Hlazy 72
Abei siapa abeina
Sawlawmaw Reithaina Hla.
1 Hy Khazohpa, na pachiana zy cha abei pie la, na siana cha abei sawchapawpa pie mah y!
2 Na chyhsa zy cha siana ta pachia aw ta, na sipasapazy cha pachiana siana ta a pachia aw!
3 Tlâhpi nata tlâh chyhta zy liata siana ta chyhsa zy hnohta thlahlôhna ama vaw tlôkhei aw!
4 Ano chata chyhsa hry liata sipasapa zy cha pachiapa aw ta, dyhchhiepa sawzy cha pachha aw ta, pasaipa-ituhpa deikua cha a pazao aw!
5 Noh a y chhôhna chata ano cha hroh aw ta, thlahpa y chhôh zydua chhaota, chhâ a y chhôh zydua chhao chata!
6 Ano cha sibiepa taipa chô liata vâsua a tlapa hawhta tla aw ta, alei a pasatuhpa vâsua ti hawh tlaita!
7 A hro noh liana chata a siapa zy cha vânoh topa ta y aw ei ta, thlahlôhna thata a y hra aw, thlâpâ a lei hlâ leita cha!
8 Ano chata tilaipi tawhta tilaipi hropa taih chhaota, bie a hnei hra aw, Chavah tawhta kaoki taih chhaota!
9 A khakhaipazy chata a hmiakô liata a bôh aw ei ta, ano khakhaipazy chhao chata dohlei liata a khu lâta a bôh ei sy!
10 Tasi râh nata liahpahlô liata abeizy ta hmosaipiepa zy vaw cheih aw ei ta, Seba nata Sheba râh abeizy ta hmopiepa zy ama vaw hlâ aw!
11 Abei zydua cha ano hmiakô liata a bôh aw ei ta, phopizy ta ama chakao aw!
12 Dyhchhiepa ta a pado nota ano chata pachha aw ta, sipasapa baotuhpa a hnei leipa chhao cha.
13 Ano chata sipasapa nata dyhchhiepa zy cha ngiachhie aw ta, dyhchhiepa zy hrona cha a pachha haw.
14 Ama hrona cha pasaipa-i nata nôchhiena tawhtapa chatlai aw ta; ama thisaih cha ano pachâna chata a so ngaitapa châ tlôh aw ta.
15 Ano cha hroh parei aw ta, Sheba râh ngôh cha ano piepa châ aw ta! Chyhsa zy ta ano châ thlahchhâpa tyh aw ei ta, noh y ta byhnâ ama aw pa aw!
16 Alei liata tlâh chô liana zy heta sâh a hluhpi y aw ta; a su cha Lebanaw hawhta a chanei ngâ aw ta; khihpi liata chyhsa zy cha alei sibiepa pha ngaitapa hawhta ama y aw!
17 A moh cha chhâzaw ta dia leipa aw ta, a moh pathâhna cha noh a y chhôhna chata dia leipa ta y lymâ mawh sy! Chyhsa zydua chata Khazohpa ota byhnâ a pie thei nawpa ta hiah ei sala, abei cha byhnâ a piepa hawhta!
18 ABEIPA Khazohpa, Izarel sahlao Khazohpa cha reithaipa ta y mawh sy, ano deita heta hmonoâhpa tao tyh ta.
19 A moh rôhnah ngaitapa he chhâzaw ta reithaipa ta y sala; leilô zydua chhao he a rôhnahna ta pabiepa ta y mawh sy! Amen! Amen!
20 Zese sawchapawpa Davi thlahchhâna zy cha he liana heta a chhâ haw.