Izarel paduapathi nawpa ta thlahchhâna
Hla chhihthatuhpa châta: Shôshannim Eduth ta sa awpa. Asaph Reithaina Hla.
1 Hy Izarel sahlao vaihtuhpa, mietahkupa zaw hawhta Zawsi sahlao a chhituhpa, nah vaw pachôh mah y! Na cherubi zy chô liata atyuhpa chi, vaw khaih mah y,
2 Ephrai sahlao nata Benzami sahlao nata Manase sahlao mohmô liana chata! Na thatlôna kha pathyu la, maniah pachha awpa ta a vy mah y!
3 Hy Khazohpa, maniah pakuasa heih la; na hmia kha pakhaih mah y, chatanachata pachhapa ta eima y aw!
4 Hy ABEIPA Pheisaih zy Khazohpa, khachâ e na chyhsa zy thlahchhâna cho liana heta na pathi a ia aw tly?
5 Âmo cha mothlih viahchhâ ta pasa chi ta, mothlih he do awpa ta panuana lai ngaitapa ta na pie tyh.
6 Eima chheipâh liata chyhsa zy cha eima ra vâta a ei chhaopa ta y ei ta; eima khakhaipa zy chata miah pahneisao ei ta.
7 Hy Pheisaih zy Khazohpa, maniah pakuasa heih la; na hmia kha pakhaih mah y, chatanachata pachhapa ta eima y aw!
8 Izi râh tawhta krezô vaw cheih chi ta; phopizy papua chi ta, loh haw chi ta.
9 A hmia a chhuahdy lymâ chi ta; athuhpa ta thari thla ta, lyurâh cha bie khai haw ta.
10 Tlâhzy cha nohpahli ta pahlypa ta y ta, a chiahzy cha Khazohpa sidy thozy hawh tlaita a châ;
11 a chiahzy cha tilaipi* taihta pazawh sa ta, a chô panyuhpa zy cha Chavah taihta.
12 Khazia dônazy cha na parao, lâpi liata a siepa maihta a theizy ama lyu haw hih?
13 Râhhmâhpa liata ngiahrai chata parao ta, lyurâh sazy chhaota ama nie tyh.
14 Hy Pheisaih zy Khazohpa, eima cha aw chaimâh na, a vaw heih heih mah y! Avâ tawhna khata za moh la, he krezô he moh la; vaih mah y,
15 nâma tlaita na lopa cha vaih la, he krezô dawpa laiseih kawpa ta na taopa liana heta.
16 Mei ta a kâ haw, thlupa ta a y haw; eima khakhaipa zy cha na hiehâhna ta a pahleipadiana hâh ta.
17 Chyhsa na tlypa cha chakhei la, chyhsa sawchapawpa na raihriana chata thatlôpa ta na taopa chô liana heta!
18 Chatanachata cha kua sai aw mapi; maniah pahra la, na moh cha eima pado aw!
19 Hy ABEIPA Pheisaih zy Khazohpa, maniah pakuasa heih la! Na hmia cha eima chôta khai awpa ta tao la, chatanachata pachhapa ta eima y aw.