Hlazy 76
Tiahna nata pachiana Khazohpa
Hla chhihthatuhpa châta: totâ ri a hneipa ta sapa. Asaph Reithaina Hla.
1 Zudah sahlao hry liana chata Khazohpa cha pahnopa ta y ta, Izarel sahlao hry liana chata a moh a rôhnah.
2 Sale liana chata a byureih cha y ta, ano pahrâna su cha Zaio liata y ta.
3 Cha liana chata libaw châtaizy cha parao ta, vyhphao zy, zaozi zy, adyuhna zy chhaota. Selah
4 Nâ cha sâh taina tlâhpizy hlâna chata rôhnah ngaitapa nata pha ngaitapa châ chi ta.
5 Riahphapa zy cha hrohpa ta y ei ta; ama môpa cha a mô pathla haw ei ta; chyhsa thatlôpa zy chhao ahy hmahta ama ku chalo thei khao veih ei.
6 Hy Zakaw Khazohpa, na rana vâta talaili nata arâ chhao pamôsapa ta y rairieh ei ta.
7 Nâ, nâma tlai cha chi awpa châ chita! Na pathi a ia haw khiahta cha ahy e na hmiakô liata a duah thei aw tly?
8 Na pachiana bie cha avâ tawhta patheisa chi ta; alei heta chi ta, a chalih haw ta,
9 Alei liatahpa a reisipa zydua pachhah awpa ta Khazohpa cha pachia awpa ta a thyu nona kha ta. Selah
10 Hmeihseihta ta chyhsapa pathi-iana cha nâma cha reithaina châ aw ta; adyuhna liata a hroh chhôhpa zy ta na kyhchhi cha amâ ô aw.
11 Bie taih ula, ABEIPA nama Khazohpa liana chata patlô teh u; a chheipâh liata chyhsa zydua chata a hnohta hmosaipiepa zy vaw cheih ei sala, Khazohpa ta chyhsa zy cha chi awpa ta a tao vâta,
12 ano chata ryureituhpa zy riahphana cha panawhsa ta, alei liata abeizy cha chi chhihpa ta a pa-ysa.