Ngiapâna chôta thlahchhâna
Hla chhihthatuhpa châta: Jonathelem rehokim ta sa awpa. Davi Reithaina Hla: Miktam: Philistina sahlao ta Katha khih liata ano ama patu notahpa.
1 Hy Khazohpa na ngiachhie mah y, chyhsa ta na taola tlôh ei ta; noh y ta na thyuhnao ei ta, eina pasai-pa-i tyh ei;
2 Ei khakhaipazy ta noh y ta na patypamâ ei ta, apalai ngaitapa ta na dyuhtuhpa zy he hluh tlôh ei ta.
3 Ei china maihta, hy Chônôchaipa, nâma ei cha ngâ aw.
4 Khazohpa liana chata a bie taina reithai aw na ta, Khazohpa ngâ na ta, chi aw va na. Sapa châta kheihta eina tah thei aw?
5 Noh y ta ei biezy pachiapaliahsa tyh ei ta; ama pachâna zydua cha kei lâta hmo chhiepa sai a châ.
6 Apakhy ei ta, anyu ei ta. ei hniezy ngia tyh ei ta. Thie nâ chhuah ei ta.
7 ama moleina vâ chata hrie ei la; hy Khazohpa, hiehâhpa ta chyhsa to cha panawhsa mah y!
8 Nâ ta ei viavinazy he ngia tyh chi ta; ei mothlihzy he na chhihro-ôh liata ryh mah y! Na châbu liata ropa ta châ vei ma?
9 Ei cha pado daihtina tlai chata ei khakhaipazy cha amâ râpai aw. He he ei pahno, Khazohpa ta einâ duakheipa he.
10 Khazohpa liana chata a bietaina reithai aw na ta, ABEIPA liana chata a bietaina ei reithai aw.
11 Khazohpa ngâ na ta, chi aw va na. Chyhsa ta kheihta eina tah thei aw?
12 Hy Khazohpa, nâ lâta chhie sakhâhna zy hnei na ta; alyna bie rei atheihna ta ei cha thô aw.
13 Ei hrona he thina tawhtapa pachha tlôh chi ta, ei pheizy he a hluah lei awpa ta na pachhapa châ vei ma? Khazohpa hmiakô liata charei aw na ta, khaihna a hropazy chô liata khaihpa liana chata.