Khazohpa cha pachiatuhpa
Asaph Reithaina Hla.
1 Khazohpa, Khazohpa Atotaotheipa tlai chata bie reih ta. leilô he noh chhina tawhta a tlana taihta a aw haw.
2 A ngia pakina Zaio tawhna chata, Khazohpa cha khaih haw ta.
3 Eima Khazohpa cha a vy ta, a chalih thlâh ha aw vei, a hmiakô lâna chata mei kâ ngâ aw ta, a chheipâh liana chata thlihpi thata a pathli hra aw.
4 A chyhsa zy a pachia thei nawpa ta a chô lâ avâ zy nata alei he a aw aw.
5 “Ei mopathaihpa zy kei lâta a vaw chhi teh u, atheihna ta kei lâta bie a hraihtuhpa zy cha!” tahpa ta.
6 Avâ zy khita a siana cha a phuah aw. ano Khazohpa tlai cha pachiatuhpa châ tlôh ta. Selah
7 “Hy ei chyhsa saih u, nahthlie teh u, bie ei reih aw na, hy Izarel, ei cha pahno pasiasa aw, kei he Khazohpa, na Khazohpa tlai cha ei châ hih.
8 Na atheihna zy vâta cha ra aw va na; na raopa hlâna zy cha ei hmiakô liata y tlôh ta.
9 Na o tawhtapa cha viahchao tôhpa rai la leipa aw na ta, na sahroh sahdô zy tawhtapa zy mie tôhpa zy chhao la hra aw va na.
10 Lyurâhpa sa to raizy he keima eih châ tlôh ta, tlâh sâh kha chô liata sahroh a ypa zy chhao cha.
11 Tlâhpi zy liata pavaw zydua pahno khai na ta, lyurâhpa sazy chhao keima eih a châ.
12 “Nodipa ta y hra aw sala, cha chho aw va na; leilô nata a chhôh liata a ypa zydua he kei eih châ tlôh ta.
13 Viahchao tôhpa sa niepa ta, mie thisaih ei doh aw ma?
14 Khazohpa lâta alyna bie rei atheihna cha tlao hlâ la, na bietai chhao Chônôchaipa liata patlô teh;
15 nôpo noh liana chata na pado la; ei cha pachha aw, chatanachata eina parôhnahsa aw chi,” tah ta.
16 Hmoparaopa liana deikua chata Khazohpa ta; “Ei bie raopa kheihta zie ta pahnosapa ta. ei biehrai he kheihta zie ta na pakah ta reipa e na châ?
17 Pachuna a hao chi ta, ei biezy he na hnôh lâta thy lymâ tlôh chi ta.
18 Paru hmâhpa na hmô nahta, ary tahkhei chi ta; apheipa nâ kao tyh hra.
19 “Na pakah he hmo moleina lâ pie chi ta, na paleih heta dona a tao tyh hra.
20 Atyuh chi ta, na unawhpa reipasipasua chi ta; na nôzy sawchapawpa tlai cha na leih tyh.
21 Cha hmozy cha tao chi ta, châhrasala a chalih thlâh ha na ta; nâma hawh tlaita eina rao tyh chi. Châhrasala cha ra aw na ta, na mohmô liata a pazi lymâpa ta ei palâsa aw.
22 Nâ mo Khazohpa a mytuhpa saih u, atahmâ he pachâ teh u, chata leipa ta la cha hriechhei aw ei na ta, nâmo cha pachhatuhpa rai y tlôh aw veih ei!
23 Ahyrai alyna bie rei atheihna hlâpa maih chata na parôhnahsa tyh ei ta; a yzie a phapa ta a vaotuhpa hnohna chata Khazohpa pachhana ei pamosa aw.” tah ta.