Khakhaipa adyuh nawpa thlahchhâna (Hla 108: 6-13)
Hla chhihthatuhpa châta: Shusha Eduth ta sa awpa. Davi Miktam pachu awpa ta; ano cha Arawharai sahlao nata Aram-zobah sahlao chhaota adyuh ei ta, chatawhcha Zôaba kua ta. Edôma sahlao thykha nata sâh no Alôh Saikao liata a thie notahpa.
1 Hy Khazohpa, nâ ta maniah thy chi ta, maniah parao chi ta; na hie vaw hâh haw ta; maniah padua heih mah y.
2 He râh he chalyusa chi ta, hriechhei haw chi ta; a hriena zy cha tao pathi heih mah y, a chalyu ngâ tlôh ta.
3 Na chyhsa zy he hmo ru ngaitapa zy patyhsa chi ta; pao chheichhâna kresawti cha maniah padosa haw chi ta.
4 Nâma cha chituhpa zy hnohna chata poh-raipa pie haw chi ta, bie hmeihseihpa vâta raipa a châ thei nawpa ta. Selah
5 Na kho ngaitapa zy pachhapa ta ama y thei nawpa ta, na ku chachâh lâta pachha la, nâ chhy mah y!
6 Khazohpa ta a pathaina liana chata he hawhna heta reih ta: “Thaphapa ta y aw na ta, Sekhe khih cha pachhaih aw na ta, Sukô Saikao cha ei rai hra aw.
7 Kilia cha kei eih châ ta; Manase chhao kei eih châ ta; Ephrai chhao ei luh pabohna châ ta; Zudah cha ei ryureina chôhchahrei a châ.
8 Môaba cha ei siena bei châ ta, Edôma cha ei pheiky byh châ aw ta; Philistia chô liata ei pahniena awna cha a y,” tahpa ta.
9 Khihpi a ipa liana chata ahy e na chhihtha aw? Edôma liana chata ahy e nâ chhi aw?
10 Hy Khazohpa, nâma tlai ta maniah thy va chi mâ? Hy Khazohpa, eima pheisaih sahlao zy hnohta hra pua tlôh leipa chi ta.
11 Dyuhtuhpa zy siehnao awpa ta maniah bao mah y, chyhsapa baona cha khâpa hrao leipa dei châ tlôh ta!
12 Khazohpa chhaota riahpha ngaitapa ta eima tao aw; ano cha maniah a dyuhtuhpa zy a tlypa tuah awpa châ tlôh ta.