A chyhsa zy khakhaipa vâta Khazohpa hruana
Asaph Maskil
1 Hy Khazohpa, khazia e chhâzaw châta maniah na thy pathla haw tly? Khazia e na sahroh lao bâna su liata mietahkupa zy chô liana heta na pathi-iana a khu ngâ tly?
2 Na chyhsa apahmaohpakhypa sahlao hlâno ta na chaleipa, pho na ryu châta na chatlaipa kha, a thei thlâh ha mah y! Na pahrâ tyhna Zaio Tlâh chhaota.
3 Chhâzaw roryhrana lâna chata na phei chalo mah y; khakhaipazy ta su pathaihpa liana chata hmo moleina to rai ama tao haw hih!
4 Nama khakhaipa zy na chyhsa zy a pahmaohpakhypa sahlao hry liata rahao ngâ ei ta; ama pahnosana zy cha pahnosana châta tawh haw ei ta.
5 Chyhsa râhhmâh tho chôta ahrei a chalopa hawhta a la ei ta.
6 Atahmâ deikua cha a hmo ngiahpa zydua cha ahreizy nata syulô zy ta parao ei ta.
7 Na su pathaihpa cha rao ei ta; na moh yna cha alei liata a chona taihta.
8 Âmo palôhrupa liana chata, “Paraokhai ha ei suh u,” tah ei ta; he râh liata Khazohpa apakhyna-o zydua he rao khai haw ei ta.
9 Eima ngiana cha hmô khao leipa pi ta; hrohsopa rai y khao leipa ei ta, ama pasina awpa rakha a pahnopa rai eima hry liata y hra veih ei.
10 Hy Khazohpa, dyuhtuhpa chata khachâ e a cha reipachhie aw? Chariahpa ta na moh he chhâzaw ta a reipachhie aw ma?
11 Khazia e na ku chachâh lâ na dao haw tly? Na kalachhôh tawhta phia heih la, Âmo sahlao cha pahleipadia teh.
12 Khazohpa cha hlâno tawhta ei Beipa a châ, alei lialiah liata pachhana a tao tyhtuhpa cha.
13 Nâ chata na thatlôna ta tilaipi cha pachhaih chi ta; nâ chata ti liata drakao sahlao luhzy cha pakei chi ta.
14 Nâ chata Leviathan luhzy cha a tlawna taihta pakei chi ta, ano cha râhpathohpa liata chyhsa a ypa zy hnohna chata niepa châta pie chi ta.
15 Nâ chata tihnawh nata ti laipa cha pachhaih chi ta; nâ chata chavah a lai ngaitapa zy pakua chi ta.
16 Chhô he na eih châ ta, zâ chhao na eih a châ; nâ ta a khaituhpa nata noh khi a chhuahnoh chi ta.
17 Nâ chata leilô râhri zydua cha pakhâh khai chi ta; nâ chata nopi nata chasipaw tao chi ta.
18 Hy ABEIPA, he he a thei thlâh ha mah y, khakhaipa chata cha reipachhie ta, pho hru ngaitapa chata na moh ama reipachhiepa kha.
19 Na vachhuh hrona he lyurâhpa sahrâhpa lâna chata pie cheita leipa la; na chyhsa, sipasapazy hrona he chhâzaw ta my khah y.
20 Biehrai kha a vaw papeisa mah y; alei su zohna zy cha nôchhiena yna ta bi tlôh ta.
21 Pasaipa-ina a taopazy cha maophyuhpa ta kua kha ei sala; sipasapa nata dyhchhiepa zy chata na moh reithai ei se.
22 Hy Khazohpa, thyu la, nâma bie cha a rei chhy la; chyhsa hrupa chata noh y ta a cha reipachhie zie cha a thei thlâh ha mah y!
23 Na “khakhaipazy pyu cha my khah y, cha siehnaotuhpa sahlao pyu cha, a ru via ngâ tyh.