Hneirôna liata a pahniehna do leipa
Hla chhihthatuhpa châta; Kôrah Sawchapawpazy Reithaina Hla.
1 Chyhsa to saih u, he he thei ula! Khizaw liata a pahrâpa zydua saih u, nah pachôh teh u,
2 a lai nata a nawh, hneirôh nata dyhchhie chhaota!
3 Ei pakah heta sona bie reih aw ta; ei pathipalôh pachâpa cha pahno thaina bie a châ aw.
4 Pakhona bie liata ei nah pachôh aw na ta; ei bie liamaripa reipa cha totâ ta ei chhopasia aw.
5 Noh pha leipa liana zy ei phei ngavâhmaothy thaby liata hrao leina chata, eina chadôpa chhaota khazia ei chi aw,
6 ama hneina ngapâta ama hneirôna thata a palaikheituhpazy cha?
7 Ahy hmahta ama unawhpa chhao chatlai thei cheita leipa aw ei ta, Khazohpa lâta chatlaina piepa thei hra aw veih ei,
8 ama hro chatlaina awpa châta ma ru ngaitapa châ ta, chhâzaw chhaota â no rai ta a no lei awpa a châ,
9 hroh ngâthlâh ha ta, thuna a hmô lei awpa châ ta.
10 Chyhsa sopa zy chhao thi ei ta, ahrupa nata nôchhiepa zy chhao leidia rairieh ei ta, ama sôh mo hropa châta ama siesai tyhpa zy cha pahno tlôh ta.
11 Ama palôhrupa pachâna yzie cha, ama ozy cha chhâzaw ta a y awpa hawhta nata ama pahrâna zy cha chhâ zydua taihta a y awpa hawhta a châ, ama râh zy cha âmo moh sai ta ama bi tyh.
12 Châhrasala chyhsapa he zachhihpa ta y thlâh ha leipa ei ta, sâh a leidia tyhpa zy hawhna dei he ama châ na.
13 Cha ama yzie cha ama hruna a châ, châhrasala ama hnôh lâna chata chyhsa zy ta ama bie reipa zy cha a pha ama tah tyh. Selah
14 Mietahkupa zy hawhta Sheôl châta raopa châ ei ta; Thina cha âmo a vaihtuhpa châ aw ta; myna chata chyhsa a do ngaitapa zy ta ama chô liata bie hnei aw ei ta; a yna rai y lei nawpa ta amâ ngiana cha Sheôl parao awpa a châ aw.
15 Ei hrona deikua Khazohpa ta Sheôl ku tawhtapa a chatlai aw, ano chata nâ ly tlôh aw ta. Selah
16 Chyhsa pahneirôhsapa ta a vaw y nahta, a chhôhkha rôhnahna cha thata pahluhsapa ta a y no chhaota chi kha y.
17 A thi tina chata khâpa hmah a chei leipa aw ta; a rôhnahna chata zi tlôh aw vei.
18 A hro nota a hu a pahiepa ta y hra sala, nâma, na pahâsa nona heta chyhsa ta a cha reithai tyh ei,
19 a pathlatuhpa zy chhâ lâta a sie aw, khatita hmahta khaihna he hmô khao aw veih ei.
20 Chyhsapa zachhihpa ta ypa ta, pahno thaina a hnei tlôh leipa cha, sâh leidia tyhpa zy hawhna dei he ama châ.