Khazohpa ta moleipazy panawhsa ta a siapazy a palyupalih
Hla chhihthatuhpa châta: Al-Tashheth ta sa awpa. Asaph Reithaina Hla.
1 Hy Khazohpa, alyna biezy eima cha hlâ; alyna bie eima cha hlâ; na moh cha pado pi ta, na hmonoâh taopa kyh zy cha eima chho tyh.
2 Daihti raopa ei hmô tina chata a do ngaitapa ta ei pachia aw.
3 Alei nata a chô liata a ypa zydua cha zao khai haw ei ta, kei ta a tôhzy cha ei bô. Selah
4 Chyhsa a chapuachaluahpa zy hnohna chata, “Chapuachaluah ngaitapa ta y khah u,” tah na ta, hmoparaopa zy hnohta, “A palai kha u;
5 namâ palaina zie cha palâsa leipa ula, nama chapuachaluahna cha pachha teh u,” tahpa ta.
6 Pachiana cha nochhi lâ tawhtapa tlyma, notla lâ tawhtapa tlyma châ hra leipa ta, chho lâ tawhtapa châ hra vei.
7 Khazohpa tawhta tlao a châ, ano chata pakha panawhsa ta, pakha a pasâh tyh.
8 ABEIPA ku liana chata nyu y tlôh ta, a kresawti cha saih ta, hmo hropa nata pahlaopa ta bie ta; cha liatahpa cha patlao ta, a dizy taih cha, alei liata hmoparaopa zydua chata ama do khai aw.
9 Châhrasala kei chata chhâzaw ta pahnosa aw na ta, Zakaw Khazohpa reithaipa ta ei sa aw.
10 Hmoparaopazy hmotaotheina zydua chhao taipa aw na ta, a siapa zy hmotaotheina deikua cha pasâhpa ta a y aw.