BU III (PSALMS 73-89)
Moleipa zy tovyuh
Asaph Reithaina Hla.
1 Khazohpa cha Izarel sahlao chô liata a vaw pha tlai na, pathipalôh a pathaihpa zy chô liana chata.
2 Châhrasala kei ta la tly pasi daihmâ na ta, ei phei chakâna zy he a hlua daihmâ.
3 Hmoparaopa zy vâhnei zie ei hmô nota, a chapuachaluahpa zy uava tlôh na ta.
4 Pasa taona rai hnei leipa ei ta; ama thatlôna cha tlao a i via tlôh ta.
5 Chyhsa hropa hawhta patypamâpa ta y leipa ei ta; chyhsa hropa hawhta riepatheipa ta y hra vei ei.
6 Chavâta a palaina cha pachhih hawhta a ao ei ta; nôchhiena chata chysia hawhta pahly ta.
7 Ama pachâna cha moleina ta bie ta, cha hmo moleipa cha ama pathipalôh saduthiena ta a bie.
8 Pahneisao ei ta, molei ngaitapa ta pasaipa-ina bie reih ei ta; a palai ngaitapa ta reih tyh ei ta.
9 Avâ liata Khazohpa cha reipachhie ei ta, alei liata chipa zy hnohta apalaina bie pie ei ta.
10 Chavâta chyhsa zy cha ano lâta kua heih ei ta; ama biereipa zy cha ngâh ngâsâ ei ta.
11 Âmo chata, “Khazohpa ta kheihta e a pahno aw? Chônôchaipa ta pahnona a hnei aw ma?” tah ei ta.
12 He he hmoparaopa zy ama châ hih; phasa ngaitapa ta y tyhpa ta, ama hneirôh rili tyh.
13 A hrao leipa ta na ei pathipalôh he pathai na ta, ei kuzy seina y leipa ta ei pasi,
14 Hy Khazohpa, noh y ta riepatheipa ta na pa ysa chi ta, my tato ta chhoreipa ta y tlôh na ta.
15 “Cha hawhta ei reih haw,” tah ha aw sala, na chyhsa zy chô liata piepieh ngaitapa ta a taopa ei vaw châ aw.
16 Cha cha ei pahno theina zie awpa ei pachâ nahta, kei châta a pasa tupa a châ,
17 Khazohpa su pathaihpa liata a ngiapa ta; ama chhâna awpa cha ei pahno haw.
18 Âmo cha su pahnia ngaitapa zy liata soh tlai chi ta; raona liata thy pathlah tyh chi ta.
19 Kheihta zie ta e movi hlâ likawh deita ta roryhrapa ta y ta, hmo rarôh y ngaitapa zy ta pahleipadia syulyupa ta ama y tly!
20 Chyhsa ta â hra tawhta ma khâpa ta a rei leipa hawhta, hy ABEIPA, nâ hra tita âmo nohthlahpa chhao cha khâpa ta reih aw va chi.
21 Ei pathipalôh he a pachârôh ta, ei palôhrupa liata chhao chhôpa hawhta y tlôh na ta,
22 Chyhsa hru ngâpa nata khâpa hmah a pahno leipa châ na ta, na hmiakô liata sâh hawhta deita ei châ tyhpa kha.
23 Châhrasala na hnohta y tyh na ta; ei ku chachâh lâ he patu tyh chi ta.
24 Nâ ta na ryraona liata nâ chhi aw chi ta, cha hnôh lâna chata rôhnahna liana khita einâ ly aw chi.
25 Avâ liana khita nâ leipa ta cha ahy e ei hnei? Alei liana chhao heta nâ leipa ta cha ei khopa ahy hmah y veih ei.
26 Ei sapa nata ei pathipalôh he zei haw ta, châhrasala Khazohpa cha chhâzaw ta ei tovyuh awpa a châ.
27 Nâma cha hlâpa ta a ypa zy cha leidia tlôh aw ei ta; cha pheisaih tupa cha pahleipadia haw chi ta.
28 Kei châta deikua cha Khazohpa a hniapa he a pha na; Abeipa KHAZOHPA cha ei pabohna ta hmâh na ta, ei raihria zydua kyh cha ei chho thei nawpa ta.