A chyhsa ngâchhih leipazy chôta Khazohpa ngâchhihna zie
Asaph Maskil.
1 Hy ei chyhsa saih u, ei ryhpa bie liana heta nahthlie ula, ei pakah liata biezy heta na nahthlie teh u!
2 Pakhona bie ta ei pakah â aw na ta; hlâno ta bie nyupa reipa kha ei reih aw,
3 chazy cha thei pi ta, pahno hra pi ta, eima paw zy chhaota maniah ama chhopa kha.
4 Chyhsa zy cha ama sawzy tawhtapa phih leipa aw pi ta, chhâ a vaw y awpa liata ABEIPA reithaina kyh nata a thatlôna zie nata a hmonoâh ngaitapa taona ziezy cha tlao eima chho aw.
5 Zakaw sahlao hry liata biepiena pie ta, Izarel sahlao hry liata ryhpa rao ta, eima mahpaw zy hnohta bie taih ta, âmo chata chazy cha ama sawzy hnohta ama pachu awpa ta;
6 chhâ a vaw y awpa hawtizy chata amâ chu thei nawpa ta, ama sawzy ama chho pachhuah lymâ nawpa ta.
7 ama hnabeiseihna cha Khazohpa liata pahnieh aw ei ta, Khazohpa hmotaopa zy cha my leipa ta, a biepiepa zy cha tlao ama zyh nawpa ta;
8 ama mahpaw zy hawhta chhâ chhorupa nata atyhmâhpa, chhâ pathipalôh do leipa, Khazohpa liata ama ngâna a i beih leipa, ngâchhihpa ta a hnohta a y leipa ama châ lei nawpa ta.
9 Ephrai pathlazy cha chariah chhaichhi ta a tobipa ta, libaw cheipa ta, adyuhna noh liana chata a râpai ei ta.
10 Khazohpa bie hra cha zyh leipa ei ta, a ryhpa liata y khao hra leipa ei ta.
11 A hmotaopa zy cha my ei ta, a hmonoâhpa taopa a pahmôsapa zy chhao khata.
12 Ama mahpaw zy mohmô liata hmonoâh ngaitapa zy a tao tyh. Izi râh liata, Zoan sibiepa su liana chata.
13 Tilaipi cha pachhaih pathlah ta, âmo cha pasisa haw ta, tizy cha khâpa leipa ahmaohpakhypa hawhta paduasa thlâh ha ta.
14 Nohchhô ta meihdo ta a chhi ta, a zozâ khihdei ta mei khaihpa ta a chhi tyh hra ta.
15 Râhpathohpa liana chata lôpanôzy patlaw ta, ti athuh ngaitapa tawhtapa hawh tlaita do awpa pie ta.
16 Lôpanô tawhna chata vatie zy papua ta, tizy cha vapizy hawhta palosa ta.
17 Chata chôna chhaota, a chô liata hmo parao ngâthlâh ha ei ta, râhpathohpa liana chata Chônôchaipa chô liata aty ei ta.
18 Ama khona papai nawpa ta sa hiapa ta ama pathipalôh ta Khazohpa pasia ei ta.
19 Khazohpa lâta reih pamihpamâ ei ta, “Râhpathohpa liana heta Khazohpa ta tlâhkhai a chhuahdy thei aw ma châ?
20 Lôpanô cha tu ta, tizy kha vaw puapa ta, chavahzy cha a kao khô ngâ ta. Niepa a pie thei ei ma, a chyhsa zy châna heta sa a chhuahdy aw ma cha?” tah ei ta.
21 Chanachata ABEIPA chata vaw thei ta, a hiehâh haw ta; Zakaw sahlao chô liata mei vaw kâ ta, Izarel sahlao chô liata pathi-iana vaw kiah haw ta;
22 Khazohpa a ngiapâ leipa ta, pachhana chhao ama ngâ leipa vâta.
23 Châhrasala chôlâ vadôzy khih bie pie ta, avâ ochhizy khi pahypa ta;
24 ama niepa châta mana ama chô liata za pasuasa ta, avâ sa cha a pie.
25 Chyhsa zy ta vâlyuhchâpa zy viahchhâ cha nie ei ta; Khazohpa ta py biena taihta niepa a piepa vâta.
26 Nochhi thlih cha avâ liata pathlisa ta, a hmotaotheina ta chho thli cha a chhi ta;
27 sa cha dohlei hluhzie ta ama chô liata pasuasa ta, pavaw mathlaw a hneipa cha tilaipi liata leisadi hluhzie ta;
28 amâ riehmo lialiah liata patlasa ta, ama yna chheipâh zy liana chata.
29 Zawpizy ta nie ei ta, rihbiepa ta y ei ta, ama khopa cha a pie haw ei.
30 Ama khopa pai mâh leipa ta, ama niepa cha ama pakah liata a y hai no ta,
31 cha nona tlai chata Khazohpa pathi-iana cha ama chô liata tla ta, ama chyhsa thatlôpa zy thokha thie ta, Izarel satlia pha chaipazy cha tusao ta.
32 Chata chôna chhaota hmo parao ngâthlâh ei ta; a hmonoâhpa taopazy cha a ngiapâ hlei veih ei.
33 Chatanachata ama noh zy cha khâpa hrao leipa ta pahleipa ta, ama kôzy cha china ta pahleisa hra ta.
34 Âmo a thina maihta ano cha pado tyh ei ta; kua heih ei ta, Khazohpa thlai ama tlua tyh.
35 Âmo chata Khazohpa cha ama lôpanô a châ tahpa nata Khazohpa Chônôchaipa cha ama chatlaituhpa a châ tahpa ama thei heih tyh.
