Taolatuhpa zy tawhta aboh nawpa ta thlahchhâna (Hla 108: 1-5)
Hla chhihthatuhpa châta: Al-tashheth ta sa awpa. Davi Reithaina Hla: Miktam: Sawla tawhtapa lôpu liata â râ notahpa.
1 Hy Khazohpa, na ngiachhie teh, na ngiachhie teh, ei hrona he nâma liana chata a bohna châta a vaw ngia tlôh ta; na mathlaw nohpahli ry cha ei pabohna aw, vâchhiena zy he a lei hlâ lei cha.
2 Khazohpa Chônôchaipa cha ei pado aw, Khazohpa a to na taopatuhpa cha.
3 Ano chata avâ tawhta vaw tuah aw ta, eina pachha aw, nâ dyuhtuhpa zy a panawhsa aw. Selah
Khazohpa ta a zawngiahna nata a ngâchhihna cha a vaw tua papua aw!
4 Ei hrona he chakeibarôhneipa hry liata y ta, mei kâpa hry liata a zia na ta; chyhsa sawzy hry liana chata, cha sahlao hâhzy cha asei nata châtaizy châ ta, ama paleih cha zaozi tiah ngaitapa a châ.
5 Hy Khazohpa, nâ cha avâ chô syulyu lâna khita pachônôsapa ta y mah y! Na rôhnahna cha leilô zydua chô liana heta vaw y mawh sy!
6 Ei kei chakâhna zy châta sao a chhuahdy haw ei ta; ei hrona he a bohpa ta y ta. Ei hmiakô liata khaotlôh chao ei ta, âmo tlai a lialiah liata tla haw ei ta. Selah
7 Ei pathipalôh he â ina, hy Khazohpa, ei pathipalôh he â ina! Hla ei sa aw, reithaina hla ei sa aw!
8 Ei thlahpa a hra teh! Tlaipi nata totâ saih u, a hra teh u! Kei cha mydi ta ei hra patoh aw.
9 Hy Abeipa, chyhsa to hry liata zy alyna bie ei cha hlâ aw; phopizy hry liata nâma reithaipa ta ei sa aw.
10 Na zawngiahna cha avâ phana taihta thata châ tlôh ta, na hmeihseihna cha vadô phana taihta thata châ hra ta.
11 Hy Khazohpa, nâ cha avâ chô lâ syulyu khita pachônôsapa ta y mah y! Na rôhnahna cha leilô zydua chô liana heta vaw y mawh sy!