, eima kiahpâh ta chyhsa zy mohnaopa nata pahneisaopa ta vaw y ha pi ta.
5 Hy ABEIPA, khachâ e? Chhâzaw ta pathi-iapa ta na y aw tly? Na hiatliana cha mei hawhta a ia aw ma?
6 Nâma cha pahno leipa phopi zy chô liana heta na pathi-iana cha leihtha mah y, na moh a pado leipa khihnarâh zy chô liata chhao!
7 Zakaw sahlao chai khai ei ta, ama yna cha rohry pahrâsa tlôh ei ta.
8 Maniah pathlatuhpa zy paraona zy kha keimo liana chata a thei thlâh ha kha y; na zawngiahna thapasana zy chata maniah dy patoh mawh sy, thata panawhpa ta y haw tlôh pi ta.
9 Hy maniah pachhatuhpa Khazohpa, na moh rôhnah nawpa ta maniah bao la; na moh vâta maniah pachha la, eima molei zy he pasi mah y!
10 Khazia e pho to ta, “Khataih liata e ama Khazohpa kha?” ama tah tly. Nâ cha chakaotuhpa zy thisaih palosana phopi na hriena cha eima mo ta hmô sy!
11 Atâhpa a rôhnah cha na hmiakô liata tlô mawh sy; na hmotaotheina rôhnah zie lymâ hawhta thi awpa ta raopazy cha hrôhbieh la!
12 Hy ABEIPA, nâma ama cha reipachhiepa kha, pho hropa zy hnohta a lie sari ta thô heih mah y!
13 Chatanachata keimo na chyhsa zy na sibiepa su liata mietahkupa zy heta, chhâzaw ta alyna bie cha hlâ awpi ta; chhâ zydua taihta nama reithaina cha eima pahnosa lymâ aw.