Machâpa thlahchhâna
1 Hy ABEIPA, nâma liana chata ei ngâna pahnieh tyh na ta; khatita hmahta maophyuhpa ta na pay-sa khah y!
2 Na siana vâta na pachha la, na papua la; kei lâna heta na nah pachôhpa ta na pachha mah y!
3 Kei châta yna lôpanô kha ei sie theina awpa vaw châ mah y, nâ ta eina pachha awpa ta bie pie chi ta, ei lôpanô nata ei kuh châ tlôh chi ta.
4 Hy ei Khazohpa, hmoparaopa ku tawhtapa na pachha mah y. a sia leipa nata nôchhie ngaitapa ku tawhtapa cha.
5 Hy ABEIPA Khazohpa, nâ cha ei hnabeiseina cha châ tlôh chi ta, ei hawtita tawhta ei ngâna cha na châ.
6 Chhi tawh rai ta nâma liata a pahnieh na ta; ei nô rih tawhtapa na latuhpa châ chi ta, nâma na khâ ei cha reithai aw.
7 Chyhsa hluhpi pachâ ta hmonoâhpa hawhta châ na ta; châhrasala nâ cha ei pabohna a i ngaitapa na châ.
8 Ei pakah he nâ reithaina ta bie aw ta, noh y ta na palyupalihna ta a bie hra aw.
9 Ei machâ tita na thy leipa la; ei tha a sy tita na siesai kha y.
10 Ei khakhaipa zy chata ei kyh na reih tlôh ei ta, ei hrona a byhtuhpa zy cha a ryru hra ei ta,
11 “Khazohpa ta a siesai haw; a chadai ula, patu teh u, a pachhatuh awpa y tlôh lei khâh ta,” tahpa ta.
12 Hy Khazohpa, nâ hla cheita leipa la; hy ei Khazohpa, eina bao awpa chi ta chatlie mah y!
13 Ei hrona adyuhtuhpa zy cha maophyuhpa nata leidiapa ta y ei sala; ei raona awpa a tluatuhpa zy cha reipachhiena nata nozana ta khupa ta y mawh sy.
14 Châhrasala kei la hnabeiseihpa ta khâ y aw na ta, ei cha reithai via rili aw.
15 Ei pakah heta na siana bie chho aw ta, noh y ta na pachhana bie a chho hra aw, a hluhna rakha pahno tlôh na va.
16 Abeipa KHAZOHPA hmotao rôhnah ngaitapa nata a vy aw na ta, nama siana bie deita ei reih aw.
17 Hy Khazohpa, ei hawtita tawhtapa cha, nâ ta na pachu chi ta, atahmâ taihta na hmotao noâhpa zy cha ei pahnosa tyh.
18 Hy Khazohpa, machâ na ta, ei sâ a pawh ti chhaota, na siesai cheita khah y, na thatlôna he chhâ a vaw ypa zy hnohta nata na hmotaotheina he a vaw y awpa maih hnohta ei pahnosa hlâ lei la.
19 Hy Khazohpa, na siana nata na hmotaotheina chata avâ sâhpazy tlô ta. "Hy Khazohpa, na hmo rôhnah ngaitapazy a taotuhpa, nâma hawhpa he ahy e a y?
20 Nôpona hluh ngaitapa nata pasana thata ei chôta patlôsa chi ta, na pahro heih aw chi ta; thlâ khaoh tawhtapa eina thaoh heih aw chi.
21 Nâ ta ei rôhnahna na papôhsapa la, a vaw heih heih la thlah na palôh mah y.
22 Totâ ta ei cha reithai hra aw, hy ei Khazohpa, na bie hmeiseihpa tlai cha; hy nâ Izarel sahlao Mo Pathaipa, totâ ta nâma reithaipa ta ei sa aw.
23 Nâma reithaipa ta ei sa tita, ei hmao he thapha ngaitapa ta y aw ta; ei hrona na chatlaipa chhao he a tha a pha ngaita aw.
24 Ei paleih chhao he noh y ta, na siana bie a reih aw, ei raona awpa a tluatuhpa zy cha maophyuhpa ta, nozapa ta y haw tlôh ei ta.