Hlazy 62
Khazohpa deita abohna a châ
Hla chhihthatuhpa châta: Jeduthun zi ta. Davi Reithaina Hla.
1 Ei hrona heta Khazohpa deita hâ ta; ano tawhna chata pachhana a vaw pua aw.
2 Ano deita cha ei lôpanô nata ei pachhana a châ, ei o sâhpa châ ta; thata a chalyu aw va na.
3 Nâmo zydua ta thi awpa ta alô pâhchhô pao haipa hawhta nata dona a pao daihmâpa hawhta, khachâ e chyhsa pakha he nama tei aw?
4 A rôhnahna tawhta chati pathla awpa ta a patlapanô ei ta. Haipa reipa he amâ ly ngaitana châ ta. Ama pakah ta byhnâ aw ei ta, châhrasala ama palôhrupa ta chhie amâ sa tyh. Selah
5 Ei hrona he Khazohpa deita hâ ta, ei hnabeiseina he ano tawhta a puapa châ tlôh ta.
6 Ano deita cha ei lôpanô nata ei pachhana a châ, ei kuh sâhpa châ ta; a chalyu aw va na.
7 Khazohpa liata ei pachhana nata ei rôhnahna y ta; ei thatlôna lôpanô nata ei pabohna cha Khazohpa liata a y.
8 Nâmo zawpi saih u, khati no raita ano cha ngâ ula; nama pathipalôh cha a hmiakô liana chata leitha teh u; Khazohpa cha eima châta a pabohna a châ. Selah
9 Chyhsa chi nawpa zy he khâpa hrao leipa châ ei ta, chyhsa chi laipazy chhao he haipadei ama châ; khopathliana liana chata chalo syulyupa ta y aw ei ta; khâpa hrao leipa hlâ chhaota amâ hua via.
10 Pasaipa-ina he ngâ khah ula, phihmâhna he palaikheina ta hnei hra khah ula; hneirôna a vaw pôh nona chata, a chô liata nama pathipalôh cha pahnieh khah u.
11 Khazohpa ta ei kha hlâta hluh via a reipa cha ei thei haw; hmotaotheina he Khazohpa eih a châ, tahpa hih;
12 Hy Abeipa, zawngiahna he na eih na a châ hra. Chyhsa to ama hmotaopa hawh chyu ta thô tyh tlôh chi ta.