Khazohpa pabohsana ngâna
Hla chhihthatuhpa châta: ri a hneipa totâ ta sapa. Davi Reithaina Hla.
1 Hy Khazohpa ei awna he vaw thei la, ei thlahchhâna he nahthlie mah y;
2 ei pathipalôh a panao nota kaokih tawhna heta ei cha pado aw. Lôpanô kei hlâta a sâh viapa liana chata nâ chhi mah y;
3 nâ cha kei pabohna, Khakhaipa zy tawhtapa o sâhpa a i ngaitapa châ tlôh chi ta.
4 Na byureih liata chhâzaw ta y aw na ta: Na mathlaw ry a nyuna su liana chata ei vaw ngia aw! Selah
5 Hy Khazohpa, nâ chata ei chhie sakhâhna biezy nahthlie tlôh chi ta, na moh a chituhpa zy ryutona cha na pie chi ta.
6 Nâ chata abei hro pasihsa aw chi ta; ano kôzy cha chhâ hluhpi tluta a châ aw!
7 Khazohpa hmiakô liata chhâzaw ta a y thlâh ha aw; ano hrôbieh theina awpa ta kyhpachâ ngiachhiena nata hmeihseihna a chhuahnoh mah y!
8 Cha tawhna chata ei chhie sakhâhna biezy noh tato ta ei patlô thei nawpa ta chhâzaw ta na moh reithaipa ta ei sa aw.