36 Châhrasala ano cha ama pakah ta papyupahly ei ta; ama paleih ta ano lâta haipa bie ama reih tyh.
37 Ama pathipalôh cha ano liata a do tlôh leipa ta; a biehrai liana chata ngâ a chhih hra veih ei.
38 Châhrasala ano cha thaphasana ta a biepa vâta, ama hmoparaona cha a ngiahthai ta, âmo cha pahleipadia vei; ei hluhpi a pathi-iana cha padia ta, a zydua ta pathyu khoh tyh vei.
39 Chyhsapa deita ama châ tahpa athei thlâh ha ta, thlih a lie heih awpa ta a pathli tyhpa hawhna he.
40 Râhpathohpa liana khata a chô liata aty hoh ngaitapa ta, râhpathohpa liana khata ano cha ama pachârôhsa hoh kaw dia!
41 Kua heihpa ta Khazohpa pasia ei ta, Izarel sahlao Mo Pathaihpa cha a ru ama pachhô tyh.
42 A ku cha a thei thlâh ha leipa ei ta, dyuhtuhpa tawhta a pachha noh cha athei thlâh ha tyh veih ei;
43 kha hawhta Izi râh liata a pahnosana zy soh ta, Zoan sibiepa su liata a hmonoâhpa zy soh hra ta.
44 Ama vapizy cha thisaih lâta pachâsa ta, ama vatie zy cha thisaih lâta a pachâsa hrapa kha, chatanachata doh thei khao leipa ei ta.
45 Ama hry liata mathyupa hluhpi tuah ta, chazy chata âmo patypamâ ta, châhchie zy tuah hra ta, chazy chata ama raona tlôkhei ta.
46 Hmo a pyuhpa zy chhao cha chângyu pie ta, ama hriapasana thei cha khawsu pie hra ta.
47 Ama krezô zy cha pareih ta pahleipadia ta, ama theiku kôzy chhao dâhaw ta pahleipadia hra ta.
48 Ama sahrohzy chhao cha pareih lata pie ta, ama sahroh zawzy cha pachie sah ngaitapa lâta pie hra ta.
49 Pathi-iapa ru ngaitapa cha ama chô liata pathla ta, hiehâhna zy, palôh cha lei ngaitana zy, nôpona zy, he hmopha lei ngaitapa a tlôkheituhpa vâlyuhchâpa py cha.
50 A pathi-iana châna chata lâpi taopa ta; ama hrona cha thina tawhtapa hrôhbie leipa ta, ama hrona cha hri tlao pie ta.
51 Izi râh liata saw a pih tuapa a ypa zydua thie ta, Hama poh-ozy liata ama thatlôna thei hmiatua chaipa zy cha.
52 Châhrasala ano chyhsa zy cha mietahkupa hawhta puakhei ta, sahroh zaw hawhta râhpathohpa liata chhitha ta.
53 A bohpa ta a chhi ta, Chatanachata khâpa hmah chi leipa ei ta; châhrasala tilaipi chata ama khakhaipa zy cha khu khai haw ta.
54 Chatawhcha a su pathaihpa râhri cha tlôkhei ta, cha tlâh cha ano tlaita a pahniepa a châ.
55 Phopizy cha ama hmiakô liata papua ta, Izarel chizy hnohta râh cha ryuto châta pachhaih ta, ama poh-ozy liana chata âmo cha pahrâsa haw ta.
56 Châhrasala Khazohpa Chônôchaipa pasia ei ta, a chô liata a ty ei ta, bie pahnosapa zy cha zyh tlôh leipa ei ta,
57 kua heihpa ta ama pawzy hawhta piehpie ngaitapa ta tlao tao ei ta; libaw do leipa hawhta a pahnie tlâh châ leipa ei ta.
58 Ama zyh leipa achhyna tlâhzy ta ano a pathipa-ia tlôh ei ta, ama khazoh nohthlahpa taopa zy ta ahia patliasa hra ei ta.
59 Khazohpa ta cha cha a hmô nahta a hiehâh ta, Izarel sahlao cha pasi ngaita haw ta.
60 Shilôh byureih chyhsa hry liata, a poh-o sopa cha siesai ta,
61 Biehraina byh cha khakhaipa ku liata patupa ta pasai ta, cha liana chata a hmotaotheina nata rôhnahna cha hmôpa a châ.
62 A chyhsa zy cha zaozi lâta pie ta, a ryuto chô liana chata a hie hâh haw ta.
63 Mei ta ama satlia zy cha kâ ta, ama laihsa zy chata a pakiana hla rai hnei khao veih ei.
64 Ama theihthaipa zy cha zaozi ta pa-paopa ta y ei ta, ama nôhmei zy ta chakhei veih ei.
65 Cha nona chata ABEIPA cha chyhsa amâ môpa ama hrapa hawhta a hra haw ta, Chyhsa thatlôpa kresawti vâta awpa hawhna heta.
66 Ano khakhaipa zy cha tupa ta pakuasa ta, chhâzaw moh chhiena patosa ta.
67 Cha leipa chhao cha Zawsi pathlazy cha khoh leipa ta, Ephrai pho cha a tlyh hra vei;
68 Zudah pho cha tlao a tlyh ta, a kyhpachâpa Zaio Tlâh cha.
69 A su pathaihpa cha vâ a sâhpa zy hawhna khita sa ta, chhâzaw châta a pa-ipa leilô hawhna heta.
70 A chakaotuhpa Davi cha a tlyh ta, mietahkupa sahdô tawhtapa zy cha la ta;
71 mietahkupa panô a taw a chhipa zy a zituhpa tawhta puakhei ta, a chyhsa zy sahlao nata a ryuto Izarel sahlao pasa awpa ta.
72 Ano chata a mohôhna pha chaipa ta âmo sahlao cha pasa ta, zôthaina ta a chhi haw ta.