Moleipazy hry nawpa ta thlahchhâna
Hla chhihthatuhpa châta: Al-tashheth ta sa awpa. Davi Reithaina Hla: Miktam
1 Siana bie cha nama reih hmeihseih ma, ryureituhpa zy saih u? a do ngaitapa ta chyhsa zydua nama pachia ma?
2 Cha bao va, nama pathipalôh liana chata hmo molei ngaitapa tao tyh eichi ta; alei liata nama ku ta hmo nôchhie ngaitapa ta taopa cha kho pathliah tyh eichi ta.
3 Hmoparaopazy cha chhi tawh raita ama hro chhôhta ano leipa lâ sie ei ta, ama pie pata nahta haipa bie reipa ta amâ khie tyh.
4 Ama châmaih cha parih châmaih hawhta châ ta, vâzi nahpâpa nah a chahu tyhpa hawhna cha ama châ,
5 cha chata parih dyuthaipa zy ao cha nahthlie tyh vei, kha tluta thaipa chhaota dyuh hra sala.
6 Hy Khazohpa, ama pakah liana chata ama hâhzy cha thlie la; hy ABEIPA, chakeibarôhneipa dawpazy hâh laipapi zy cha khai pathla mah y!
7 Âmo cha ti chahra ngaitapa ta a lopa hawhta zao ei sala; ama châtaizy ta ama mopa nota chhawh pathlapa hawhta y lymâ mawhsy.
8 Chaikarupa a zaopa hawhta châ sala, a daihti leipa ta chanô saw a sapa, noh rai a hmô leipa hawhpa he châ mawh sy.
9 Nama beizy châta a hloh tho lalôpa a pahno hlâ chhaota, ano chata khiesô ta a cheih aw, a hropa nata a kâ haipa chhao!
10 A siapa chata phulana cha a hmô nota aly aw ta; hmoparaopa thisaih liana chata a phei cha a si aw.
11 Chyhsazy ta. “A siapa cha lymâ piepa châ tlai ta; alei liata, ryureituhpa Khazohpa a vaw y hmeihseih tlai he,” ama tah aw.